Падраздзяленні МНС заўсёды гатовы да хуткіх дзеянняў ва ўмовах павышанай рызыкі, заявіў прэм’ер-міністр Раман Галоўчанка сёння на афіцэрскім сходзе, прысвечаным завяршэнню службы генерал-лейтэнанта ўнутранай службы, экс-міністра па надзвычайных сітуацыях Уладзіміра Вашчанкі, перадае БелТА.
«У органах па надзвычайных сітуацыях выпадковых людзей у прынцыпе не бывае. Тут працуюць толькі тыя, хто бязмерна адданы сваёй прафесіі, служэнню айчыне і народу. Падраздзяленні МНС, як і павінна быць, заўсёды гатовы да хуткіх, рашучых дзеянняў ва ўмовах павышанай рызыкі і ва ўмовах, звязаных з небяспекай для жыцця, у самай складанай, нестандартнай абстаноўцы», — сказаў Раман Галоўчанка.
Ён звярнуў увагу, што ўменне працаваць дакладна, зладжана і рэзультатыўна падраздзяленні МНС не раз дэманстравалі ў справе — як у краіне, так і за яе межамі ў час ліквідацыі надзвычайных сітуацый.
«Прыярытэтамі вашай дзейнасці заўсёды было захаванне жыцця, здароўя людзей, абарона дзяржаўных інтарэсаў і папярэджанне стыхійных бедстваў. Людзі, якія трапілі ў бяду, разлічваюць менавіта на вас. Таму што ўпэўнены, што дапамога абавязкова прыйдзе, супрацоўнікі МНС зробяць усё магчымае і немагчымае, каб выратаваць галоўную каштоўнасць — чалавечае жыццё», — адзначыў прэм’ер-міністр.
Раман Галоўчанка падзякаваў Уладзіміру Вашчанку за работу і ўручыў Ганаровую грамату Савета Міністраў за шматгадовую плённую дзейнасць, высокі прафесіяналізм і значны асабісты ўклад у папярэджанне і ліквідацыю надзвычайных сітуацый.
Кіраўнік Адміністрацыі Прэзідэнта Ігар Сергяенка звярнуў увагу, што за плячыма Уладзіміра Вашчанкі значны працоўны шлях і яркая біяграфія афіцэра-ратавальніка, больш за 40 гадоў аддадзена службе па абароне ў надзвычайных сітуацыях. Прайшоў дастойны шлях, пачынаючы ад малодшага інспектара дзяржаўнага пажарнага нагляду ў Магілёве, паэтапна прайшоў усе прыступкі кіруючай работы. 10 гадоў узначальваў Магілёўскае абласное ўпраўленне МНС, яшчэ 10 гадоў — на пасадзе міністра. «Практычна 20 гадоў — палавіна прафесійнага шляху — гэта кіруючая пасада на абласным і рэспубліканскім узроўні», — заўважыў Ігар Сергяенка.
Паводле слоў кіраўніка АП, Уладзіміра Вашчанку заўсёды вызначала добрасумленнае стаўленне да справы, уважлівыя адносіны да людзей, клопат аб патрэбах падначаленых. За гады кіраўніцтва Міністэрствам па надзвычайных сітуацыях шмат зроблена ў плане ўдасканалення і ўмацавання матэрыяльна-тэхнічнай базы, створаны і ўкаранёны новыя ўзоры тэхнікі, якая выкарыстоўвалася пры ліквідацыі надзвычайных сітуацый, удасканалена вучэбная база. Па ініцыятыве Уладзіміра Вашчанкі шмат увагі ўдзялялася развіццю міжнародных сувязей, беларускія ратавальнікі прымалі ўдзел у тушэнні пажараў у шэрагу краін.
Ігар Сергяенка падзякаваў Уладзіміру Вашчанку за работу па патрыятычным выхаванні, стварэнні адукацыйных цэнтраў бяспекі і ўручыў яму Ганаровую грамату Адміністрацыі Прэзідэнта.
Уладзімір Вашчанка падзякаваў усім, з кім давялося працаваць, адзначыўшы, што дасягнутыя вынікі сталі магчымымі дзякуючы сумеснай працы. «З дзяржорганамі, якія ўваходзяць у сістэму нацыянальнай бяспекі, у нас была з’яднаная каманда», — сказаў ён.
Ён выказаў упэўненасць, што МНС і ў далейшым будзе дастойна выконваць пастаўленыя перад ведамствам задачы.
Што за таемнымі дзвярыма?
