Вы тут

Раім схадзіць


Ноч музеяў, «Калекцыя ілюзій», спектакль «Страта», драма «Пралятаючы над гняздом зязюлі» і іншае — афіша «Звязды».


Выстаўка жывапісу Алены Шлегель «Калекцыя ілюзій»

Дзе: НЦСМ, г. Мінск, вул. Някрасава, 3

Калі: па 4 ліпеня

Колькі каштуе: 6 BYN (льготны 3 BYN)

Праект Алены Шлегель пачынае серыю выставак лаўрэатаў Нацыянальнай прэміі Міністэрства культуры Рэспублікі Беларусь у галіне выяўленчага мастацтва 2020 года.

Прыгожыя аксэсуары жаночага свету, кругазварот прыемных дробязяў разам з выявай свету ідэй аб’яднаны ў жывапісе Алены ў стылістыцы тонкага і далікатнага варыянту «беларускага этнасюррэалізму». Містычны, міфалагічны змест твораў мастачкі зачароўвае гледача якасцю фарбаў, але бачым ў яе любімыя колеры — залацісты, зялёны і чырвоны — лепшае спалучэнне для казачных сцэн. Шлегель мае свой асаблівы, творчы почырк. На працягу 15 гадоў работы аўтара застаюцца аднолькава якаснымі і цікавымі; эстэтыка падачы, малюнак і палітра даўно знайшлі сваіх прыхільнікаў. І не дзіва, што прызнанне дзяржавы — перамога ў намінацыі «Жывапіс» — дасталася менавіта нашай мастачцы.

Шлегель Алена Генадзьеўна

Нарадзілася 16 ліпеня 1965 года ў Мінску.
1980-1984 — Мінскае мастацкае вучылішча імя А.К. Глебава. Дыпломная работа — насценны роспіс «Пралог» у фае ММВ імя А.К. Глебава.
1986-1991 — Беларускі дзяржаўны тэатральна-мастацкі інстытут, кафедра манументальна-дэкаратыўнага мастацтва. Дыпломная работа — насценны роспіс «Казка» у сярэдняй школе № 197.
З 1988 — удзел у рэспубліканскіх и міжнародных мастатацкіх выстаўках і праектах.
1989 — сябра маладзёжнага аб’яднання Саюза мастакоў БССР.
1996 — сябра Беларускага саюза мастакоў.
1996-1999 — выкладчык Беларускай акадэміі мастацтваў.
1998 — лаўрэат рэспубліканскай мастацкай выстаўкі «Час. Прастора. Асоба» (2 прэмія ў намінацыі «Жывапіс»). РМГ БСМ, Мінск.
1998 — сябра творчага аб’яднання «Міжнародная гільдыя жывапісцаў».
2004 — сябра творчага аб’яднання «Артэль».
2005 — стыпендыят Міністэрства культуры Рэспублікі Беларусь.
З 2006 — выкладае на кафедры мастацка-педагагічнай адукацыі Беларускага дзяржаўнага педагагічнага ўніверсітэта імя Максіма Танка.
2019 — лаўрэат прэміі Федэрацыі прафсаюзаў Беларусі ў галіне літаратуры, мастацтва, журналістыкі і аматарскай творчасці.
2020 — лаўрэат Нацыянальнай прэміі Міністэрства культуры Рэспублікі Беларусь у галіне выяўленчага мастацтва ў намінацыі «Жывапіс».


Спектакль «Страта» тэатра «На балконе»

Дзе: Арт-прастора БДУ, г. Мінск, вул. Кастрычніцкая, 10

Калі: 21, 28 мая

Колькі каштуе: 10,5 BYN

Аднойчы рэжысёр Андрэй Саўчанка знайшоў ля дваровага гарадскога сметніка старую валізку, ў якой апынуўся стос разарваных фатаздымкаў. Чыйсьці сямейны архіў. Далейшае жыццё знаходкі шукайце ў першай гісторыі. Другая частка — гісторыя пра дзедаў дом, спалены маланкай.

Калі чалавек губляе нешта, то гэта моцна б’е, моцна ўзрушвае. Унутраны ператрус пераарганізоўвае ўласную сістэму асобы — і ў цябе з’яўляюцца новыя думкі, новыя накірункі, па якіх ты можаш ісці.

Памяць ажывае ў прадметах. Асновай тэхнікі ready-made з’яўляецца трансфармацыя ўтылітарных прадметаў у твор мастацтва. Вызначальным для яе становіцца пошук гэтага прадмету.

Спектакль-эскіз народжаны ў межах лабараторыі ready-made theatre «Ужо гатовы сусвет», якую ладзілі Алена Мальчэўская і Аляксандр Марчанка ў Цэнтры візуальных і выканальніцкіх мастацтваў «ART Corporation».

Эскіз спектакля быў прадстаўлены ў межах форума «ТЭАРТ» у 2020.

  • Аўтар, актор і рэжысёр: Андрэй Саўчанка
  • Мастак: Юрый Вінаградаў
  • Музыка: Jozef van Wissem і Brendan Perry
  • Працягласць: 60 хвілін.
  • Мова: беларуская

Запіс: +375 (29) 624-89-02 альбо праз чат у тэлеграме. Калі хочаце падтрымаць, можна набыць квіткі.

Тэатр На Балконе − студыйны, лабараторны, эксперыментальны, аўтарскі. Заснаваны ў 1946 годзе ў БДУ. Назву атрымаў у 1998 годзе разам з пляцоўкай, якая месцілася на балконе актавай залы галоўнага вучэбнага корпуса. У 2019 кіраваць тэатрам запрасілі рэжысера-педагога Андрэя Саўчанку. Разам са студэнтамі БДУ ў тэатры бяруць удзел прафесійныя акторы, мастакі, музыкі, ды іншыя творцы.

Першыя две прэм’еры прадстаўлены на фестывалі Тэатральны куфар 2020 у снежні. Гэта «Азірніся ў гневе» Джона Озбарна і «Баладына» Юльюша Славацкага. У студзені 2021 выйшла яшчэ адна эксперыментальная праца − акторскія імправізацыі «Гаральд». Спектакль нараджаецца ў сам момант стварэння, ў выбары тэмы і акторскага складу ўдзел бярэ глядач.

Самыя смелыя гледачы могуць прыйсьці на рэпетыцыі і самі могуць паспрабаваць існаваць у імправізацыі.


Драма «Пралятаючы над гняздом зязюлі»

Дзе: Цэнтральны, г. Мінск, пр-т Незалежнасці, 13

Калі: з 26 мая

Колькі каштуе: 9 BYN

Кампанія «Иноекино» выпускае ў пракат шэдэўр Мілаша Формана — культавую бунтарскую драму «Пралятаючы над гняздом зязюлі», тым самым святкуючы яе леташняе 45-годдзе. Усе сеансы пройдуць на англійскай мове з рускімі субтытрамі. 26 мая а 19:00 адбудзецца прэм'ера фільма з кинаэкспертам Ігарам Сукманавым.

«Пралятаючы над гняздом зязюлі» — экранізацыя бэстсэлера Кена Кізі, аднаго з галоўных ідэолагаў бітнікаў і хіпі, пра пацыентаў псіхіятрычнай клінікі, індывідуалізме і супрацьстаянні сістэме.

У руках Мілаша Формана, які ўцёк ад чэхаславацкага рэпрэсіўнага рэжыму, раман стаў сапраўднай алегорыяй грамадства, заснаванага на дысцыпліне і ўладзе. Фільм не толькі ідэальна ўпісаўся ў контаркультурны настрой эпохі, але і да гэтага часу застаецца актуальным і універсальным выказваннем аб непадпарадкаванні, самавыяўленні і свабодзе.

Бліскучы акцёрскі ансамбль, у якім саліруюць Джэк Нікалсан і Луіза Флетчар, дух неразважлівасці і незалежнасці, ідэальны баланс трагічнага і камічнага, рэкордныя 5 «Оскараў» у 5 галоўных намінацыях — гэта ўсё пра «Пралятаючы над гняздом зязюлі».

  • У галоўных ролях: Джэк Нікалсан, Луіза Флетчар, Уіл Сэмпсан, Брэд Дурыф, Уільям Рэдфілд.

Экспазіцыя «Туды, на захад!» (Абаянь — Мінск) да 100-годдзя вяртання Якуба Коласа ў БССР

Дзе: Дзяржаўны літаратурна-мемарыяльны музей Якуба Коласа, г. Мінск, вул. Акадэмічная, 5

Калі: 15 мая — 15 чэрвеня

Колькі каштуе: 6 BYN (школьнікі 3 BYN, студэнты — 3,50 BYN)

15 мая 2021 года а 16-й гадзіне ў Дзяржаўным літаратурна-мемарыяльным музеі Якуба Коласа адбудзецца ўрачыстае адкрыццё часовай экспазіцыі да 100-годдзя вяртання паэта ў БССР.

Першая сусветная вайна прымусіла паэта да пераезду ў глыб Расійскай імперыі, дзе ён быў прызваны ў Рускую імператарскую армію.

З верасня 1917 года беларускі пісьменнік жыў у горадзе Абаянь Курскай губерніі і працаваў настаўнікам у вёсках Малыя Крукі, Другі Ліпавец, затым школьным інструктарам.

На пачатку 1921 г. Народны камісарыят асветы Беларускай ССР накіраваў Наркаму асветы РСФСР А. В. Луначарскаму тэлеграму з просьбай вярнуць у Беларусь «школьнага інструктара Канстанціна Міцкевіча (псеўданім — Якуб Колас), аднаго з лепшых беларускіх пісьменнікаў». 15 траўня 1921 г. Я. Колас з сям’ёй пераехаў з Курскай губерніі ў Мінск, дзе яму давялося працаваць старшым выкладчыкам у Беларускім педагагічным тэхнікуме (1922 — 1930 гады) і ў Дзяржаўным беларускім універсітэце дацэнтам кафедры беларускай мовы на педагагічным факультэце.

Поруч з выкладчыцкай і творчай дзейнасцю паэт займаўся і навуковай працай. У 1920-я гады ён працаваў у літаратурна-даследчай камісіі Інстытута беларускай культуры.

Пасля рэарганізацыі Інстытута беларускай культуры ў Беларускую Акадэмію навук Якуб Колас быў зацверджаны правадзейным членам акадэміі, а 26 кастрычніка 1929 года абраны віцэ-прэзідэнтам. На гэтай пасадзе паэт працаваў 28 гадоў, да апошніх дзён жыцця. Актыўная навуковая, грамадская, асветніцкая дзейнасць Якуба Коласа па вяртанні на Бацькаўшчыну, спалучалася з літаратурнай — галоўнай справай жыцця паэта.

На часовай экспазіцыі будуць прадстаўлены матэрыялы аб педагагічнай дзейнасці Якуба Коласа на Куршчыне, у Белпедтэхнікуме, БДУ, настаўніцкіх курсах у Слуцку, навуковай дзейнасці ў Інбелкульце, Акадэміі навук, рукапісы і фотаздымкі пісьменніка, выданні твораў розных гадоў.


Літаратурна-мастацкая экспазіцыя «Фёдар Дастаеўскі. Жыццё і творчасць»

Дзе: Дзяржаўны музей гісторыі беларускай літаратуры, г. Мінск, вул. М. Багдановіча, 13

Калі: 18 мая — 31 кастрычніка

Колькі каштуе: уваход у дзень адкрыцця вольны 

18 мая а 17-й гадзіне Дзяржаўны музей гісторыі беларускай літаратуры запрашае на адкрыццё часовай літаратурна-мастацкай экспазіцыі “Фёдар Дастаеўскі. Жыццё і творчасць”.

Выстава будзе экспанавацца ў межах сумеснага праекта з Літаратурна-мемарыяльным музеем Ф.М. Дастаеўскага (г. Санкт-Пецярбург, Расійская Федэрацыя) да 200-годдзя з дня нараджэння пісьменніка.

Вялікія пісьменнікі застаюцца вялікімі на стагоддзі, нягледзячы на тое, што іх творы напісаны шмат гадоў таму. Іх героі і творы працягваюць жыць, таму што не пакідаюць раўнадушнымі чытачоў новых пакаленняў.

Па-сапраўднаму вялікім і ўніверсальным на ўсе наступныя эпохі пасля свайго жыцця застаецца Фёдар Міхайлавіч Дастаеўскі (1821 — 1881). Веліч яго асобы і спадчыны вылучаецца ў першую чаргу тым, што ў сваёй творчасці ён узняў вечныя філасофскія праблемы быцця чалавека, духоўнасці, веры.

На тэрыторыі Беларусі ёсць вёска Дастоева – гэта вёска Іванаўскага раёна Брэсцкай вобласці. Месца адметнае тым, што раней тут размяшчалася сядзіба Дастаеўскіх, продкаў Фёдара Міхайлавіча Дастаеўскага па мужчынскай лініі. Менавіта ў гэтай вёсцы і бярэ пачатак род Дастаеўскіх. І нават само прозвішча Дастаеўскі паходзіць ад назвы гэтай вёскі. Сам вялікі пісьменнік у гэтай сядзібе і вёсцы ніколі не бываў. У гады яго жыцця сядзіба належала ўжо іншым уладальнікам. Дастаеўскія страцілі яе ўжо ў сярэдзіне ХVІІ стагоддзя. Некаторы час дадзеная сядзіба належала Ордам, сваякам вялікага беларускага культурнага дзеяча – Напалеона Орды. Сёння сядзіба цалкам страчаная. Тым не менш, у памяць пра тое, што менавіта з беларускай вёскі Дастоева паходзіць род Дастаеўскіх, тут усталяваны помнік вялікаму рускаму пісьменніку – Фёдару Міхайлавічу Дастаеўскаму.

На экспазіцыі прадстаўлены: банерная выстава з Літаратурна-мемарыяльнага музея Ф.М. Дастаеўскага (г. Санкт-Пецярбург, Расійская Федэрацыя) пра жыццё і творчасць Ф.М. Дастаеўскага, пераклады твораў пісьменніка на беларускую мову, крытычныя і аналітычныя працы Ф. Дабранравава, А. Доліна і інш. аўтараў па творчасці Ф.М. Дастаеўскага, выданне твораў Фёдара Дастаеўскага канца ХІХ ст. з фондаў Цэнтральнай навуковай бібліятэкі імя Я. Коласа НАН Беларусі.


Выстаўка памяці Алы Непачаловіч «Патаемнае»

Дзе: НЦСМ, г. Мінск, вул. Някрасава, 3

Калі: па 4 ліпеня

Колькі каштуе: 6 BYN (льготны — 3 BYN)

13 мая ў Нацыянальным цэнтры сучасных мастацтваў Рэспублікі Беларусь на Някрасава, 3 адбылося адкрыццё выстаўкі памяці Алы Непачаловіч «Патаемнае». Праект працягвае серыю выставак лаўрэатаў Нацыянальнай прэміі Міністэрства культуры Рэспублікі Беларусь ў галіне выяўленчага мастацтва 2020 года. Куратар выстаўкі — Таісія Халамава.

Ала Іванаўна запомніцца пазітыўным, поўным энэргіі і творчых планаў чалавекам. Заўсёды знаходзілася ў «кветніку» студэнтак і майстрых, на фоне якіх вылучалася сваёй мастацкай графікай на тэкстыле. На працягу жыцця Непачаловіч падрыхтавала 26 лаўрэатаў і дыпламантаў міжнародных і рэспубліканскіх конкурсаў; 9 стыпендыянтаў і ўладальнікаў Спецыяльнай прэміі Спецыяльнага фонду Прэзідэнта Рэспублікі Беларусь па падтрымцы таленавітай моладзі. Разам з сяброўкамі-калегамі Наталляй Сухаверхавай, Аленай Обадавай, Вольгай Рэднікінай была «рухавіком» айчыннага ткацтва і габелена; асобай, вядомай далёка за межамі Беларусі.

Непачаловіч Ала Іванаўна нарадзілася 23 снежня 1951 г. у г. Моніна Маскоўскай вобл., Расія. Скончыла Беларускі тэатральна-мастацкі інстытут (1975), вядучым выкладчыкам яе быў П.В. Масленікаў. Па 1996 год па размеркаванні працавала на Барысаўскім камбінаце прыкладнога мастацтва ў галіне габелена, мастацкага ткацтва і сцэнічнага касцюма.

«Тэкстыльныя кампазіцыі Алы Непачаловіч — гэта вобразна-асацыятыўныя дэкаратыўныя творы, якія з’яўляюцца галоўным накірункам творчасці прафесійнага майстра ткацкага мастацтва. На тэкстыльных палотнах аўтар адлюстроўвае свой асабісты свет. З дапамогай простых формаў і арнаментальных малюнкаў Ала стварае сучасныя вобразныя структуры, у якіх ясна прасочваецца нацыянальны стыль. У іх ёсць выразнасць дакладна прадуманых ліній і зачаравальная таямнічасць паўтаральных арнаментаў. Але ў іх ёсць і уласцівае сучаснаму мастацтву імкненне да лаканічнасці, вобразнаму мінімалізму, выразным кодам і знакам. Вобразы дадзеных дэкаратыўных кампазіцый нараджаюць нечаканыя асацыяцыі. Мастак перадае стан прыроды: плынь вады, звонкае маўчанне цішыні, нябеснае мігаценне святла месяца і зорак. Уражанне ад сапраўды вывераных элементаў арнаменту і іх майстэрскага злучэння, рытму ліній і палос ўзмацняецца вытанчаным каларыстычным рашэннем. У тэкстыльных кампазіцыях Алы Непачаловіч прадэманстраваны своеасаблівы сінтэз ідэі і матэрыялу, арыгінальныя стылістычныя распрацоўкі і наватарскія тэхналагічныя прыёмы, прасочваецца цесная сувязь з нацыянальнымі традыцыям» (Н.В. Шаранговіч).

Лаўрэат ІІ ступені Другой рэспубліканскай трыенале беларускага дэкаратыўна-прыкладнога мастацтва ў намінацыі «Захаванне традыцый» 2013 года; лаўрэат I прэміі конкурса візуальных мастацтваў ART-SESSIO XXIII Міжнароднага фестывалю мастацтваў «Славянский базар в Витебске» у намінацыі «Мастацкі тэкстыль» (2014); лаўрэат ІІ ступені Міжнароднага фестывалю «Мастацкая кераміка», Гжэль, РФ у намінацыі «Дызайн у кераміцы» катэгорыі «Прафесіянал» (2017); лаўрэат ІІ ступені Х юбілейнага міжнароднага фестывалю «Мастацкая кераміка» у намінацыі «Дызайн у кераміцы» катэгорыі «Прафесіянал», Гжэль, РФ (2018).


Выстава Вячаслава Бахметава «Сярэбраны альбом»

Дзе: НЦСМ, г. Мінск, вул. Някрасава, 3

Калі: па 4 ліпеня

Колькі каштуе: 6 BYN (3 BYN — льготны)

7 мая а 18:30 у Нацыянальным цэнтры сучасных мастацтваў Рэспублікі Беларусь (вул. Някрасава, 3) адкрываецца выстава Вячаслава Бахметава «Сярэбраны альбом». Глядач убачыць больш за два дзясяткі работ аўтара. «Сярэбраны альбом» — альбом маіх амбратыпаў за два гады. Гэта блізкія мне людзі, рэчы, думкі і адчуванні — мая сям’я, сябры і дом».

Па словах фатографа, прадстаўленыя творы — своеасаблівая рэфлексія да сямейных аматарскіх альбомаў фатаграфій, якія захоўваюцца ў многіх дамах і якія людзі пераглядаюць, калі збіраюцца разам падчас святаў. «Цяпер усе глядзяць у камп’ютар і тэлефоны. Хочацца, каб традыцыя рабіць сямейныя партрэты родных і проста друкаваць фотаздымкі захавалася. Такая тэхніка атрымання выяў, як амбратыпія, адсылае нас да вытокаў з’яўлення фатаграфіі і дазваляе атрымліваць унікальныя дамашнія рэліквіі».

Амбратыпія (ад старажытнагрэч. Ἀνβροτός — «бессмяротны» і τύπος — «адбітак») — варыянт мокракаладыённага працэсу, які быў вынайдзены ў сярэдзіне 1850-х гг. У выніку гэтага працэсу атрымліваецца пазітыўная выява на шкляной пласціне, зафарбаванай з аднаго боку чорнай фарбай. Працэс гэты дарагі і працяглы па часе. З прылад, акрамя фотаапарата, патрэбныя шкло, лак, посуд і рэактывы. Усе дзеянні выконваюцца за 10-15 хвілін да высыхання калодыю.

Вячаслаў Бахметаў — фатограф з Гомеля, сябра Беларускага грамадскага аб’яднання фатографаў, уваходзіць у секцыю аналагавай фатаграфіі, секцыю трэвэл-фатографаў. Займаецца альтэрнатыўнымі фатаграфічнымі працэсамі: цыянатыпіяй, гуміалейным і гумбіхраматным друкам, алейным друкам.

Куратарка праекта — Алена Данброва.

Выстава Вячаслава Бахметава «Сярэбраны альбом» працуе да 4 ліпеня 2021 года.


Выстава-атракцыён па матывах мультфільмаў Алы Мацюшэўскай

Дзе: Музей гісторыі беларускага кіно, г. Мінск, вул. Свярдлова, 4

Калі: па 1 жніўня

У выставачнай зале Музея гісторыі беларускага кіно — філіяла Нацыянальнага гістарычнага музея Рэспублікі Беларусь — у рамках святкавання 50-годдзя беларускага анімацыйнага кіно адкрылася выстава-атракцыён па матывах творчасці ветэрана беларускай анімацыі, мастака і рэжысёра Алы Мацюшэўскай.

Панараму беларускай анімацыі нельга ўявіць без самабытнага і ўнікальнага таленту мастака-пастаноўшчыка Алы Мацюшэўскай. Гэтаму майстру падуладна ўсё — і стылістыка дзіцячага малюнка ў стужцы «Лыжка для салдата», і глыбокае пранікненне ў візуальнае мысленне Марка Шагала ў карціне «Марк Шагал. Пачатак», і тонкае адчуванне эпохі Адраджэння ў фільме «Дантэ. Беатрычэ». Майстэрства Мацюшэўскай надае нашай анімацыі дыханне высокай выяўленчай культуры і нясе выразнае пачуццё стылю.

На выставе прадстаўлены аўтарскія эскізы Алы Мацюшэўскай, якія сталі асновай фаноў і вобразаў герояў амаль двух дзясяткаў мультфільмаў Студыі анімацыйных фільмаў Нацыянальнай кінастудыі «Беларусьфільм» і якія адлюстроўваюць творчы пошук аўтара, асноўныя этапы яго працы — раскадроўка (выяўленчы канспект будучага фільма), падрыхтоўчыя і стылявыя эскізы і, нарэшце, кадры з гатовых фільмаў, многія з якіх, дарэчы, адзначаны прызамі міжнародных кінафестываляў менавіта за выяўленчае рашэнне.

Арганічна дапаўняе і ўзбагачае экспазіцыю серыя гульнявых атракцыёнаў (аптычных ілюзій) на аснове кадраў і персанажаў прадстаўленых фільмаў, а таксама тэматычныя інсталяцыі і фотазона.

Пазнаёміць наведвальнікаў з багатым і шматгранным мастацкім светам Алы Мацюшэўскай, перадаць ім адчуванне святла, цяпла і радасці, якія пранізваюць яе творчасць, — так можна сфармуляваць звышзадачу ўсіх элементаў арыгінальна аформленага выставачнага праекта «Час — хуткая рака...».

На працягу працы выставы яе прадметная экспазіцыя будзе дапаўняцца экраннай — рэтраспектывай лепшых мультфільмаў Алы Мацюшэўскай.


Ноч музеяў 2021

Дзе: Музей «Лошыцкая сядзіба», г. Мінск, праезд Чыжэўскіх 8/2, 10

Калі: 22 мая

22 мая 2021 года філіял Музея гісторыі горада Мінска — музей «Лошыцкая сядзіба» — з 18:00 да 23:00 запрашае прыняць удзел у «Літаратурна-музычным лабірынце ў Лошыцкай сядзібе». Праграма распрацавана ў рамках міжнароднай акцыі «Ноч музеяў-2021».

***

Дзеянне пачынаецца ў сядзібе Яўстафія Любанскага ў Лошыцы ў 1905 годзе... Праз 115 гадоў працягваецца ў музеі «Лошыцкая сядзіба» ...

У ПРАГРАМЕ:

18:00 — 19:30

Музычная праграма «Зачараванне майскіх вечароў».

Музыка еўрапейскіх кампазітараў XIX — XX стст. у выкананні выкладчыкаў і навучэнцаў Мінскага дзяржаўнага музычнага каледжа імя. М.І.Глінкі.

18:00 — 23:00

Выстава «Паркавая, 10». Штодзённасць жыхароў Лошыцы 1950-1980-х гг.

Будынак прысядзібнага флігеля пабудаваны ў 1890-я гг. з дрэва ў стылі мадэрн і знаходзіцца ў гістарычнай часткі Лошыцкага сядзібна-паркавага комплексу ў баку ад сядзібнага дома на высокім левым беразе Свіслачы.

У савецкі час флігель ператварыўся ў шматкватэрны жылы дом для сем’яў з вёскі Лошыца ​​1-ая Мінскага раёна. Як магла выглядаць кватэра жыхароў, Вы даведаецеся на выставе «Паркавая, 10».

20.00 — 22.00

Літаратурна-музычная праграма «Пекла Персіярні ды Лошыцкай сядзібы».

Паэзія і музыка сучасных беларускіх пісьменнікаў і музыкаў у выкананні мінскага літаратурна-музычнага аб’яднання «Галактыка», кіраўнік Кацярына Мяшкова, журналіст, пісьменнік.

18.00 — 22.30

Квэст «Гастранамічны дэтэктыў»

1905. Лошыцкая сядзіба, размешчаная непадалёк ад губернскага Мінска, служыла не толькі сямейным гняздом, але і месцам прыёму шматлікіх гасцей. Яўстафій Любанскі быў вядомым гурманам, і па ўсёй Мінскай губерні абмяркоўвалі прыёмы ў Лошыцы. Адзін з дэсертаў — цэлыя персікі ў марозіве, костачкі у якіх замянялі на масу з арэхаў і міндаля — доўга не маглі забыцца ў дваранскіх дамах губернскага Мінска. Шэф-повар Любанскіх Бернас у таямніцы трымаў кулінарныя сакрэты, нікому не раскрываў якія-небудзь глыбока схаваныя дэталі, якія надавалі стравам асаблівы смак або знешні выгляд. Аднойчы рэцэпт знік, шэф-повар Любанскіх Бернас быў у паніцы…

2021. Удзельнікам квэста «Гастранамічны дэтэктыў» неабходна крок за крокам, разгадваючы шарады і галаваломкі, успамінаючы крыптаграмы Жуля Верна і шыфр «Пляшучых чалавечкаў» Конан Дойля дапамагчы раскрыць гастранамічнае злачынства 115- гадовай даўніны і аднавіць страчаны рэцэпт.

22.30 — 23.00

Падвядзенне вынікаў, уручэнне падарункаў.


Ноч музеяў — 2021. Кропка адліку

Дзе: Літаратурны музей Максіма Багдановіча, г. Мінск, вул. М. Багдановіча, в. 7а

Калі: 22 мая

Колькі каштуе: 10 BYN

Кожная вялікая з’ява з нечага пачынаецца, мае сваю кропку адліку. Жыццё — з дня нараджэння. Музей — з першага супрацоўніка і экспаната. Беларускасць — з таго магічнага слова, якое мы пачулі ў дзяцінстве, а ў сталым жыцці яно адгукнулася нечым важным для нас. Гэта здарылася і з Максімам Багдановічам, калі ён, жывучы ў Расіі, адчуў сябе Беларусам.

Сёлета Максіму спаўняецца 130, а музею 40 гадоў. На «Ноч музеяў»  вы заглыбіцеся ў гісторыю і паспрабуеце разабрацца, з чаго ўсё пачыналася.

18.00 — 20.00 Музейны квіз «Загадка Багдановіча» — рэгістрацыя

19.00 — 19.30 Фрагмент спектакля «Палёты ўдваіх» (Тэатр юнага гледача)

19.30 — 20.30 Лінгвістычныя двубоі

20.00 — 21.00 Экскурсія па юбілейнай выставе «40/40»

20.30 — 22.00 Прэзентацыі паэтычных кніжак

21.00 — 22.00 Музычна-візуальнае шоў ад гурта «Lumiere Tales» і тэатра Дом Сонца https://vk.com/lumieretales

22.00 — 22.30 Дыяфільмавая рэтра-лекцыя

● Беларускія настольныя гульні

● Касмічная фотазона і квэсты...

Чым не нагода правесці гэтую музейную ноч у кампаніі Максіма Багдановіча? Можа, гэта сустрэча таксама стане кропкай адліку нечага новага?..


(Не) Ноч у музеі

Дзе: Дзяржаўны музей гісторыі беларускай літаратуры, вул. М. Багдановіча, 13

Калі: 22 мая

Колькі каштуе: 3 BYN

Зберагаючы мінулае, крочым у будучыню! Пад такім дэвізам працуе і развіваецца Дзяржаўны музей гісторыі беларускай літаратуры. Музей, які аб’ядноўвае ўсіх беларускіх пісьменнікаў, захоўвае літаратурныя артэфакты. Літаратурны музей сёння — гэта пляцоўка для творчасці, гульні і развіцця. Літаратурны музей збірае, захоўвае (больш за 60 000 музейных прадметаў) і экспануе (больш за 1000 арыгінальных прадметаў штогод). Кожная літаратурная выстава — сапраўдная падзея, бо яна дае магчымасць спазнаць свет беларускіх аўтараў, іх герояў і таямніцы беларускага характару.

У гэты цудоўны вечар/(не)ноч вы зможаце павандраваць у прасторы і часе па дзеючых экспазіцыях музея пад дэвізам «22 за 3» — паўдзельнічайце ў 22 музейных актыўнасцях усяго за 3 рублі. За адзін вечар вы пазнаёміцеся з 7 экспазіцыямі і прыміце ўдзел у спецыяльных музейных праграмах, па выніках якіх атрымаеце падарункі. Адмыслова створаная фотазона, флэшмоб «Вясёлкін у #літмузеі» дапаможа зафіксаваць гэты дзень у памятных фотаздымках і знайсці новых сяброў у сацыяльных сетках.

Вас чакае музычна-паэтычная праграма, квэст «Таямніцы літаратурнага», гульні, спаборніцтвы, занятак «Зрабі кнігу сваімі рукамі» і шмат іншага.

Хапайце добры настрой і да сустрэчы 22 мая ў 18.00 у Дзяржаўным музеі гісторыі беларускай літаратуры па адрасе вул. М. Багдановіча, 13.

Калі ў вас засталіся пытанні, звярніцеся да нас па тэлефонах: (017) 363-56-21, (017) 395-44-47.

МУЗЫЧНА-ПАЭТЫЧНАЯ ПРАГРАМА

18:00 — 18:30 Урачыстае адкрыццё акцыі «(Не) ноч у музеі». Выступленне вучняў Рэспубліканскай гімназіі-каледжа пры Беларускай дзяржаўнай акадэміі музыкі. Лакацыя: вестыбюль.

21:30 Канцэртная праграма «Ад слова жывога пачатак...». Народны літаратурны тэатр «Жывое слова». Лакацыя: Лекцыйная зала. Экспазіцыя «Ад палескіх імхоў да асвейскіх крыніц...»

Квэст «Таямніцы літаратурнага». Лакацыя: усе экспазіцыйныя залы музея.

Павандруеце па літаратурна-музейнай краіне і разгадаеце ўсе сакрэты, што музей падрыхтаваў для вас. Наведаўшы ўсе экспазіцыі і адказаўшы на ўсе пытанні вы атрымаеце купон акцыі «Хадзем у музей!», які дае зніжку 50% на наведванне мінскіх філіялаў Дзяржаўнага музея гісторыі беларускай літаратуры. Прыходзьце і праверце сваю кемлівасць і ўважлівасць.

АКТЫЎНАСЦІ ПА ЭКСПАЗІЦЫЯХ:

Гульня хадзілка «Звязка беларускіх казак». Лакацыя: Экспазіцыйная зала, 1 паверх. Экспазіцыя «Мова хаты».

Дзве каманды «Дабро» і «Зло» паспаборнічаюць у веданні беларускіх народных казак:"Зайкава хатка«, «Піліпка-сынок», «Залаты птах», «Пшанічны каласок», «Музыка-чарадзей», «Каток — залаты лабок», «Лёгкі хлеб», «Ганарыстая варона», «Сынок з кулачок», «Жаронцы», «Як кот звяроў напалохаў», «Як курачка пеўніка ратавала». Даведаецеся пра тое, як жылі нашыя продкі і ў якія гульні яны гулялі.

Прадугледжаны прагляд «чытанак-ліставанак» па беларускіх народных казках з запісаў Міхаіла Афанасьева «Шчасце і Няшчасце» і «Залатая шарсцінка».

Акцыя «Дастаеўскія раскраскі». Лакацыя: Экспазіцыйная зала № 4. Міжнародная экспазіцыя"Фёдар Дастаеўскі. Жыццё і творчасць«.

Свет Дастаеўскага звычайна ўспрымаецца ў прыглушаных, змрочных шэра-карычневых танах, але на самой справе ў творах Дастаеўскага пануе шмат красак. Яго Пецярбург не заўсёды пахмурны, яго героі апрануты ў касцюмы, якія адпавядаюць таму часу і, адпаведна, модзе, яны часта яркія і рознакаляровыя. Паспрабуйце самі ў гэтым пераканацца, расфарбоўваючы касцюмы пісьменніка і яго персанажаў паводле цытат з твораў Фёдара Міхайлавіча.

Інтэрактыўная праграма «Азбука Васі Вясёлкіна». Флэшмоб «Вясёлкін у #літмузеі». Лакацыя: Экспазіцыйная зала № 7. «Васіль Вітка. „Вясёлкі“ вітаю прылёт».

У аснову інтэрактыўнай праграмы пакладзены аднайменны твор класіка беларускай дзіцячай літаратуры Васіля Віткі. Разам з Васем Вясёлкіным праверым наколькі ўважлівымі вы былі на ўроках беларускай мовы і літаратуры. Не пужайцеся, адзнакі ставіць не будем! Наведвальнікі з дзеткамі атрымаюць у падарунак часопісы «Вясёлка» і «Буся».

Прыміце ўдзел у флэшмобе «Вясёлкін у #літмузеі».

Умовы:

  • падпішыцеся на нас у сацыяльных сетках;
  • зрабіце здымак з Васем Вясёлкіным;
  • падзяліцеся ім на сваёй старонцы ў сацыяльных сетках;
  • не забудзьцеся адзначыць @bellitmuseum;
  • пазначце хэштэг #літмузей;
  • атрымайце прыз.

Экскурс «Васіль Быкаў. Справа аўтамабільная». Лакацыя: «Зала № 8. Пастаянная экспазіцыя «Беларуская літаратура. 50-70-я гг. ХХ стагоддзя».

Вы даведаецеся пра народнага пісьменніка Беларусі яшчэ як пра мастака, пра апантанага аўтамабіліста, вандроўніка і чалавека з добрым пачуццём гумару і самаіроніяй. Самыя ўважлівыя слухачы атрымаюць падарунак — стыкерпак «Аўтамабіліст-вандроўнік Быкаў». Групы будуць фарміравацца кожных 30 хвілін.

Занятак «Зрабі кнігу сваімі рукамі». Лакацыя: Экспазіцыйная зала № 9. Пастаянная экспазіцыя «Беларуская літаратура. 80-90-я гг. ХХ стагоддзя».

Разам з незвычайным жыхаром музея — Мусеёнам — вы пазнаёміцеся з правіламі паводзін у музеі, з яго структурай, даведаецеся, які прадмет лічыцца экспанатам, як прадметы аб’ядноўваюцца ў калекцыі, а пасля зробіце самы папулярны экспанат літаратурнага музея — кнігу, якую аздобіце сваім фотаздымкам, выкананым у музейных інтэр’ерах.


Ноч музеяў – 2021: Гістарычны калапс

Дзе: Літаратурны музей Петруся Броўкі, г. Мінск, вул. К.Маркса, 30, кв. 4

Калі: 22 мая

Колькі каштуе: 7 BYN

Свет ніколі не будзе ранейшым...

Здаецца, што прадчуванні нечага нявытлумачана жахлівага і назаўсёднага лётаюць у паветры... Згодныя з гэтым? А акадэмік Мікалай Нікольскі (знакаміты сусед Петруся Броўкі, якому ўпершыню адкрыта выстава ў нашым музеі), пэўна, не пагадзіўся б. Бо гісторыя, якой ён прысвяціў сваё жыццё, сцвярджае, што ад часоў старажытнага Вавілону і да сучаснасці свет няспынна, няўрымсліва змяняўся. І, як паказвае практыка, развіццё, рух, і нават разбурэнне звычайна з’яўляюцца пачаткамі для лепшага.

Таму захоўвайце спакой і прыходзьце 22 мая з 18:00 да 23:00 у Літаратурны музей Петруся Броўкі на «Ноч музеяў — 2021: Гістарычны калапс», каб зірнуць на наш свет вачыма непрадузятага гісторыка! Здабыткі разумнейшых цывілізацый Месапатаміі, мудрасць Рымскай імперыі, міфалогія Кітая, фальклор Беларусі будуць вашымі праваднікамі ў свет навуковага мыслення. Безумоўна, у самай загадкавай і захапляльнай форме.

ПРАГРАМА:

18:00 — Лекцыя «Становішча Элеўсінскіх містэрый у Рымскай імперыі ў I-V стст. н.э.» (Аляксандр Бадылевіч, магістр гістарычных навук).

Вы даведаецеся аб містычных культах антычнасці, у прыватнасці, кульце пакланення Персефоне. Як з’явіўся культ, што ўвайшло ў яго рытуальную практыку, як склаўся лёс прыхільнікаў культа пасля таго, як грэчаскія полісы ўвайшлі ў склад Рымскай імперыі, якое месца яны занялі ў рымскім грамадстве і рымскай уладзе, а таксама як зніклі Элеўсінскія містэрыі на сыходзе Рымскай імперыі.

19:30 — «Проста аб складаным: (не)канферэнцыя аб гісторыі старажытнаўсходніх грамадстваў».

Discussio mater veritas est — у дыскусіі нараждаецца ісціна. Спецыяльна запрошаныя гісторыкі Ілля Лапушанскі і Віктар Дзядкоў публічна падыскутуюць пра гісторыю старажытнаўсходніх цывілізацый. Станьце ўдзельнікам навукова-папулярнай (не)канферэнцыі.

21:30 — Лекцыя «Шыфраваныя пачуцці ў беларускіх народных песнях» (Марына Дубень, салістка фальклорна-этнаграфічнага ансамблю «Багач»).

Беларускі фальклор — адзін з напрамкаў навукі, які цікавіў акадэміка Нікольскага. Але ці ўсё так проста і зразумела з нашымі народнымі спевамі? Часам, нашыя продкі праз песні выказвалі ўсё тое, што нельга было казаць наўпрост. Марына Дубень распавядзе, як беларусы шыфравалі ў народных песнях самыя салодкія фантазіі і сараматную палкасць.

А ТАКСАМА:

«Прадказанні будучыні ў старажытным Вавілоне».

У старажытным Вавілоне практыкаваліся розныя спосабы варажбы і прадказання будучыні. Некаторыя з іх будуць зразумелымі для сучасніка. Такія, як тлумачэнне сноў, астралагічныя прадказанні. Але нешта можа падацца і жахлівым. Напрыклад, варажба на вантробах жывёл.

Менавіта у Вавілоне з’явілася першая вядомая калода для варажбы — Зікурат. Гэта былі невялічкія гліняныя таблічкі з клінапіснымі подпісамі і малюнкамі, кожны з якіх меў сваю сімволіку.

У Ноч музеяў кожны жадаючы зможа зірнуць у таямніцы сваёй будучыні пры дапамозе больш сучаснага аналага Зікурата — карт Таро.

«Гукі старажытнасці, ці Як бы вы гучалі на шумерскай мове».

Шумерская мова — адна з мёртвых моў, аднак па часе свайго жыцця яна пераўзыходзіць многія сучасныя еўрапейскія мовы. З’явіўшыся ў 3000 годзе да н.э., яна праслужыла сродкам камунікацыі для народаў Усходу аж да І ст. да н.э. Падчас Ночы музеяў мы пазнаёмім вас з гісторыяй фарміравання шумерскай мовы і з тым, як яна была структаравана, дапаможам вам скласці сваё імя на гэтай старажытнай мове.

Чэлендж «Як прыручыць дракона».

Драконы — фантастычныя істоты, якія ва ўсе часы вабілі чалавечую фантазію. У кітайскай культуры драконы з’яўляюцца сімвалам добрага пачатку — Ян. Падчас Ночы музеяў усім жадаючым прапануецца паглыбіцца ў старажытнакітайскае прыкладное мастацтва арыгамі і скласці дракона ўсяго толькі з ліста паперы. Задача не з простых, таму першы, хто ўступіць у схватку з лістом паперы і з гонарам паставіць на стол пераможаную пачвару, атрымае спецыяльны прыз — памятную цішотку ад нашага музея.

Настольная гульня «Растлумач мне, калі ласка!»

Колькі сінонімаў ці асацыяцый вам трэба, каб ваш сябар зразумеў і вымавіў у адказ: «Гэта аловак»? А колькі слоў вы можаце такім чынам растлумачыць за хвіліну? Падчас Ночы музеяў усе жадаючыя атрымаюць магчамасць весела і цікава праверыць сваю эрудыцыю і папрактыкаваць беларускую мову ў настольнай гульні «Растлумач мне, калі ласка!». Вам спатрэбіцца ўменне тлумачыць словы з дапамогай добрага настрою, а таксама сінонімаў, антонімаў, намёкаў, гукаў, рухаў. Колькасць гульцоў неабмежаваная!

Квэст «Пасланні продкаў».

У Ноч музеяў прыходзьце ў музей і станьце сапраўдным шукальнікам скарбаў! Як самастойна, так і разам з сябрамі вы зможаце пазнаёміцца з рознымі тыпамі пісьменнасці нашых далёкіх продкаў, вывучыць схованкі, разгадаць шыфры і нават — атрымаць бессмяротнасць. Але памятайце — за кожным няправільным крокам назіраюць і таму трэба быць пільнымі — каб разгадаць пасланні продкаў...

Час праходжання — 30 хвілін.


«Музейная ноч-2021»

Дзе: Дзяржаўны літаратурна-мемарыяльны музей Якуба Коласа, г. Мінск, вул. Акадэмічная, 5

Калі: 22 мая

22 мая 2021 года Дзяржаўны літаратурна-мемарыяльны музей Якуба Коласа далучаецца да міжнароднай акцыі «Ноч музеяў» з насычанай праграмай «Адзін на адзін з паэтам».

Музей народнага паэта — адметная нацыянальная культурная прастора ў сталіцы, дзе захоўваецца непаўторная аўра святла і добразычлівасці беларускага песняра. Гэтым разам госці Дома Коласа змогуць здзейсніць займальнае падарожжа па інтэрактыўных пляцоўках і нібы паразмаўляць з паэтам пра жыццё, творчасць, гісторыю, музыку…

Падчас гутаркі «…пра творчасць…» можна будзе паспрабаваць сябе ў  разнастайных майстар-класах па вырабу паштовак у тэхніцы «квілінг», сілуэтнаму выразанню і роспісу экаторбы, далучыцца да лялечнага прадстаўлення па матывах беларускіх народных казак, паспяваць беларускія народныя песні, патанчыць пад вясёлую музыку, пазнаёміцца і пагутарыць з ажыўшымі героямі Коласавых твораў.

Размова «…пра гісторыю…» — своеасаблівы экскурс у ваенную гісторыю XVII ст., дэманстрацыя прыёмаў шабельнага бою, пікінерскага бою, правіл стральбы з фіцільнага мушкета, майстар-класы вайсковых прыёмаў. Акрамя таго, толькі на адну гадзіну наведвальнікам Дома Коласа будуць прадстаўлены некалькі загадкавых куфэркаў з асабістых рэчаў Якуба Коласа, якія маюць сваю гісторыю і таямніцы і яшчэ ніколі не дэманстраваліся наведвальнікам.

Не абыйдзецца і без разваг «…пра жыццё…». Для аматараў настольных гульняў адбудзецца прэзентацыя першай музейнай настолкі «Жыццё па Коласу».

Размова «…пра сучаснасць…» — выступленні беларускіх бардаў Зміцера Бартосіка і Віктара Шалкевіча, гурта «The Аpples», разнастайныя фотазоны і захапляючы квэст па мемарыяльнай экспазіцыі і сядзібе музея.

Падрабязней праграму чытайце па спасылцы

Выбар рэдакцыі

Грамадства

Водар лаванды вабіць на Веткаўшчыну

Водар лаванды вабіць на Веткаўшчыну

Як выглядае «беларускі Праванс», дакладна ведаюць жыхары глыбінкі Гомельскай вобласці.

Эканоміка

«Прадам утульную кватэру, а куплю яшчэ лепшую». А пра падаткі вы не забыліся?

«Прадам утульную кватэру, а куплю яшчэ лепшую». А пра падаткі вы не забыліся?

Адна мая добрая знаёмая вырашыла палепшыць свае жыллёвыя ўмовы — прадаць сваю двухпакаёвую кватэру і купіць трохпакаёвую.

Калейдаскоп

Усходні гараскоп на наступны тыдзень

Усходні гараскоп на наступны тыдзень

БЛІЗНЯТЫ. Калі ёсць цікавыя ідэі, то менавіта цяпер яны будуць запатрабаваныя і нарэшце ажыццёвяцца. Тыдзень прынясе знаёмствы з новымі людзьмі, спатканні, вандроўкі і шмат яркіх уражанняў. Асабістае жыццё рэзка зменіцца, прычым менавіта так, як вы марылі. Вы больш не будзеце самотныя, сітуацыя вырашыцца на вашу карысць.

Грамадства

Ці варта засцерагацца ад вяртання анамальнай спякоты? Дзмітрый Рабаў расказаў пра надвор’е на астатнюю частку лета

Ці варта засцерагацца ад вяртання анамальнай спякоты? Дзмітрый Рабаў расказаў пра надвор’е на астатнюю частку лета

«Верхавіна лета» прайшла, і ўжо мала хто памятае, што першая дэкада чэрвеня была халаднаватай і з замаразкамі.