Прэм’ер-міністр Беларусі прыбыў з рабочым візітам ва Уфу

Прэм’ер-міністр Беларусі Раман Галоўчанка прыбыў з рабочым візітам ва Уфу (Расійская Федэрацыя), паведамляе БелТА.

Праграмай візіту прадугледжаны ўдзел у міжнародным кангрэсе «Транспарт і будаўніцтва», наведванне буйнейшых прадпрыемстваў Башкортастана, перагаворы з кіраўніцтвам рэспублік, а таксама шэраг бізнес-сустрэч, па выніках якіх бакі маюць намер падпісаць дакументы аб супрацоўніцтве.

Як паведамілі ў прэс-службе ўрада, ва Уфе адбудзецца адкрыццё дылерскага цэнтра па продажы грузавой тэхнікі ААТ «Мінскі аўтамабільны завод» і «ДАРЭЛЕКТРАМАШ». Таксама ў сталіцы Башкортастана ў рамках візіту беларускай дэлегацыі адбудзецца цырымонія закладкі капсулы будаўніцтва завода па вытворчасці машын і абсталявання для пасляўборачнай апрацоўкі збожжа ААТ «АМКАДОР».

Як паведамлялася раней, урадавая дэлегацыя Беларусі на чале з прэм’ер-міністрам наведае Уфу і Казань з 20 па 22 верасня. У склад беларускай дэлегацыі ўвайшлі прадстаўнікі розных міністэрстваў і ведамстваў, кіраўнікі такіх беларускіх прадпрыемстваў, як «МТЗ», «МАЗ», «Белкамунмаш», «АМКАДОР» і «Гарызонт».

Тавараабарот Беларусі з Башкортастанам у студзені — ліпені склаў $214,9 млн, экспарт — $90,9 млн. У структуры беларускага экспарту пераважаюць пастаўкі пліт, лістоў, плёнкі для пластмас, аміна-альдэгідных, фенолаальдэгідных смол і поліўрэтанаў, халадзільнікаў, маразільнікаў і халадзільнага абсталявання, шкловалакна і вырабаў з яго, грузавых аўтамабіляў, драўняна-валакністых пліт, сыроў і тварагу. У Беларусь з Башкортастана імпартуюцца кіслоты полікарбонавыя і іх вытворныя, палімеры вінілхларыду, карбанаты, гідраксіды і пераксіды натрыю і калію.

Прэв’ю: БелТА