Адкрыццё і інтэрактыўныя пляцоўкі дня моладзі, выставы, спектаклі, канцэрты і першы конкурсны дзень песеннага спаборніцтва маладых выканаўцаў чакаюць сёння ўдзельнікаў і гасцей «Славянскага базару ў Віцебску», паведамляе БелТА.
Актыўна і весела сустрэне моладзь сваё свята ў фестывальным Віцебску. Стартуе Дзень моладзі з патрыятычнай акцыі, якая збярэ прадстаўнікоў гэтай узроставай катэгорыі з усёй вобласці. Удзельнікі ўскладуць кветкі да манумента на плошчы Перамогі і пройдуць шэсцем да сцэнічнай пляцоўкі каля канцэртнай залы «Віцебск», дзе ў 11.30 адбудзецца ўрачыстае адкрыццё свята. Больш за 700 пачынаючых артыстаў запаляць фестываль-конкурс творчасці «Агонь маладзёжных талентаў». Падтрымаць свайго канкурсанта можна на пляцоўцы каля Віцебскага дзяржаўнага ўніверсітэта імя П.М. Машэрава. У Футбольным манежы ў 13.30 рэспубліканскі медыяфорум збярэ каля 600 маладых людзей, дзе ўдзельнікі са спікерамі абмяркуюць, як у Беларусі рэалізуецца маладзёжная палітыка. Адукацыйныя мерапрыемствы, майстар-класы, адкрыццё іміджавага прыпынку грамадскага транспарту таксама чакаюць актыўных і крэатыўных на розных пляцоўках горада. Завершыцца Дзень моладзі гала-канцэртам з удзелам лепшых творчых калектываў і выканаўцаў, які пройдзе на той жа пляцоўцы ля КЗ «Віцебск» у 20.30.
Фестываль мастацтваў працягне здзіўляць і радаваць гасцей Віцебска. Аўтааматары ацэняць аўтаматафестываль Hot Weekend, дзе пройдуць спаборніцтвы па аўтагуку і выстава цюнінгаваных машын. Наведаць гэтае мерапрыемства можна ў комплексе культурна-масавага адпачынку імя Савецкай Арміі ў Мазурына.
Моцныя духам і целам зладзяць матчавую сустрэчу па боксе. Зборныя Беларусі і Расіі пазмагаюцца на пляцоўцы каля Летняга амфітэатра ў 11.00. У гэты ж час адбудзецца прэс-канферэнцыя ўдзельнікаў «Лялечнага квартала», трансляцыю якой будуць у прамым эфіры весці з міжнароднага прэс-цэнтра.
У 12.00 у Свята-Успенскім кафедральным саборы пройдзе свята харавой музыкі «Славянскі Дабравест».
У 13.00 у Беларускім тэатры «Лялька» прадстаўленне пакажа Мурманскі абласны тэатр лялек. Яны прывезлі на фестываль інтэрактыўны спектакль «Чырвоная Шапачка».
У 14.00 у музеі-сядзібе Іллі Рэпіна ў Здраўнёве прэзентуюць выставу «Дзве сядзібы».
Канцэрт харэаграфічнага мастацтва «Танца натхненне» ў 18.00 пройдзе ў КЗ «Віцебск». Гэта яшчэ адзін буйны праект дзён Саюзнай дзяржавы на «Славянскім базары». А ў Віцебскай абласной філармоніі ў той жа час адбудзецца выступленне Barcelona Guitar Trio and Dance.
Яркай і незабыўнай падзеяй фестывальнага дня стане першы тур XXXII Міжнароднага конкурсу выканаўцаў эстраднай песні «Віцебск». У першым аддзяленні ўдзельнікі выканаюць славянскі хіт, а ў другім увагай публікі завалодае непараўнальная Ірына Дарафеева і госці яе канцэртнай праграмы.
Тэатральныя сустрэчы, гутаркі з зоркамі, фэст вулічнага мастацтва «На сямі вятрах», кірмашы, горад майстроў і шмат цікавых лакацый таксама чакаюць сёння гасцей фестывальнай сталіцы.
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.