Больш як 80 вышэйшых навучальных устаноў з дзвюх краін аб’яднала кітайска-беларуская Асацыяцыя ўніверсітэтаў. Пагадненне аб яе стварэнні было падпісана ў Мінску ў рамках І форуму рэктараў устаноў вышэйшай адукацыі Беларусі і КНР.
На базе Нацыянальнай бібліятэкі Беларусі прайшло пленарнае пасяджэнне форуму. З прывітальным словам перад яго ўдзельнікамі выступілі Надзвычайны і Паўнамоцны Пасол Кітайскай Народнай Рэспублікі ў Рэспубліцы Беларусь Се Сяаюн і першы намеснік міністра адукацыі Рэспублікі Беларусь Аляксандр Бахановіч.
— Высокі ўзровень даверу паміж нашымі краінамі выліваецца ў канкрэтныя вынікі супрацоўніцтва у сферы адукацыі, асабліва ў вышэйшай адукацыі, — падкрэсліў у сваім выступленні Се Сяаюн. — Колькасць студэнтаў, якія едуць з Кітая ў Беларусь, пастаянна расце. У дадзены момант яна перавысіла ўжо 7 тысяч чалавек. Беларусь стала другой па папулярнасці краінай, дзе кітайскія студэнты хочуць вывучаць рускую мову.
Вывучэнне кітайскай мовы становіцца асабліва папулярным сярод беларусаў. У 35 школах і 11 універсітэтах кітайскую мову выкладаюць як вучэбную дысцыпліну, і ў 38 установах адукацыі яе выкладаюць у якасці факультатыўнай дысцыпліны Таксама кітайская мова з’яўляецца экзаменацыйнай дысцыплінай пры паступленні ў беларускія ўніверсітэты.
Пасол Кітайскай Народнай Рэспублікі ў Рэспубліцы Беларусь заўважыў, што ўсё больш кітайскіх студэнтаў жадаюць вывучаць мову сяброўскай да нас краіны, знаёміцца з яе культурай. «Дзякуючы стварэнню асацыяцыі, мы зможам канцэнтраваць нашы сілы, — лічыць Се Сяаюн. — У нас ёсць усе падставы верыць, што створаная асацыяцыя стане ўвасабленнем культурнага супрацоўніцтва. Мы спадзяёмся, што вышэйшыя навучальныя ўстановы і работнікі адукацыі дзвюх краін будуць разглядаць асацыяцыю як магчымасць для разгортвання больш глыбокага супрацоўніцтва ў такіх сферах, як культурны абмен, сумесная падрыхтоўка спецыялістаў, правядзенне сумесных даследаванняў. Дзякуючы асацыяцыі мы працягнем пісаць нашу слаўную гісторыю кітайска-беларускіх адносін і супрацоўніцтва ў сферы адукацыі».
Першы намеснік міністра адукацыі Аляксандр Бахановіч праінфармаваў удзельнікаў сустрэчы аб канкрэтных выніках кітайска-беларускага супрацоўніцтва ў сферы адукацыі.
На сёння паміж установамі адукацыі Рэспублікі Беларусь і Кітайскай Народнай Рэспублікі падпісана больш за 560 прамых дагавораў аб супрацоўніцтве, пры гэтым больш як 100 з іх падпісаны за апошнія два гады. У рамках гэтых дагавораў рэалізоўваюцца двухбаковыя навуковыя і адукацыйныя праекты, акадэмічныя абмены, ствараюцца сумесныя структуры. Цяпер на базе ўстаноў адукацыі дзвюх краін функцыянуюць 10 сумесных адукацыйных і навуковых структур (два інстытуты, пяць цэнтраў і тры лабараторыі).
Установамі адукацыі Беларусі і Кітая рэалізоўваецца 40 сумесных адукацыйных праграм. У распрацоўцы знаходзіцца яшчэ 20 сумесных адукацыйных праграм і праграм падрыхтоўкі кадраў найвышэйшай навуковай кваліфікацыі. Важнай вяхой у гэтым напрамку з’яўляецца рэалізацыя вядучымі ўстановамі вышэйшай адукацыі дзвюх краін (Беларускім дзяржаўным універсітэтам і Пекінскім універсітэтам) з верасня 2022 года сумеснай праграмы бакалаўрыята па спецыяльнасці «Біятэхналогія».
— З мэтай развіцця дамоўленасцяў, дасягнутых лідарамі нашых краін у сакавіку 2023 года аб развіцці акадэмічных і навуковых абменаў паміж установамі адукацыі, у найбліжэйшы час плануецца падпісанне Плана рэалізацыі флагманскіх праектаў і нарошчвання культурна-гуманітарных абменаў у галіне адукацыі паміж Рэспублікай Беларусь і Кітайскай Народнай Рэспублікай, — падкрэсліў Аляксандр Бахановіч. — Акрамя таго, прапрацоўваецца магчымасць стварэння ў найбліжэйшы час сумесных адукацыйных праграм па спецыяльнасцях «Архітэктура» і «Архітэктурны дызайн» (паміж Беларускім нацыянальным тэхнічным універсітэтам і Універсітэтам Тунцзі) і «Інфармацыйныя тэхналогіі» (паміж Беларускім дзяржаўным універсітэтам інфарматыкі і радыёэлектронікі і Навукова-тэхнічным універсітэтам Кітая, Харбінскім політэхнічным універсітэтам); сумеснага факультэта кітайскіх тэхналогій у Беларускім нацыянальным тэхнічным універсітэце з Паўночна-Усходнім універсітэтам; сумеснага інстытута Беларускага дзяржаўнага тэхналагічнага ўніверсітэта і Далянскага тэхналагічнага ўніверсітэта.
На ўзаемнай сістэмнай аснове пашыраецца супрацоўніцтва ў галіне арганізацыі вывучэння кітайскай мовы ва ўстановах адукацыі Рэспублікі Беларусь і беларускай мовы — ва ўстановах вышэйшай адукацыі Кітайскай Народнай Рэспублікі.
У Беларусі цяпер паспяхова функцыянуюць шэсць інстытутаў кітаязнаўства імя Канфуцыя і восем класаў кітаязнаўства імя Канфуцыя. У сваю чаргу яны стварылі сетку сваіх філіялаў (кабінетаў Канфуцыя і цэнтраў па вывучэнні кітайскай мовы і культуры) у больш як 50 установах адукацыі.
На базе кітайскіх універсітэтаў адкрыта дванаццаць цэнтраў вывучэння Беларусі, таксама вядзецца работа па стварэнні яшчэ двух аналагічных цэнтраў.
Прадугледжваецца, што ў найбліжэйшы час атрымаюць новы імпульс наступныя кірункі ўзаемадзеяння: стварэнне інавацыйных аб’яднанняў паміж установамі адукацыі і высокатэхналагічнымі прадпрыемствамі дзвюх краін для правядзення сумесных навуковых даследаванняў і доследна-канструктарскіх работ з камерцыялізацыяй іх вынікаў, падрыхтоўка навуковых кадраў па запатрабаваных напрамках двухбаковага ўзаемадзеяння, аб’яднанне намаганняў па распрацоўцы норм і стандартаў лічбавізацыі адукацыі, у тым ліку з выкарыстаннем вопыту рэалізацыі ініцыятывы «Інтэрнэт+».
У падпісаным сёння Пагадненні аб стварэнні кітайска-беларускай Асацыяцыі ўніверсітэтаў ёсць шэраг ключавых пазіцый. Так, супрацоўніцтва будзе ўключаць садзейнічанне двухбаковым і шматбаковым міжуніверсітэцкім абменам і ўзаемадзеянню; мерапрыемствы па акадэмічным абмене, у тым ліку сумесныя семінары, форумы.
Размова ідзе таксама аб сумеснай падрыхтоўцы высакакласных прафесійных і міждысцыплінарных спецыялістаў, падачы заявак на фінансаванне навуковых даследаванняў, супрацоўніцтве ў арганізацыі сумесных праграм.
Дадзенае пагадненне ўступае ў сілу з моманту яго падпісання ўсімі ўніверсітэтамі-ўдзельнікамі і дзейнічае на працягу 5 гадоў з магчымасцю аўтаматычнага падаўжэння.
Надзея НІКАЛАЕВА
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.