Алейнік прыбыў з афіцыйным візітам у Манголію

Міністр замежных спраў Беларусі Сяргей Алейнік прыбыў з афіцыйным візітам у Манголію, паведамляе БелТА.

Ва Улан-Батары Сяргей Алейнік 15-16 сакавіка правядзе перагаворы з кіраўніцтвам краіны, сваім мангольскім калегам, а таксама з кіраўнікамі галіновых ведамстваў і прадстаўнікамі дзелавых колаў. Галоўнай тэмай сустрэч стане актывізацыя двухбаковага супрацоўніцтва ў палітычнай і гандлёва-эканамічнай сферах.

Раней у Манголію прыбыла прадстаўнічая дэлегацыя з Беларусі — кіраўнікі дзяржаўных органаў, прамысловых прадпрыемстваў, прадстаўнікі фінансавага сектара. Яны ўжо паспелі правесці некалькі сустрэч з мангольскімі партнёрамі, абмеркаваўшы з імі перспектыўныя напрамкі супрацоўніцтва ў розных галінах.

У студзені ў Мінску прайшло пасяджэнне сумеснай беларуска-мангольскай міжурадавай камісіі па пытаннях гандлёва-эканамічнага супрацоўніцтва. Дэлегацыя Манголіі наведала флагманы беларускай прамысловасці, прадпрыемствы сельскай гаспадаркі.

Напярэдадні беларуская дэлегацыя на чале з міністрам замежных спраў наведала Індыю. Як расказаў па выніках перагавораў Сяргей Алейнік, асаблівая ўвага была ўдзелена эканамічнаму вымярэнню.

Урад Індыі ў аснову асноў ставіць амбіцыйныя планы нарошчвання эканамічнага патэнцыялу, стварэння сур’ёзных інфраструктурных праектаў, развіцця прамысловай кааперацыі. Для гэтага ў краіне ствараюць неабходныя ўмовы. «Гэта той фундамент, на якім мы маглі б наладжваць нашы гандлёва-эканамічныя адносіны», — заявіў кіраўнік знешнепалітычнага ведамства.