У Мінскай вобласці 2 вытворцы тавараў прыцягнутыя да адказнасці за парушэнне цэнаўтварэння

Па выніках маніторынгаў КДК Мінскай вобласці за парушэнні заканадаўства ў сферы цэнаўтварэння да адказнасці прыцягнуты 2 вытворцы тавараў, паведамляе БелТА са спасылкай на Telegram-канал Камітэта дзяржаўнага кантролю.

Камітэт дзяржкантролю Мінскай вобласці падчас маніторынгаў арганізацый гандлю вывучыў выкананне пастаўшчыкамі і вытворцамі патрабаванняў заканадаўства ў сферы цэнаўтварэння. Былі выяўлены парушэнні, звязаныя з перавышэннем гранічна дапушчальных адпускных цэн на сацыяльна значныя тавары. За верасень-кастрычнік 2021 года яны ўстаноўлены па 4 вытворцам харчовых тавараў. З пачатку года да адказнасці прыцягнутыя 2 юрыдычныя асобы, якія павінны выплаціць Br529 тыс. штрафу.

У 2021 годзе розныя парушэнні выяўленыя ў 203 гандлёвых аб’ектах рэгіёну, у 66 з іх зафіксавана невыкананне парадку фарміравання цэн. Напрыклад, у павільёне прыватнага прадпрыемства Пухавіцкага раёна з перавышэннем гранічных гандлёвых надбавак рэалізоўвалі бульбу( на 24,3%), капусту (24%), моркву (37%), буракі (13%), цукар (10%), а ў гандлёвым павільёне індывідуальнага прадпрымальніка ў Клецкім раёне аналагічна прадавалі мясныя і каўбасныя вырабы (перавышэнне склала ад 5% да 117%).

Як адзначылі ў кантрольным ведамстве, ва ўсіх выяўленых выпадках парушэнні аператыўна ліквідаваныя.

Прэв’ю: pixabay.com