Прэзідэнт Беларусі Аляксандр Лукашэнка правёў сустрэчу з намеснікам прэм’ер-міністра Пятром Пархомчыкам, які ўсяго як некалькі дзён працуе ў новай пасадзе. Да нядаўняга часу віцэ-прэм’ер з’яўляўся міністрам прамысловасці. Чалавек ён вопытны: прайшоў шлях ад рабочага да камерцыйнага дырэктара флагмана беларускай прамысловасці — Мінскага трактарнага завода. Некаторы час узначальваў яшчэ адзін прамысловы гігант краіны — Беларускі аўтамабільны завод.
На каласальны вопыт Пятра Пархомчыка звярнуў увагу і кіраўнік дзяржавы. Аднак адразу папярэдзіў: унікаць у пэўныя пытанні ўсё ж прыйдзецца. Калі прамысловасць для новага віцэ-прэм’ера — сфера абсалютна зразумелая, то энергетычны і нафтахімічны комплексы, лясная гаспадарка, дрэваапрацоўка з’яўляюцца адносна новымі кірункамі яго дзейнасці.
«Наша задача адна ў эканоміцы — не ўпасці ніжэй за мінулы год, — падкрэсліў беларускі лідар. — І галоўную ролю тут, вядома, павінна сыграць прамысловасць». Пры гэтым у прыклад прывёў сельскую гаспадарку, якая, па перакананнях Прэзідэнта, выйдзе на абяцаныя параметры — 104 %. «Для гэтага ёсць усё, — лічыць Аляксандр Лукашэнка. — І надвор’е нас пашкадавала, парадавала. Мы практычна ўбралі, ідзём да фінішу — збожжавыя. Восем мільёнаў, напэўна, атрымаем у гэтым годзе. А можа, і 8200. Гэта будзе выдатна! Плюс рапс, кукуруза. І калі ўсё складзецца, як складваецца цяпер, то 11 мільёнаў — гэта будзе рэкорд для нашай краіны. Мы атрымаем якаснае зерне, каб людзей нашых накарміць і каб хапіла для вытворчасці камбікармоў».
Аляксандр Лукашэнка чарговы раз акцэнтаваў увагу на тым, што ў гэты перыяд вельмі важна асвоіць новыя рынкі. У прыватнасці, Прэзідэнт прывёў у прыклад Зімбабвэ, дзе таксама можна працаваць. «Не трэба адкідваць ніякія рынкі, — адзначыў беларускі лідар. — Можам працаваць на Захадзе — будзем працаваць на Захадзе. На Поўдні, Поўначы, Усходзе — там, дзе толькі мы патрэбныя, дзе патрэбная наша прадукцыя. Усюды трэба працаваць. Ну што, мы гіганцкую эканоміку маем, як Расія? Не. Наша эканоміка кампактная. Што вырабляем — патрэбна. Усюды патрэбна. І харчаванне, і мінеральныя ўгнаенні, асабліва цяпер. Каб голаду не дапусціць, і Захад будзе набываць гэтыя ўгнаенні. Таму ні ад якіх рынкаў адмаўляцца не трэба».
Пры гэтым, як падкрэсліў беларускі лідар, пытаннем нумар адзін па-ранейшаму застаецца імпартазамяшчэнне. «Бяда, гэтыя санкцыі, нас прымусілі займацца імпартазамяшчэннем», — канстатаваў Прэзідэнт.
Спыніўся кіраўнік дзяржавы і на важнасці інвестыцыйных праектаў. Пры гэтым заўважыў, што «хвост», хоць і невялікі, застаўся на нафтаперапрацоўчых заводах у Мазыры і Наваполацку. Прэзідэнтам пастаўлена задача — сур’ёзна ўзяцца за гэтыя пытанні і завяршыць іх. Па словах Аляксандра Лукашэнкі, на поўную магутнасць павінна працаваць і БелАЭС.
Закранулі падчас сустрэчы і пытанне вытворчасці беларускіх аўтобусаў на заводзе МАЗ. «Вельмі перспектыўная сфера, не паспяваем задавальняць попыт, — заўважыў беларускі лідар. — Таму ўсё, што трэба для МАЗа зрабіць, падстрахуйце, запатрабуйце, дапамажыце, але развіваць аўтобусную вытворчасць трэба». І ў гэтым кантэксце кіраўнік дзяржавы згадаў нядаўнюю паездку на Мёрскі металапракатны завод. «Добрае прадпрыемства, можа працаваць, — адзначыў ён. — Трэба больш актыўна яго задзейнічаць».
Гарбарная сыравіна — тое, аб чым таксама казалі падчас сустрэчы. «Вельмі патрэбная сёння вытворчасць, — акцэнтаваў увагу Аляксандр Лукашэнка. — Рынак — вязі не хачу. Аднак трэба напружыцца. Гэта ж не вытворчасць БЕЛАЗаў і іх продаж. Гарбарную сыравіну трэба дапрацаваць і прадаць з высокай дабаўленай вартасцю». Рашэнні ў гэтай сферы, па словах кіраўніка дзяржавы, усе прынятыя. У найбліжэйшы час будзе праверана, як яны рэалізоўваюцца.
Новыя праекты — аб гэтым таксама вялася размова. «Перш за ўсё, „Гродна Азот“, „Светлагорскі ЦЦК“, — удакладніў Прэзідэнт. — Па паперы мы гаварылі аб паглыбленай перапрацоўцы. Гэта таксама павінна быць даведзена да дасканаласці, каб мы не прадавалі паўфабрыкат, а прадавалі гатовыя вырабы і сябе забяспечылі кардонам і ўпакоўкай».
Аляксандр Лукашэнка перакананы: «Патрэбна інвеставаць у тое, што мы ўмеем рабіць». І нічога, па яго словах, не трэба выдумляць. «Калі ў нас ёсць школа аўтамабілебудавання добрая, велікагрузных, дапусцім, і іншых аўтамабіляў, давайце будзем паглыбляцца — там жа непачаты край работы, перш за ўсё па імпартазамяшчэнні, — сведчыць Прэзідэнт. — Стварылі мы цэлюлозу або нешта яшчэ з драўніны — давайце гэтую цэлюлозу пераўтворым у паперу, а паперу — у кардонную ўпакоўку».
А то атрымліваецца, што вязём за мяжу цэлюлозу, а потым адтуль — кардон, каб жаночыя калготкі ўпакаваць або парфумерыю. А можна і нават трэба, па словах беларускага лідара, гэта ўсё рабіць у сябе. Такім чынам, задача ад кіраўніка дзяржавы — паглыбленне тых кірункаў, якія сёння даюць эфект і запатрабаваныя на рынках.
Вераніка КАНЮТА
Фота: БелТА
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
