Адмовіцца ад салодкага падарунка было б ідэальна для здароўя, але немагчыма. Таму зрабіце яго самі з улікам правільных падказак.
Лішак цукру, хоць бы і ў гонар свята, — шкодна, як ні круці! Што ж рабіць, калі дзеці ўсё адно чакаюць, а задача дарослых — не адступаць ад здаровага ладу жыцця? Па-першае, калі вашаму дзіцяці менш за 3 гады, то тут і гаварыць няма аб чым: цукеркі даваць нельга ні ў якім разе. Па-другое, чым даўжэй вам удасца ўтрымаць дзіця ад ужывання цукерак, тым больш вы малайчына! Па-трэцяе, нягледзячы на дзіцячыя карцінкі на прысмаках, гэта не тое самае, што дзіцячы тварог ці дзіцячае малако. Цукеркі — увогуле не для дзяцей, аднак бываюць дні, калі без іх ніяк. А таму вучымся зніжаць шкоду ад салодкага.
Многія з нас напярэдадні святаў адпраўляюцца на закупкі ў суседнія краіны і часам набываюць прадукты, складу якіх нават не ведаюць, таму што інфармацыя на этыкетцы — на незразумелай мове. Аднак нават калі і на зразумелай, трэба памятаць, што вытворцаў падобнай прадукцыі — процьма, і далёка не ўсе робяць яе паводле высокіх стандартаў. Каб не расплачвацца здароўем, не ганяйцеся за таннасцю: лепш менш, ды лепш. Набывайце прадукцыю вядомых вам вытворцаў, ідэальна — у фірменных магазінах фабрык. Звяртайце ўвагу на тое, каб прадукцыя была «ГОСТ», «СТБ», што мае на ўвазе адпаведнай якасці сыравіну. Дарэчы, амаль уся кандытарская прадукцыя выраблена з дадаваннем маргарыну, гідрагенізаваных тлушчаў (часткова гідрагенізаваныя — яшчэ горш). І нават не важна, што азначаюць такія невядомыя словы: чым менш незразумелага ў прадукце, тым лепш.
У падарунку для вашага дзіцяці не павінна быць цукерак з вышэйзгаданымі кулінарнымі або кандытарскімі тлушчамі, трэба, каб было як мага менш кансервантаў, фарбавальнікаў, заменнікаў цукру. У складзе павінна быць какава-масла, а не эквіваленты, якія і побач з ім не стаялі. Не падыдуць і прысмакі з кавай ці алкаголем. Ледзяшы, карамель і ірыс — таксама прэч, бо такая прадукцыя досыць працягла знаходзіцца ў роце, што моцна псуе зубы, а яшчэ празмерна актывізуе выпрацоўку інсуліну. Калі пячэнне, то менавіта дзіцячае. Можна дадаць у падарунак так званыя карысныя прысмакі: пасцілу, мармелад, зефір.
Кожны раз, даючы што-небудзь салодкае, прагаворвайце, што да здароўя трэба ставіцца ашчадна, што так можна і зубы сапсаваць і г.д. Дома ніколі не павінна быць шмат прысмакаў, іх трэба жорстка дазіраваць і кантраляваць, каб не сфарміраваць няправільныя харчовыя паводзіны, з якімі пасля давядзецца ўсё жыццё змагацца. Паводле рэкамендацый дыетолагаў, можна ўжываць не больш за 2—3 цукеркі ў дзень, або 20—30 г прысмакаў. Частаваць трэба выключна пасля яды, калі дзіця не галоднае і не мае жадання праглынуць некалькі штук за адзін раз. Дазвольце малому атрымаць задавальненне ад усяго працэсу, пачынаючы з разгортвання прыгожай абгорткі.
Не рабіце наогул стаўку на салодкае. Усё ж такі дзеці чакаюць не цукерак, а падарунка. Так што ў аснове павінна быць прыгожая цацка, сувенір, а ў дадатак — невялікая колькасць цукерак, якія вы разам размяркуеце па днях, і пры гэтым папросіце дзіця падзяліцца з усімі дарослымі, гасцямі.
Рыхтуючы навагодні стол, зрабіце разам з дзіцем міні-бутэрброды або канапэ з самай рознай садавіны, якую можна дробна нарэзаць. Зрабіце і торт, выкарыстоўваючы лепшыя інгрэдыенты — масла, яйкі і г.д. Паглядзіце ў інтэрнэце, як лёгка гатуюцца цукеркі з сухафруктаў, арэхаў, вафельнага ліста і кунжуту. Салодкую газіроўку замяніце на ваду (пакладзіце туды парэзаныя на буйныя кавалачкі фрукты), хатні морс або невялікую колькасць фруктовага соку.
Святлана Барысенка
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?