Нагадваем, што КОТГС — гэта калегіяльны орган тэрытарыяльнага грамадскага самакіравання. Мікалай БУЙНІЧ, старшыня адной з гэтых арганізацый якраз і дабіваецца таго, каб расшыфроўка абрэвіятуры ні ў кога не выклікала пытанняў, а задачы органа самакіравання сталі агульнавядомымі. Каб даведацца, як яму ўдаецца рэалізоўваць свае планы, мы пабывалі на свяце, арганізаваным КОТГСам №118, які адказвае за тэрыторыю раёна 8-га і 9-га кіламетраў на ўсходзе Мінска.
Мікалай Буйніч на чале арганізацыі ўсяго год, аднак спецыфіку яе дзейнасці паспеў вывучыць дасканала — дапамог дзесяцігадовы досвед працы на кіруючых пасадах. Вакол сябе лідар стараецца збіраць ініцыятыўных і крэатыўных жыхароў раёна — прызнаецца, што ахвотней за іншых ідуць на кантакт маладыя сем'і.
— Мы акцэнтуем увагу не толькі на добраўпарадкаванні, хоць і без вырашэння гэтых пытанняў не абыходзіцца, але і на стварэнні згуртаванай супольнасці, якой пад сілу справіцца з любымі задачамі. Напрыклад, мы арганізавалі кірмаш, каб назбіраць грошай для дапамогі бацькам дзіцяці-інваліда, якому патрэбна была аперацыя. Да большасці мерапрыемстваў стараемся прыцягнуць дзяцей, каб з самага ранняга ўзросту ў іх фарміравалася свядомае стаўленне да самакіравання. Тым больш склад жыхароў мікрараёна можна назваць вельмі маладым: на нашай тэрыторыі пражывае практычна сем тысяч дзяцей, — расказвае Мікалай Буйніч.
Вось і да пачатку навучальнага года актывісты КОТГСа Ірына Гудзіліна і Ганна Рэут арганізавалі свята, гасцямі якога стала больш за 300 юных жыхароў раёна. У праграме — творчыя выступленні, гульні ад дзіцячага пакоя «33 вітамінкі», дыскатэка з конкурсамі, фотазона, аквагрым, катанне на поні, танцавальны флэшмоб. Пры гэтым за забаўкамі схаваны больш сур'ёзныя выхаваўчыя задачы: на свяце прысутнічалі супрацоўнікі МНС, а кіналагічны цэнтр зладзіў паказальнае выступленне.
— Наша месцазнаходжанне проста абавязвае нас супрацоўнічаць з прадстаўнікамі сілавых структур. У нас добра наладжаны кантакт з Ваеннай акадэміяй — тым больш, я сам выхадзец адтуль, з воінскімі часцямі. У планах — запусціць сумесныя праекты са Спартыўным камітэтам Узброеных Сіл. У цэлым, спорт — гэта адзін з тых кірункаў, якія хочацца актыўна развіваць. Мы нават думаем у склад арганізацыі ўключыць людзей, якія будуць займацца толькі гэтымі пытаннямі, — адзначыў старшыня КОТГСа.
Мясцовыя жыхары такія імкненні падтрымліваюць. Нават за свае грошы былі гатовыя пабудаваць стадыён, праўда, заняць аблюбаванае месца не дазволілі будаўнічыя нормы. А вось усталяваць шлагбаумы, камеры відэаназірання, уладкаваць клумбы, пабудаваць велагараж за ўласныя сродкі нішто не перашкодзіла.
— Людзі разумеюць, напрыклад, што дзіцячая пляцоўка, якая закладзена па праекце, іх не задавальняе. І без лішніх пытанняў збіраюць грошы на тую, якая ім падабаецца. Нельга ўвесь час спадзявацца на бюджэт, ён вырашае першачарговыя задачы, як, напрыклад, будаўніцтва садка. Хочаш жыць лепш на лакальным узроўні — дзейнічай. Але гэта не азначае, што ўсе пытанні мы вырашаем самастойна — цесна ўзаемадзейнічаем і з ЖЭУ №1 жылкамгаса Першамайскага раёна, яго дырэктар Іна Ясінская сама была ў актыве КОТГСа, таму мы добра адно аднаго разумеем, — заўважыў Мікалай Буйніч.
Ужо двойчы за год КОТГС станавіўся лепшым у раёне, а на гарадскім конкурсе адзначылі работу яго кіраўніка. Толькі на суботнік тут выходзіць больш за 400 чалавек. Пакуль інфармацыя пра дзейнасць арганізацыі распаўсюджваецца пераважна праз месенджары і аб'явы, але ў планах запуск рэкламы, у тым ліку і ў грамадскім транспарце. Магчыма, з'явіцца і свой друкаваны орган, а сама арганізацыя будзе зарэгістравана як юрыдычная асоба. Гэта дапаможа больш актыўна прыцягваць да работы КОТГСа спонсараў, якія і цяпер адгукаюцца на прапановы дапамагчы ў арганізацыі свят. Далей, як упэўнены ўсе мясцовыя жыхары, больш...
Дэпутат 27-га склікання Мінскага гарадскога Савета, старшыня Пастаяннай камісіі мандатнай, па галоснасці, самакіраванні, правапарадку і міжнародных сувязях Георгій АТАМАНАЎ:
— Ёсць неабходнасць пільнай увагі з боку дзяржорганаў да развіцця грамадскага самакіравання па месцы жыхарства. Каштоўнасць гэтага рэсурсу будзе толькі ўзрастаць, таму патрэбны праграмна-мэтавы падыход, які прадугледжвае актыўнае ўключэнне ў справу максімальнай колькасці грамадзян.
Грамадскае самакіраванне бачыцца як стройная сістэма, якая складаецца з калегіяльных (камітэты тэрытарыяльнага грамадскага самакіравання ў мікрараёнах, дамавыя або вулічныя камітэты) і аднаасобных (старшыя невялікіх дамоў і пад'ездаў) органаў грамадскага самакіравання, якія выбіраюцца сходамі грамадзян па месцы жыхарства на тэрмін паўнамоцтваў мясцовых Саветаў дэпутатаў чарговага склікання. У гэтай сістэме знойдзецца месца і органам арганізацый жыллёвых і гаражных спажывецкіх кааператываў, таварыстваў уласнікаў жылых дамоў, маладзёжных жылых комплексаў, саветаў інтэрнатаў.
Пра гэта вельмі важна сказаць цяпер, у сувязі з надыходзячымі ў лютым 2018 года выбарамі дэпутатаў мясцовых Саветаў дваццаць восьмага склікання. Ужо сёння неабходна прадумаць пытанні правядзення да гэтага тэрміну сходаў грамадзян па месцы жыхарства і прыняць неабходныя арганізацыйныя меры для фарміравання новых складаў органаў грамадскага тэрытарыяльнага самакіравання на наступныя чатыры гады.
Дар'я КАСКО
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?
