Вы тут

Падарожжа з дзіцячай кніжкай


«Культурны маршрут “Мая Беларусь: сучасныя пісьменнікі — дзецям”» стартуе з Любаншчыны.

Рэспубліканская акцыя, арганізаваная разам з Міністэрствам інфармацыі Рэспублікі Беларусь і Саюзам пісьменнікаў Беларусі, распачнецца падчас XXV Мінскай міжнароднай кніжнай выстаўкі-кірмашу, якая пройдзе з 28 лютага па 4 сакавіка. У планах ініцыятывы — ахапіць не толькі ўсе вобласці нашай краіны, але і раённыя цэнтры. Першая кропка на «культурным маршруце» — Любанскі раён Мінскай вобласці. Старшыня аддзела ідэалагічнай работы, культуры і па справах моладзі Васіль Каткавец паведаміў, што падрыхтоўка да ўдзелу ў акцыі пачынаецца гэтымі днямі: раён рыхтуе некалькі творчых сюрпрызаў.


Кацярына Хадасевіч-Лісавая падчас сустрэчы з маленькімі чытачамі.

— Прадстаўнікі выдавецтваў сабраліся, каб аб’яднаць намаганні ў павышэнні культурнага ўзроўню падрастаючага пакалення, — зазначыла кансультант упраўлення выдавецкай дзейнасці і гандлю Міністэрства інфармацыі Рэспублікі Беларусь Людміла Быкава падчас прэзентацыі «культурнага маршрута». — Мэта акцыі — прышчэпка цікавасці да чытання нашым дзецям, знаёмства з сучаснымі беларускімі пісьменнікамі і паэтамі. Дзеля гэтага запланаваны шэраг розных мерапрыемстваў: сустрэчы з пісьменнікамі, прэзентацыі кніг, круглыя сталы, аўтограф-сесіі, віктарыны.

Абмеркаваць перспектывы развіцця новага праекта прыйшлі галоўны рэдактар часопіса «Вясёлка» Уладзімір Ліпскі і прадстаўнікі дзяржаўных выдавецтваў «Мастацкая літаратура», «Беларусь», «Народная асвета», «Пачатковая школа», «Адукацыя i выхаванне», Выдавецкі дом «Звязда». Яны агучылі спіс прапанаваных для ўдзелу ў акцыі кніг. Сярод аўтараў, чые творы хутка выправяцца ў падарожжа па Беларусі, — Мікола Чарняўскі, Алесь Карлюкевіч, Генадзь Аўласенка, Алена Масла, Раіса Баравікова, Уладзімір Ліпскі, Алесь Бадак ды іншыя. Для школьнікаў малодшага і старэйшага школьнага ўзросту складуць адмысловыя заплечнікі з дванаццаццю кнігамі сучасных беларускіх пісьменнікаў. Акрамя рэальных заплечнікаў, выдавецтвы падрыхтуюць і віртуальныя: вядома, што сучасным дзецям зручна шукаць творы ў інтэрнэт-прасторы. Арганізатары ініцыятывы звярнулі ўвагу на тое, што цана ў прапанаваных выданняў даволі дэмакратычная. Гэта вельмі важна для акцыі: камплект з адабраных кніг здолее набыць звычайная беларуская сям’я.

— Акцыя своечасовая і патрэбная, — сцвярджае дырэктар выдавецтва «Мастацкая літаратура» Алесь Бадак. — Зайдзіце ў любую кнігарню краіны, і ўбачыце шмат дзіцячых кніжак на беларускай і рускай мовах ад беларускіх, рускіх і замежных аўтараў. З аднаго боку, выдатна, калі для дзіцячага чытання столькі твораў. З іншага боку, выдаўцы і пісьменнікі добра ўсведамляюць: чым больш кніжак у крамах ды бібліятэках, тым большая канкурэнцыя. У гэтых умовах важна, каб чыталіся і перачытваліся лепшыя творы, бо кожны з нас ведае па ўласным дзяцінстве: тое, што прачытаў і ўпадабаў у гэтым узросце, застанецца ў памяці на ўсё жыццё. Арганізатары акцыі маюць на мэце не толькі заахвочваць дзяцей да чытання беларускіх аўтараў, але і выхоўваць актыўнага чытача, які будзе выказваць свае думкі пра кнігу.

Дар’я ЧАРНЯЎСКАЯ

Фота Кастуся ДРОБАВА

Выбар рэдакцыі

Культура

У нядзелю яўрэі святкуюць Новы год дрэў

У нядзелю яўрэі святкуюць Новы год дрэў

На гэта свята асаблівым чынам спажываюць розную садавіну, запіваючы келіхамі добра разбаўленага віна.

Грамадства

Як задаволіць кадравы голад у сферы ІТ?

Як задаволіць кадравы голад у сферы ІТ?

Работадаўцы кажуць, што быць добрым праграмістам і ўмець пісаць код для эфектыўнай работы ўжо недастаткова.

Культура

Балельшчыкі II Еўрапейскіх гульняў ужо рэзервуюць вясковыя гатэлі

Балельшчыкі II Еўрапейскіх гульняў ужо рэзервуюць вясковыя гатэлі

«Адышоў час, калі гасцям патрэбныя былі толькі «чарка і скварка», ім ужо цікавыя музеі, культурная праграма».