20 Люты, аўторак

Вы тут

Стартавыя спаборніцкія дні ў Пхёнчхане не прынеслі беларусам медалёў


Першай чэмпіёнкай ХХІІІ зімовых Алімпійскіх гульняў у Паўднёвай Карэі стала шведская лыжніца Шарлота Кала, яна заваявала залаты медаль у лыжным скіятлоне. Для 30-гадовай спартсменкі гэта ўжо трэцяе «золата» Алімпіяды — да гэтага яна стала чэмпіёнкай на двух папярэдніх Гульнях у Ванкуверы-2010 і Сочы-2014.


З лыжных гонак пачалі выступленне і беларусы, Юлія Ціханава (стала 42-й) і Паліна Сераносава (46-я на фінішы) у скіятлоне на медалі не прэтэндавалі, аказаўшыся бліжэй да канца фінішнага пратакола. Прыкладна такія ж пазіцыі ў гэтым відзе праграмы і ў нашых мужчын: Міхаіл Сямёнаў заняў 44-е месца, Юрый Астапенка — 50-е, Сяргей Далідовіч сышоў з дыстанцыі на самым пачатку гонкі, не дабраўшыся да адзнакі 4,63 кіламетра. «Сышоў з дыстанцыі з-за праблем з бронхамі і ўсім, што з гэтым звязана. Зараз адчуваю сябе нармальна. Шкада толькі, што падвёў усіх, хто за мяне хварэе, — пракаментаваў здарэнне Далідовіч. — Падвялі старыя балячкі. Калі тэмпература ніжэй за мінус 15, то стараюся не выступаць, на стадыёне ў нядзелю было 12 градусаў марозу, на далёкай кропцы — мінус 17». Сёння лыжнік ужо аднавіўся і гатовы выступіць у гонцы на 15 км, якая павінна адбыцца ў пятніцу.

Куды больш вялікія надзеі беларускія балельшчыкі ўскладалі на біятланістаў. Аднак у спрынтарскай гонцы прыма беларускага біятлона Дар'я Домрачава дапусціла крыўдны промах, які дазволіў стаць ёй толькі 9-й і стартаваць у гонцы пераследу ўчора з адставаннем у 46 секундаў. Ураганны вецер, які палохае практычна ўсіх спартсменаў у Пхёнчхане, перашкаджаў і біятланістам у панядзелак. З-за яго Домрачава дапусціла шэсць промахаў, чатыры з якіх — на апошнім агнявым рубяжы, паказала найгоршы вынік хуткастрэльнасці сярод усіх удзельніц гонкі і заняла толькі 37-е месца. «Хацела змагацца. На жаль, атрымалася так, як атрымалася, — разважае над сваім выступленнем Дар'я. — Чацвёртая стральба? Усё ясна і зразумела. Моцны вецер быў дастаткова непрадказальны, парывы то сціхалі, то зноў аднаўляліся з вялікай сілай. Падчас апошняй стральбы як раз быў моцны парыў. Але я ўжо і так разумела, што лідары адправіліся на дыстанцыю. Таму вырашыла рызыкнуць: не бачыла сэнсу чакаць. На жаль, рызыка сябе не апраўдала. Застаецца толькі развесці рукамі. Жыццё на гэтым не заканчваецца».

Астатнія беларускія спартсмены ў мужчынскай і жаночай гонках пераследу таксама не ўвайшлі ў ТОП-10.

Прадстаўнік шорт-трэка Максім Сяргееў на дыстанцыі 1500 метраў заняў 28-е месца і завяршыў сваё выступленне на Алімпіядзе-2018. Канькабежка Марына Зуева стала 11-й на дыстанцыі 3000 м, а вось на дыстанцыі 1500 м наша спартсменка была дыскваліфікаваная, суддзі ўгледзелі ў забегу парушэнні з боку Марыны. «Спартсменка вельмі хвалявалася, — адзначыў яе настаўнік Сяргей Мінін. — Стартаваць у першы дзень Алімпіяды з псіхалагічнага пункту гледжання няпроста любому атлету. Канчатковыя вынікі ў многіх вядучых спартсменаў свету аказаліся вельмі шчыльнымі. Месцы з шостага па адзінаццатае падзяляе крыху больш за паўтары секунды». Мінін пры гэтым падкрэсліў, што вынік 4 хвіліны 05,96 секунды на дыстанцыі ў 3000 м для Марыны з'яўляецца персанальным рэкордам і найлепшым паказчыкам на раўнінных катках на сённяшні дзень.

Адзначым, што з-за моцнага ветру ў Пхёнчхане былі адмененыя старты гарналыжнікаў, у тым ліку перанесены гонкі, у якіх павінны былі ўдзельнічаць нашы спартсмены Марыя Шканава і Юрый Данілачкін.

Моцны вецер можа перашкодзіць, мабыць, і нашым асноўным алімпійскім надзеям — фрыстайлістам. Галоўны трэнер беларускай зборнай Мікалай Казека адзначае, што ўсе спартсмены здаровыя і настройваюцца на галоўныя спаборніцтвы самым сур'ёзным чынам. На трэніроўках настаўнікі ў літаральным сэнсе слова ловяць моманты, калі нашы спартсмены могуць падысці да трампліна, каб адпрацаваць свае скачкі. «Спадзяёмся, што ўмовы надвор'я ў «Фенікс-Парку» дазволяць камандзе плённа трэніравацца і выйсці на старт у прыўзнятым настроі», — кажа Казека. Нагадаем, спаборніцтвы ў лыжных акрабатаў пройдуць 15—18 лютага.

Дар'я ЛАБАЖЭВІЧ

Загаловак у газеце: Вецер і мароз мяняюць планы

Дадаць каментар

Выбар рэдакцыі

Грамадства

Ужо каторы год жыхары змагаюцца супраць агульнай паркоўкі ў двары

Ужо каторы год жыхары змагаюцца супраць агульнай паркоўкі ў двары

Гаспадары двара расказваюць, што раней тры заезды ў двор перакрывалі дэкаратыўныя металічныя вароты, унутр аўтамабілі маглі трапіць толькі праз вялікую арку з боку вуліцы Янкі Купалы.

Спорт

Штотыднёвы спартыўны агляд «Звязды»

Штотыднёвы спартыўны агляд «Звязды»

Пра соты фінал у кар'еры Максіма Мірнага, поспехі беларускіх самбістаў на дамашнім турніры і выступленні нашых гандбольных клубаў у Еўропе.

Культура

Cабраны пераклады верша Янкі Купалы «А хто там ідзе» на 101 мову свету

Cабраны пераклады верша Янкі Купалы «А хто там ідзе» на 101 мову свету

«Беларуская Энцыклапедыя імя Петруся Броўкі» адправіла ў друкарню выданне «А хто там ідзе: на мовах свету».

Палітыка

Прэзідэнт паўдзельнічаў у выбарах і адказаў на пытанні журналістаў

Прэзідэнт паўдзельнічаў у выбарах і адказаў на пытанні журналістаў

За каго аддаць свой голас, якога кандыдата лепей абраць у дзень выбараў у мясцовыя Саветы дэпутатаў?