Вы тут

У Дэпартаменце па энергаэфектыўнасці расказалі аб праектах


Пачынаючы з 1997 года, спажыванне паліўна-энергетычных рэсурсаў (ПЭР) у краіне практычна не змянілася, а вось ВУП за гэты перыяд павялічыўся у 2,5 раза. Але і гэта не мяжа магчымасцяў, лічаць у дэпартаменце па энергаэфектыўнасці. Энергаёмістасць ВУП краіны сёлета плануецца знізіць яшчэ на 0,8 % да ўзроўню мінулага года. Пра гэта заявіў першы намеснік дырэктара дэпартамента па энергаэфектыўнасці Дзяржаўнага камітэта па стандартызацыі Віктар Акушка падчас пасяджэння калегіі ведамства, якая адбылася ў Мінску.


А для гэтага неабходна сэканоміць каля 1 млн тон умоўнага паліва і дасягнуць долі мясцовых відаў паліва ў валавым спажыванні ПЭР не менш за 14,7 %.

«Што датычыцца долі аднаўляльных крыніц энергіі, то яны павінны скласці не менш за 6 %», — дадаў Віктар Акушка.

У 2018 годзе найбольшы аб'ём эканоміі энергетычных рэсурсаў плануецца забяспечыць за кошт укаранення ў вытворчасць сучасных энергаэфектыўных працэсаў і абсталявання. Акрамя таго, плануецца павысіць энергаэфектыўнасць існуючых тэхналогій.

Таксама Віктар Акушка нагадаў, што Беларусь дасягнула паказчыка энергаёмістасці развітых краін з падобнымі кліматычнымі ўмовамі, такіх як Канада і Фінляндыя. У Канадзе гэты паказчык складае 0,18, у Фінляндыі — 0,16.

Паводле апошніх вымярэнняў Міжнароднага энергетычнага агенцтва, якія праходзілі ў 2015 годзе, фактычны паказчык ВУП Беларусі склаў 0,16 тоны нафтавага эквіваленту на 1 тысячу долараў ВУП супраць 0,56 тоны нафтавага эквіваленту на 1 тысячу долараў ВУП у 1990 годзе. Фактычнае зніжэнне адбылося ў 3,5 раза. На працягу 25 гадоў аналагічны паказчык знізіўся ў Расіі ў 1,4 раза, ва Украіне — у 1,6 раза, у Казахстане — у 1,9 раза.

Паводле інфармацыі Белстата, за 11 месяцаў 2017 года паказчык зніжэння энергаёмістасці ВУП краіны склаў плюс 0,7 %. Негатыўны ўплыў на яго летась аказала павелічэнне спажывання светлых нафтапрадуктаў насельніцтвам і рост паліва-сыравіны на вытворчасць экспартнай няпаліўнай прадукцыі.

Па словах Віктара Акушкі, замежныя банкі выдзеляць Беларусі 200 млн долараў на развіццё энергаэфектыўных праектаў у перыяд з 2018 да 2020 года. Дэпартамент па энергаэфектыўнасці сумесна з іншымі зацікаўленымі ведамствамі і прадстаўніцтвам Сусветнага банка ў Беларусі рыхтуюць новы праект па стымуляванні выкарыстання мясцовых відаў паліва ў цеплазабеспячэнні. Праект з'яўляецца часткай рамачнай стратэгіі партнёрства з Беларуссю на 2018—2022 гады і мае на ўвазе новую схему фінансавання за кошт пазыковых сродкаў, часткі сродкаў з адлічэнняў на капітальны рамонт жылых будынкаў і часткі сродкаў з паступленняў ад прыватызацыі жылля.

«Магчымы сумарны аб'ём пазыковых сродкаў, якія прыцягваюцца, складае 200 млн долараў. З іх 100 млн долараў з'яўляюцца сродкамі Міжнароднага банка рэканструкцыі і развіцця, а астатнія рэсурсы — Еўрапейскага інвестыцыйнага банка», — растлумачыў Віктар Акушка. Паводле папярэдняй ацэнкі новы сумесны інвестыцыйны праект выгадны для Беларусі.

«Ацэнка мэтазгоднасці і магчымасці выкарыстання схемы фінансавання патрабуе належнага абгрунтавання для канчатковага адабрэння на ўзроўні ўрада і кіраўніка дзяржавы», — рэзюмаваў Віктар Акушка.

Ілья КРЫЖЭВІЧ

Загаловак у газеце: Утрымліваем энергетычны баланс

Выбар рэдакцыі

Культура

У нядзелю яўрэі святкуюць Новы год дрэў

У нядзелю яўрэі святкуюць Новы год дрэў

На гэта свята асаблівым чынам спажываюць розную садавіну, запіваючы келіхамі добра разбаўленага віна.

Грамадства

Як задаволіць кадравы голад у сферы ІТ?

Як задаволіць кадравы голад у сферы ІТ?

Работадаўцы кажуць, што быць добрым праграмістам і ўмець пісаць код для эфектыўнай работы ўжо недастаткова.

Культура

Балельшчыкі II Еўрапейскіх гульняў ужо рэзервуюць вясковыя гатэлі

Балельшчыкі II Еўрапейскіх гульняў ужо рэзервуюць вясковыя гатэлі

«Адышоў час, калі гасцям патрэбныя былі толькі «чарка і скварка», ім ужо цікавыя музеі, культурная праграма».