Як больш эфектыўна рухацца да Мэт устойлівага развіцця?

На пасяджэнні ў Савеце Рэспублікі парламентарыі, прадстаўнікі міністэрстваў і арганізацый абмеркавалі, як больш эфектыўна рухацца да Мэт устойлівага развіцця. Размова ідзе не толькі пра рэкамендацыі, але і пра пэўныя заканадаўчыя акты.

Ала БОДАК, старшыня Пастаяннай камісіі Савета Рэспублікі па заканадаўстве і дзяржаўным будаўніцтве, гаворачы пра карэкціроўку закона аб абыходжанні з адходамі, адзначыла: «Мы прапануем увесці так званую працэдуру зялёных закупак. І аддаваць прыярытэт прадукцыі, якая была выраблена ў выніку перапрацоўкі адходаў. І мы прапануем таксама знізіць мытную пошліну на ўвоз абсталявання, матэрыялаў, найноўшых тэхналогій, якія якраз і накіраваныя на перапрацоўку другасных рэсурсаў. Для нас вельмі важна не толькі прыняццем канкрэтнага закона забяспечыць дасягненне Мэт устойлівага развіцця, а прыняць праграмныя дакументы, якія б адлюстроўвалі комплексны падыход да іх дасягнення».

Генадзь ТРУБІЛА, першы намеснік міністра жыллёва-камунальнай гаспадаркі Беларусі, расказаў падрабязней аб праграмах «Чыстая вада» і «Абыходжанне з цвёрдымі камунальнымі адходамі (ЦКА)»: «Задача стаіць да 2020 года забяспечыць якаснай пітной вадой насельніцтва, у якога ўжо існуюць трубаправоды і водазабеспячэнне. І да 2025 года — поўнасцю ўсё насельніцтва. Для гэтага нам неабходна за два гады пабудаваць каля 500 станцый абезжалезвання вады». Што датычыцца ЦКА, то мэта стаіць да 2025 года атрымаць каля 25 % другасных матэрыяльных рэсурсаў з цвёрдых камунальных адходаў.

Іаана КАЗАНА-ВІШНЯВЕЦКІ, пастаянны каардынатар ААН, пастаянны прадстаўнік ПРААН у Беларусі, падкрэсліла, што наша краіна адрозніваецца на фоне іншых: «У тым сэнсе, што тут сістэма каардынацыі работы па Мэтах устойлівага развіцця вельмі добра ўжо пабудавана. Зараз неабходна нам напоўніць гэту сістэму каардынацыі канкрэтнымі праектамі і рухам наперад, звязаць з парадкам-2030. Развіваем праекты, якія накіраваны на ўстойлівае развіццё ўвогуле, але і з прынцыпам, каб нікога не пакінуць убаку, каб звяртаць увагу на ўразлівыя катэгорыі. Гэта могуць быць людзі з інваліднасцю, тыя, хто не мае доступу да нейкіх паслуг ці магчымасцяў, напрыклад уладкавацца на працу». Гэта дастаткова складаныя праекты, у якіх важны партнёрскія адносіны, у тым ліку паміж рознымі галінамі і ўзроўнямі ўлады, недзяржаўнымі арганізацыямі, прыватным бізнесам, каб усе разам глядзелі, што яшчэ палепшыць для канкрэтных людзей.

Надзея АНІСОВІЧ