24 верасня, чацвер

Вы тут

5 спектакляў на тыдзень, якія можна паглядзець анлайн


Каранавірус усё яшчэ прымушае заставацца дома, таму каб прыхарашыць свае вечары ў самаізаляцыі, прапануем глядзець тэатральныя пастаноўкі анлайн. Праз пандэмію тэатры ўсяго свету рэгулярна выкладваюць запісы сваіх работ у агульны доступ, дзякуючы чаму гледачы атрымалі магчымасць адкрыць для сябе сусветныя цэнтры опернага мастацтва, Брадвей, калектывы «экзатычных» краін, сучасны цырк і ўвогуле найлепшыя сцэны свету. На гэтым тыдні анлайн можна ўбачыць прэм’еру РТБД, пастаноўку Каралеўскага нацыянальнага тэатра, монаспектакль з Эндру Скотам і іншае.


«Профіт» у Рэспубліканскім тэатры беларускай драматургіі

На сёння гэта галоўнае: праз некалькі гадзін — а сёмай 12 мая — адзін з найлепшых беларускіх тэатраў здзейсніць спрэчны пасаж і арганізуе анлайн-прэм’еру сваёй новай пастаноўкі «Профіт» паводле п’есы «Даходнае месца» Аляксандра Астроўскага. Рэжысёр і мастацкі кіраўнік РТБД Аляксандр Гарцуеў асучасніў класіка і перанёс дзеянне з XIX у пачатак XXI стагоддзя, а таксама паваражыў над сюжэтам і нават дадаў свайго персанажа. Гэта і цікавіць найбольш: як у нашым часе будзе ўвасоблены сюжэт пра прынцыповага чыноўніка, які жадае заставацца сумленным, але трапляе пад ўздзеянне жонкі і наваколля. У пастаноўцы задзейнічаны акцёры Арцём Курань і Ганна Семеняка — сужэнцы сыграюць сужэнцаў, а таксама Максім Шышко, Людміла Сідаркевіч, Дзмітрый Давідовіч ды іншыя.

«Антоній і Клеапатра» ў Нацыянальным тэатры (Лондан)

Каралеўскі нацыянальны тэатр, на сцэне якога можна пастаянна бачыць выдатную рэжысуру і вядомых акцёраў (напрыклад, пастаноўка «Франкенштэйн» з удзелам Бенедыкта Камбэрбэтча застаецца абсалютным хітом гэтай сцэны), абнаўляе свой анлайн-рэпертуар штотыдзень. Да чацвярга 14 мая на YouTube-канале тэатра можна паглядзець спектакль «Антоній і Клеапатра» паводле Уільяма Шэкспіра са сцэнамі гвалту і вядомымі кінаакцёрамі Рэйфам Файнсам з Сафі Аканедай у галоўных ролях. Сюжэт расказвае пра гарачае каханне паміж рымскім военачальнікам Маркам Антоніем і егіпецкай царыцай Клеапатрай, на фоне якога адбываюцца смерць Цэзара, палітычныя інтрыгі і вайна. Пасля «Антонія і Клеапатры» Нацыянальны тэатр пакажа паспяховы спектакль «Хронікі цырульні», дзе за аснову ўзята традыцыя афрыканскіх мужчын абмяркоўваць надзённае ў цырульнях — ён будзе даступны на YouTube з 14 да 21 мая. Расклад астатніх трансляцый можна знайсці на сайце тэатра, запісы суправаджаюцца англійскімі субтытрамі.


«Золата Рэйна» ў Венскай дзяржаўнай оперы

 

Тэатр, да якога вандруюць аматары оперы са ўсяго свету, амаль кожны дзень паказвае нешта новае са сваіх архіваў, хоць трансляцыі і паўтараюцца. Оперы і балеты апошняга дзесяцігоддзя, дзеля якіх у гэтым будынку збіралася шматтысячная публіка ў бліскучых строях, цяпер можна глядзець проста на канапе, трэба толькі зарэгістравацца на сайце. 14 мая, напрыклад, можна «схадзіць» на адну з найноўшых пастановак тэатра — пастаўленую ў 2019 годзе оперу Рыхарда Вагнэра «Золата Рэйна», дзе дырыжорам выступае нямецкі маэстра Аксель Кобер. На заўтра, 13 мая, запланаваны паказ оперы-буфа «Дон Паскуале» Гаэтана Даніцэці, прэм’ера якой адбылася ў 2016-м, а адразу пасля «Золата Рэйна» будзе паказаны яшчэ адзін Вагнэр — опера «Валькірыя» ў пастаноўцы 2018 года.


«Марская дамба» — тэатр Traverse (Шатландыя) і Hudson Theatre (Брадвей)

Цяпер ідзем у эдынбургскі тэатр Traverse і на Брадвей адначасова, але толькі ўмоўна: у першым больш за дзесяць гадоў таму адбылася прэм’ера монаспектаклю «Марская дамба» паводле п’есы Саймана Сцівенса. Зграў у ім Эндру Скот, якога вы ведаеце па ролі Марыярці ў серыяле «Шэрлак», — уласна для гэтага акцёра п’еса і была напісана. А ў мінулым годзе п’еса была пастаўлена на Брадвеі — галоўную і адзіную ролю ў пастаноўцы Hudson Theatre сыграў Джэйк Джыленхал. Дык вось у 2012 годзе сам Сцівенс і рэжысёр Эндру Портэр зрабілі экранную версію спектакля — у выглядзе кароткаметражнага фільма, а цягнецца ўсё крыху больш за паўгадзіны, яна даступная на YouTube-канале да 18 мая. Сутнасць сюжэта заключаецца ў тым, што галоўны герой — фатограф Алекс — з эмоцыямі і чорным гумарам расказвае пра трагічную смерць сваёй восьмігадовай дачкі у выніку няшчаснага здарэння. Відэа суправаджаецца англійскімі субтытрамі.


Шоу Цырка дзю Салей

Каб не ўсё было так сур’ёзна, крыху збочым у бок відовішчаў. Іх знакамітая стваральніца канадская кампанія Cirque du Soleil праз каранавірус вымушана звальняе супрацоўнікаў і перажывае не найлепшыя свае часы, але каб заставацца з гледачамі, рэгулярна выкладвае на YouTube-канал запісы сваіх гадзінных выступленняў. Тут харэаграфія, музыка, трукі, новыя тэхналогіі і фокусы-покусы (і ніякіх жывёл) — усё, што не перастае захапляць публіку, дзе б шматлікія трупы цырка ні выступалі. Новае шоу на шэсцьдзесят хвілін з’яўляецца ў агульным доступе кожны тыдзень. Сачыць за тым, што адбываецца, можна на сайце Цырка дзю Салей.

Вольга МІЦКЕВІЧ

Выбар рэдакцыі

Грамадства

Як бяздзетнай пары завесцi дзiця?

Як бяздзетнай пары завесцi дзiця?

У гэтым праекце знаёмім вас з бяздзетнымi парамi, якiя хацелі, але праз стан свайго здароўя не маглі мець дзяцей.

Культура

Аляксандр Радзькоў. З кнігі «Мой фiзмат»

Аляксандр Радзькоў. З кнігі «Мой фiзмат»

Працягваем публікаваць урыўкі з кнігі.

Грамадства

Марына Мулявiна: Пасля разводу бацькi заставалiся блiзкiмi людзьмi

Марына Мулявiна: Пасля разводу бацькi заставалiся блiзкiмi людзьмi

Дачка галоўнага «песняра» распавяла пра сямейныя традыцыi.