СПАБОРНІЦТВА ЗА ЛЮБОЎ СПАЖЫЎЦА

Ці сфарміравалася ў беларусаў нацыянальная брэндавая свядомасць? На гэтае пытанне ўжо цяпер можна безапеляцыйна адказаць «не» ці працягваць разважаць пра яе нядаўняе станаўленне. Абсалютна новая прэмія «Народная марка» абяцае стаць каталізатарам і аўтарытэтным сімвалам спажывецкага прызнання. Каб вызначыць лепшых і ўзнагародзіць іх сваім ухваленнем, беларусам прапануецца адчыніць уласныя шафы са «шкілетамі» спажывецкіх пераваг.

...Кожны вытворца жадае ведаць, чым ён цікавіць (або не) пакупніка-кліента. Прэмія «Народная марка» стане выдатнай нагодай даведацца, наколькі беларускія і замежныя брэнды адпавядаюць густам сваіх спажыўцоў. Перамогі ў 120 намінацыях тавараў і паслуг адлюструюць лепшых, ухваленых народным выбарам уладальнікаў гандлёвых знакаў. Дзеля гэтага кожны ўдзельнік галасавання з 11 лістапада па 8 снежня запоўніць анкету, у якой пазначыць свае брэндавыя перавагі ў кожным з раздзелаў. Аматары цыгарэт пакінуць уласныя думкі пры сабе: катэгорыі «тытунёвая прадукцыя» ў спісе намінацый няма. Дарэчы, думку аднаго чалавека, ці, дакладней, ІР-адраса камп'ютара, улічаць толькі аднойчы. Вынікі конкурсу стануць вядомымі 16 студзеня 2014 года на цырымоніі ўзнагароджання. Паглядзець яе можна будзе на тэлеканале «Беларусь-1» у лютым 2014-га.
Пакуль урачыстая трансляцыя чакаецца толькі ў недалёкай перспектыве, рэальная дзейнасць прэміі стартуе ўжо цяпер. Уладальнікі гандлёвых знакаў падаюць на ўдзел заяўкі, што каштуе (трэба заўважыць) 350 USD. Зусім хутка спажыўцы пачнуць ацэньваць, каму яны давяраюць і хто падабаецца найбольш. Дарэчы, матывацыяй не прапусціць гэтую дзею і ўдзячна ёй пасадзейнічаць можа стаць не толькі актыўная грамадзянская пазіцыя, але і магчымасць выйграць добры прыз. За неабыякавасць і думку, то бок запоўненую анкету, арганізатары прэміі ўзнагародзяць сотняй сярэбраных і дзясяткам залатых зліткаў! Крыху пра арганізатараў. У іх якасці — рэкламнае агенцтва «Белая Карона». Дапамагае яму Асацыяцыя рэкламных арганізацый Беларусі і Міністэрства гандлю РБ. Дакладнасць выніковых звестак гарантуе Назіральная рада прэміі ў складзе прадстаўнікоў міністэрстваў, ведамстваў, прафесійных бізнэс-аб'яднанняў і СМІ.
«Для многіх беларускіх вытворцаў унутраны рынак — другасны.
І нават не другасны, а другарадны. Гэта крыўдзіць. З пункту погляду тэорыі маркетынгу, фундаментам, асновай, надзеяй у няпростыя часы можа быць толькі ўнутраны рынак. Менавіта таму трэба імкнуцца дасягаць лаяльнасці і любові свайго спажыўца, на што і накіравана мэта новай прэміі, — перакананы былы дацэнт кафедры лагістыкі і цэнавай палітыкі Беларускага дзяржаўнага ўніверсітэта, дэпутат Палаты прадстаўнікоў Нацыянальнага сходу Валерый Барадзеня. — Калі зайсці на форумы, то часта можна ўбачыць меркаванні, што беларускае не заўжды добрае. Калі ж мы прыходзім у краму, то мяняем свой погляд і з задавальненнем купляем і выкарыстоўваем беларускую прадукцыю».
Сімвал прэміі «Народная марка», якая сёлета толькі нараджаецца, — стылізаваны пад фігуру чалавека элемент слуцкага пояса. Убіраючы ў сябе моц беларускага характару, прэмія спадзяецца стаць па-сапраўднаму народнай і папулярнай.

Любоў КАСПЯРОВІЧ.