Аснова беларускай ідэі — гэта патрыятызм і гатоўнасць зберагаць сваю спадчыну
Аб гэтым заявіў кіраўнік дзяржавы Аляксандр Лукашэнка на цырымоніі ўручэння прэміі Прэзідэнта «За духоўнае адраджэнне», спецыяльных прэмій Прэзідэнта дзеячам культуры і мастацтва, спецыяльнай прэміі Прэзідэнта «Беларускі спартыўны Алімп» 2013 года.
Адсутнасць зімовага надвор'я на вуліцы была цалкам кампенсаваная казачна-святочнай атмасферай у Палацы Рэспублікі. Іскрыстыя дрэвы, марозныя ўзоры, убеленая снегам ёлка — тут было ўсё, акрамя, бадай, нізкай тэмпературы. Бо традыцыйна на Каляды на сцэне Палаца Рэспублікі сабраліся самыя неабыякавыя людзі краіны. Тыя, цяпла сэрцаў якіх хапае на цэлы свет. Тыя, побач з кім заўсёды светла і хораша. Тыя, каго кіраўнік дзяржавы справядліва назваў «падзвіжнікамі на ніве адраджэння Айчыны», лаўрэаты прэміі «За духоўнае адраджэнне», спецыяльных прэмій Прэзідэнта Рэспублікі Беларусь дзеячам культуры і мастацтва і «Беларускі спартыўны Алімп».
Традыцыйна гэтыя высокія ўзнагароды кіраўнік беларускай дзяржавы ўручае разам з кіраўніком Беларускай праваслаўнай царквы. Сёлета ўпершыню побач з Аляксандрам Лукашэнка вітаў герояў свята нядаўна прызначаны Патрыяршы Экзарх усяе Беларусі Мітрапаліт Мінскі і Слуцкі Павел. Менавіта з гэтай падзеі і распачаў сваю прамову на цырымоніі ўручэння прэмій Аляксандр Лукашэнка.
«Сёння Праваслаўная царква з'яўляецца адной з духоўных апораў грамадства і адзінай канфесіяй, з якой наш урад заключыў Пагадненне аб супрацоўніцтве, — сказаў Прэзідэнт. — Для нас вельмі важна, што новым прадстаяцелям Беларускай праваслаўнай царквы стаў чалавек мудры, вопытны, які пабачыў свет».
Аляксандр Лукашэнка выказаў надзею, што Праваслаўная царква і надалей будзе актыўна праводзіць сваё сацыяльнае служэнне, асветніцкую дзейнасць, і паабяцаў дапамогу ў рэалізацыі ўсіх ініцыятыў яе новага кіраўніка. Ён папрасіў народ і беларускую інтэлігенцыю прыняць Мітрапаліта Паўла як свайго, роднага па духу чалавека. Сказаў Прэзідэнт прыязныя і ўдзячныя словы і ў адрас ганаровага Экзарха ўсяе Беларусі Мітрапаліта Філарэта.
Мітрапаліт Павел у сваю чаргу з задавальненнем адзначыў, што ў гэтыя калядныя дні ў Беларусі робіцца акцэнт на духоўнае адраджэнне, а гэта, на яго думку, спрыяе працвітанню краіны. Ён перадаў ад імя Свяцейшага Патрыярха Маскоўскага і ўсяе Русі Кірыла Прэзідэнту Беларусі і ўсяму беларускаму народу блаславенне, мір і любоў.
Разважаючы пра сацыяльную місію культуры і гуманітарных ведаў, Прэзідэнт падкрэсліў, што «любы матэрыяльны дабрабыт мае на ўвазе трывалы духоўны фундамент». Ён падкрэсліў важнасць захавання беларусамі ўласнай ідэнтычнасці і заклікаў вылучыць такую беларускую ідэю, якая аб'яднала б усіх грамадзян, ад акадэміка да селяніна.
Па сутнасці, тыя людзі, якія ўчора стаялі на сцэне Палаца Рэспублікі з букетамі кветак і дыпломамі, працуюць і на беларускую ідэю, і на росквіт нашай краіны. Гэта сапраўды было свята прыгожых людзей, прыклад якіх здольны натхняць і запальваць сэрцы астатніх.
«Асновай беларускай ідэі з'яўляюцца патрыятызм і гатоўнасць зберагаць сваю спадчыну. Дзяржава заўсёды гатова падтрымаць ініцыятывы, накіраваныя на паляпшэнне жыцця ва ўсіх аспектах», — выказаў упэўненасць кіраўнік дзяржавы.
Аляксандр Лукашэнка прывёў словы Уладзіміра Караткевіча, які напісаў, што «кожны чалавек носіць сваё неба з сабой». «Таму, бядуючы аб тым, што вакол усё не так ідэальна, як хацелася б, не спяшайцеся абвінавачваць у гэтым толькі ўладу. Улада і інтэлігенцыя на роўных у адказе за краіну», — сказаў кіраўнік дзяржавы.
Вольга Мядзведзева.
Сярод лаўрэатаў прэміі «За духоўнае адраджэнне» — епіскап Магілёўскі і Мсціслаўскі Сафроній, які ўнёс значны асабісты ўклад у духоўнае адраджэнне Беларусі, сацыяльную і асветніцкую дзейнасць.
За дасягненні ў развіцці сістэмы медыцынскай рэабілітацыі дзяцей, укараненне сучасных тэхналогій, якія даюць магчымасць адаптаваць хворых дзяцей і дзяцей-інвалідаў у грамадстве, узнагароды ўдастоены калектыў Рэспубліканскай дзіцячай бальніцы медыцынскай рэабілітацыі.
Прэмія прысуджана калектыву Быхаўскага псіханеўралагічнага дома-інтэрната за шматгадовую плённую працу па сацыяльнай абароне насельніцтва, рэалізацыю гуманістычнай мадэлі сацыяльнай работы з людзьмі з псіханеўралагічнымі захворваннямі.
Рэспубліканскае грамадскае аб'яднанне «Беларускі дзіцячы фонд» адзначана прэміяй за значны ўклад у абарону правоў дзяцей і рэалізацыю сацыяльна значных гуманітарных праектаў.
За высокія дасягненні ў справе выхавання і вяртання да паўнацэннага жыцця дзяцей, якія аказаліся ў сацыяльна небяспечным становішчы, захавання сям'і для кожнага дзіцяці прэміі «За духоўнае адраджэнне» ўдастоена начальнік інспекцыі па справах непаўналетніх міліцыі грамадскай бяспекі УУС Мінскага райвыканкама Вольга Чамаданава.
Аляксандр Лукашэнка таксама падпісаў указ, у адпаведнасці з якім за значныя творчыя і педагагічныя дасягненні, якія атрымалі грамадскае прызнанне, прысуджаны 10 спецыяльных прэмій Прэзідэнта Рэспублікі Беларусь дзеячам культуры і мастацтва.
Прэмія прысуджана аўтарскаму калектыву АТН Белтэлерадыёкампаніі ў складзе рэдактара Алены Борматавай, рэжысёра Марыі Жукавай і загадчыка аддзела навін культуры Міхаіла Равуцкага за стварэнне дакументальных фільмаў «Слуцкія паясы. Тайныя знакі», «Міхаіл Савіцкі. Тайны біяграфіі», «Радзівілы. Тайны сям'і», «Нацыянальная дылогія. Статут ВКЛ», «Нацыянальная трылогія: Герб. Гімн. Сцяг», «Імя яму — Храм».
Аўтарскі калектыў дзіцячага тэлевізійнага музычнага конкурсу «Я спяваю!» ЗАТ «Другі нацыянальны тэлеканал» у складзе вядучага конкурсу заслужанага дзеяча мастацтваў Расійскай Федэрацыі Дзмітрыя Астрахана, выканаўчага прадзюсара дырэкцыі спецыяльных праектаў Алены Лобач, дырэктара дырэкцыі спецыяльных праектаў Анжэлы Мікульскай удастоены прэміі за значны ўклад у развіццё творчых здольнасцяў таленавітых дзяцей-сірот, дзяцей-інвалідаў, дзяцей з няпоўных і шматдзетных сем'яў.
За высокія творчыя дасягненні ў галіне выяўленчага мастацтва, актыўную выставачную дзейнасць прэміяй адзначаны аўтарскі калектыў у складзе членаў Беларускага саюза мастакоў Таццяны Рудэнка і Юрыя Рудэнкі.
Прэмія прысуджана заслужанаму аматарскаму калектыву Рэспублікі Беларусь студыі цыркавога мастацтва «Арэна» за значны ўклад у развіццё і папулярызацыю аматарскага цыркавога мастацтва.
Прэміі таксама ўдастоены калектыў Гродзенскага абласнога тэатра лялек, які ўнёс значны ўклад у развіццё тэатральнага мастацтва і міжнародных культурных сувязяў.
Сярод лаўрэатаў — намеснік дырэктара па вучэбнай рабоце сярэдняй школы № 3 горада Наваполацка, кіраўнік узорнага хору «Звонкія галасы» Альберт Кажушкевіч, які адзначаны прэміяй за высокія дасягненні ў эстэтычным выхаванні творчай моладзі.
За стварэнне высокамастацкіх жывапісных твораў прэмія прысуджана мастаку-жывапісцу, члену грамадскага аб'яднання «Беларускі саюз мастакоў» Уладзіміру Кожуху.
Галоўны рэдактар рэдакцыі часопіса «Полымя» выдавецкага дома «Звязда» Мікалай Мятліцкі ўдастоены прэміі за пераклад на беларускую мову кнігі «Пад крыламі Дракона. Сто паэтаў Кітая».
За папулярызацыю лепшых узораў песеннага мастацтва, значны ўклад у патрыятычнае выхаванне грамадзян лаўрэатам прэміі стаў народны вакальны ансамбль ветэранаў вайны, працы і Узброеных Сіл «Памяць сэрца» Рэспубліканскага Палаца культуры ветэранаў.
Прэміі таксама ўдастоены дырэктар Антопальскага раённага Цэнтра рамёстваў Драгічынскага раёна Брэсцкай вобласці Галіна Сцепанюк за адраджэнне і захаванне самабытнай народнай творчасці і традыцыйных рамёстваў рэгіёна.
Прыняцце ўказаў з'яўляецца яскравым сведчаннем увагі дзяржавы да пытанняў фарміравання ў беларускім грамадстве здаровай духоўнай атмасферы, распаўсюджвання ідэй чалавекалюбства, дабрачыннасці і міласэрнасці, развіцця беларускай культуры і мастацтва.
Акрамя таго, кіраўнік дзяржавы падпісаў указ «Аб прысуджэнні спецыяльнай прэміі Прэзідэнта Рэспублікі Беларусь «Беларускі спартыўны Алімп» 2013 года».
Лаўрэатамі прэміі сталі старшы трэнер-выкладчык па веславанні на байдарках і каноэ Мінскай дзяржаўнай абласной сярэдняй школы-вучылішча алімпійскага рэзерву Людміла Дрозд, трэнер-выкладчык аддзялення цяжкай атлетыкі Магілёўскага дзяржаўнага вучылішча алімпійскага рэзерву Анатоль Лабачоў і трэнер-выкладчык Гродзенскай спецыялізаванай дзіцяча-юнацкай школы алімпійскага рэзерву № 3 Марына Пратасава.
Прэмія прысуджана за актыўную дзейнасць па папулярызацыі фізічнай культуры і спорту, развіцці фізкультурна-спартыўных традыцый, якія садзейнічаюць гарманічнаму фарміраванню асобы.
Сярод выхаванцаў узнагароджаных трэнераў-выкладчыкаў шматразовыя пераможцы і прызёры Алімпійскіх гульняў, чэмпіянатаў свету і Еўропы, Сусветнай Універсіяды 2013 года.
Сумесныя праекты ядзерных тэхналогій.