З цікавых геапалітычных навін студзеня можна назваць зробленае Джымам О'Нілам, аналітыкам банка Goldman Sachs, прадказанне, што ў бліжэйшы час можна чакаць з'яўлення новага інтэграцыйнага ўтварэння — «МІНТ».
Гэты аналітык вядомы тым, што ў свой час прыдумаў абрэвіятуру БРІК (па першых літарах такіх краін, як Бразілія, Расія, Індыя і Кітай) і прадказаў гэтым дзяржавам перспектывы засланіць сабой Захад па сукупнай эканамічнай магутнасці праз некалькі дзесяцігоддзяў. Цікава, што праз некалькі гадоў пасля гэтага прадказання кіраўнікі вышэйзгаданых дзяржаў сапраўды стварылі сумесны блок, а пасля да іх далучылася і Паўднёвая Афрыка, у сувязі з чым назва блока змянілася на БРІКС.
Якія ж краіны ўвойдуць у новы блок пад назвай «МІНТ», на думку Джыма О'Ніла? Гэта Мексіка, Інданезія, Нігерыя і Турцыя, насельніцтва якіх, разам узятае, дасягнула планкі ў 616 мільёнаў чалавек і будзе працягваць імкліва павялічвацца ў бліжэйшыя гады. Калі прагноз аналітыка спраўдзіцца, у БРІКС з'явіцца новы магутны саюзнік, які зробіць завяданне магутнасці заходняга свету на глабальнай арэне яшчэ больш хуткім.
Кітай выйшаў на першае месца ў свеце па аб'ёме свайго знешняга гандлю,
які дасягнуў па выніках 2013 года вялізнай лічбы ў 4,16 трыльёна долараў. Пры гэтым тэмпы росту гэтага паказчыка перавысілі звесткі 2012 года, што сведчыць аб станоўчай дынаміцы росту тавараабароту КНР.
Што азначае гэта падзея з пункту гледжання сусветнай палітыкі? Лідарства Кітая ў імпарце і экспарце на глабальнай арэне азначае ўсё большы інтарэс да яго з боку як самых уплывовых сусветных экспарцёраў, так і імпарцёраў. Гэтыя бізнес-структуры ўсё больш зацікаўлены ў спрыяльным супрацоўніцтве з Кітаем для ўласнага працвітання. І, натуральна, яны маюць вялізны ўплыў на палітыкаў у сваіх краінах. Таму палітычныя эліты многіх краін свету, якія залежаць ад прыхільнасці да іх прадпрымальніцкай супольнасці ў сваёй палітычнай дзейнасці, вымушаны лічыцца з Кітаем з кожным годам усё ў большай ступені. І гэта, зразумела ж, выкарыстоўваецца ўрадам Кітая для росту магутнасці краіны на сусветнай арэне.
2014 год цікавы для большасці экспертаў па геапалітыцы тым, што адбудзецца з Афганістанам пасля вываду адтуль кааліцыйных сіл, асноўную масу якіх складаюць амерыканскія салдаты. На гэтым фоне чарговае абвастрэнне адносін Кабула і Вашынгтона не магло застацца незаўважаным. Прычына гэтага дастаткова дзіўная на фоне імкнення ЗША пазіцыянаваць сябе як вядучую праваабарончую дзяржаву ў свеце.
Праблема ў тым, што ўрад Афганістана вырашыў адпусціць частку з арыштаваных амерыканцамі вязняў, якія ўтрымліваюцца на ваеннай базе Баграм, толькі нядаўна перададзенай амерыканцамі ў распараджэнне ўлад Афганістана. Гэта тлумачыцца тым, што ў дачыненні да іх няма ніякіх доказаў, якія пацвярджалі б іх злачынную дзейнасць. У Вышангтоне ж запэўніваюць, што гэта небяспечныя тэрарысты, і няхай ніякіх цвёрдых доказаў і няма, іх трэба трымаць гадамі пад арыштам або аддаць пад суд. І пагражаюць пагаршэннем адносін ЗША з Афганістанам, калі гэтыя вязні будуць вызвалены. Ці не праўда, цікавая пазіцыя ў дачыненні да абароны правоў чалавека па-амерыканску?
10 студзеня завяршыўся скандал паміж Індыяй і ЗША, які пачаўся яшчэ ў снежні па прычыне арышту амерыканскай паліцыяй намесніка кіраўніка генконсульства Індыі Дэвіяні Кхабрагадэ ў Нью-Ёрку. Ёй дазволілі паехаць дамоў у Індыю. Нягледзячы на дыпламатычны імунітэт, амерыканская паліцыя арыштавала 12 снежня 2013 года Дэвіяні Кхабрагадэ на вуліцы і дастаткова пагардліва абыходзілася з ёй, абвінаваціўшы ў махлярстве пры афармленні візы для сваёй хатняй работніцы і пратрымаўшы некалькі гадзін у камеры з наркаманамі.
Абурэнне індыйскага ўрада было такім вялікім, што амерыканцам давялося ў выніку адступаць. Гэтаму садзейнічалі і меры, прынятыя Індыяй: каля пасольства ЗША ў Нью-Дэлі знялі загароду, а ў супрацоўнікаў консульскага аддзела пасольства ЗША і амерыканскіх генеральных консульстваў у Індыі анулявалі ідэнтыфікацыйныя карткі, без якіх іх далейшае знаходжанне ў краіне аказалася пад пытаннем. З якой мэтай амерыканцы сапсавалі свае дастаткова неблагія да гэтага адносіны з Індыяй, абыходзячыся з дыпламатам такім варварскім чынам, так і засталося загадкай. Магчыма, уся справа ў банальным адчуванні ўсёдазволенасці і беспакаранасці, дамінуючым у некаторых чыноўнікаў ЗША за гады панавання амерыканцаў на сусветнай арэне.
Заканамерны кірунак набылі падзеі ў Сірыі: фарміраванні баевікоў, якія ўжо больш за два гады ваююць з законным урадам, перасварыліся паміж сабой і пачалі поўнамаштабныя ваенныя дзеянні. Бітва вядзецца паміж групоўкамі «Ісламскі фронт» і «Ісламская дзяржава Ірака і Леванта». Яшчэ адной сірыйскай сенсацыяй студзеня стала рэзкае змяненне былой пазіцыі Турцыі па сірыйскім пытанні. 9 студзеня ў інтэрв'ю міністра замежных спраў Турцыі Ахмет Давутаглу прагучала, што рэжым Башара Асада можна назваць «меншым злом» у параўнанні з няправільнымі метадамі дзеянняў радыкальных груповак у Сірыі.
Сяргей КІЗІМА,
доктар палітычных навук.
Што за таемнымі дзвярыма?