Прэзідэнт Беларусі Аляксандр Лукашэнка 21 лютага прыняў з дакладам міністра замежных спраў Уладзіміра Макея. Аб гэтым БЕЛТА паведамілі ў прэс-службе беларускага лідара.
Аляксандр Лукашэнка нагадаў, што крытэрыі работы на знешнепалітычным вектары застаюцца нязменныя. «Галоўнае — гэта падтрыманне нашых эканамічных інтарэсаў. Апошнім часам прапануецца адкрыццё шэрагу пасольстваў за мяжой. Я абсалютна не супраць гэтага, але пасольствы павінны адкрывацца выключна з гэтай мэтай, — падкрэсліў кіраўнік дзяржавы. — Нам ніякай глабальнай палітыкай у свеце займацца няма чаго. Калі ў нас ёсць эканамічны інтарэс у нейкай краіне ў плане дыверсіфікацыі, перш за ўсё экспарту, знешняга гандлю, тады там і наша палітыка». Прэзідэнт запатрабаваў далажыць аб рабоце па выкананні раней дадзеных даручэнняў, у тым ліку ў сферы еўразійскай інтэграцыі, падрыхтоўкі дагавора аб Еўразійскім эканамічным саюзе. Пры гэтым Аляксандр Лукашэнка папрасіў зрабіць акцэнт менавіта на праблемных момантах. «Гэта працэс новы, ён не можа ісці без якіх-небудзь ускладненняў, праблем. Гэтага проста не бывае», — заўважыў беларускі лідар. Уладзімір Макей праінфармаваў Прэзідэнта аб пазіцыях бакоў пры падрыхтоўцы дагавора аб стварэнні Еўразійскага эканамічнага саюза. Асобна кіраўніку дзяржавы было даложана аб перагаворах, якія вядуцца Расіяй і Казахстанам у кантэксце ўступлення Казахстана ў СГА. Прэзідэнт даў канкрэтныя даручэнні па падрыхтоўцы адпаведных пазіцыйных матэрыялаў для абмеркавання ў ходзе маючага адбыцца пасяджэння «тройкі», якое намечана на сярэдзіну сакавіка. «Я хацеў бы пачуць інфармацыю аб нашай рабоце на заходнім напрамку. Думаю, ва ўсходнім напрамку ў нас праблем у прынцыпе няма, — сказаў Аляксандр Лукашэнка. — Я ўчора тройчы размаўляў з Прэзідэнтам Расійскай Федэрацыі. У бліжэйшы час, я думаю, мы з Уладзімірам Уладзіміравічам знойдзем у сваім графіку магчымасць сустрэцца і абмеркаваць яшчэ раз сумесныя дзеянні ў сучасных умовах». Прэзідэнт нагадаў, што Беларусь імкнецца праводзіць шматвектарную палітыку. «Мы яе будзем ажыццяўляць. Нам не патрэбны ніякія праблемы на Захадзе і тым больш на Усходзе. Але гэта не значыць, што мы пачынаем шарахацца, штосьці выгадваць, змяняць нашы крытэрыі, палітыку. Наша палітыка застаецца нязменнай. Яна вызначана маім Пасланнем да беларускага народа і парламента», — адзначыў Аляксандр Лукашэнка. Уладзімір Макей далажыў, што на праведзенай некалькі дзён таму калегіі МЗС былі падведзены вынікі работы і пастаўлены задачы на бягучы год. Паводле слоў міністра, палавіна з пяці дзясяткаў беларускіх пасольстваў па выніках года не выканалі ўстаноўленых паказчыкаў у частцы развіцця экспарту і прыцягнення інвестыцый. «Дадзены абсалютна крытычныя ацэнкі рабоце і цэнтральнага апарату МЗС, і загранустаноў, — сказаў міністр. — У бліжэйшы час будзе падрыхтаваны адпаведны загад МЗС, у якім будуць адлюстраваны ўсе гэтыя моманты і зроблены высновы». Што датычыцца адносін Беларусі з Еўрасаюзам і ЗША, Уладзімір Макей адзначыў, што ў гэтай сферы намеціліся пэўныя зрухі. «Мы лічым, што сур'ёзнага прарыву не дасягнута з улікам таго, што ў нашых адносінах існуюць рэальныя перашкоды, якія, на жаль, не могуць быць пераадолены на працягу аднаго дня або месяца, але намеціліся зрухі, якія даюць магчымасць гаварыць аб тым, што з'явілася надзея на нармалізацыю нашых адносін з ЕС і ЗША», — сказаў міністр. Уладзімір Макей таксама далажыў, як вядзецца работа над пагадненнямі з ЕС аб аблягчэнні візавага рэжыму і аб рэадмісіі. Прэзідэнт заявіў, што беларускі бок гатовы да адкрытага і шчырага дыялогу з еўрапейскімі партнёрамі, ЗША, але не за кошт ушчамлення сваіх нацыянальных інтарэсаў. «МЗС будзе кіравацца гэтымі ўстаноўкамі кіраўніка дзяржавы ў ажыццяўленні сваёй дзейнасці. Мы бачым, да чаго прыводзіць у тым ліку і патуранне радыкалізму і экстрэмізму з боку некаторых нашых еўрапейскіх партнёраў на прыкладзе некаторых суседніх краін», — сказаў Уладзімір Макей па выніках сустрэчы.
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.