Фестываль беларускай песні і паэзіі адкрывае новыя творы і імёны
Ці вы заўважалі: калі песня добрая, то словы з яе хочацца тут жа запомніць, альбо нават яны запамінаюцца самі сабой. Проста кладуцца на сэрца і ўсё. І песня жыве ў сваім гарманічным адзінстве — мелодыі і слоў. Але яна не жыве сама па сабе — без чалавека. Ёй, каб жыць, не хапае менавіта яго сэрца, якому хочацца спяваць. Якому праз песню хочацца пагаварыць пра каханне і светаадчуванне, пра надзеі і людзей, пра сум і смутак, пра пяшчоту і істотнасць. Істотна: Беларусь — краіна прыгожых песень. Кожны раз падчас Нацыянальнага фестывалю песні і паэзіі ў Маладзечне ўзнікаюць думкі пра гэта. І следам пытанне: калі ёсць цудоўныя беларускія песні, то гэта каму-небудзь трэба?..
Калі меркаваць па гасцях, якія завітваюць на фестываль, то гэта трэба дзяржаве. Вядома, што менавіта родная песня на роднай мове, якая жыве сярод людзей, — самае відавочнае сведчанне таго, што яны адчувальныя да свайго, іх душа адгукаецца і далучаецца да адметнасці роднай культуры, яны нават самі могуць гэтага не ўсведамляць. А вось тыя, хто адказвае за падтрыманне і жыццяздольнасць беларускай культуры, усведамляць павінны. І гэта праяўляецца ў тым, чаму і як у нас ёсць гэты фестываль.
Міністр культуры Беларусі Барыс Святлоў перад канцэртам адкрыцця дзяліўся думкамі:
— На мой погляд, значнасць гэтага фестывалю адлюстравана ў яго назве: Нацыянальны фестываль беларускай песні і паэзіі. Нашы паэзія і песня як родныя сёстры ідуць рука аб руку, разам. Гэтае спалучэнне, якое было знойдзена яшчэ ў 1993 годзе, якраз і паказвае, што ён адпавядае самым глыбокім мастацкім запатрабаванням не толькі горада Маладзечна, але і ўвогуле нашай краіны.
Міністр прызнаўся, што яго любімая песня — «Купалінка». Цікава, ці ёсць у Беларусі чалавек, які не ведае гэтай песні, якая стала па праве народнай (праўда, даследчыкі сцвярджаюць, што мы ведаем яе дзякуючы прафесійнай працы таленавітага музыканта Уладзіміра Тэраўскага, імя якога згубілася ў часе з пэўных прычын). А песня перажыла чалавека — менавіта таму, што кранае вельмі глыбока. Вось, здаецца, дзіўна: ніхто яе наў-
мысна не «раскручваў», як сёння кажуць. Але ў спалучэнні з прачулымі простымі словамі яна стала беларускім хітом на дзесяцігоддзі.
Карыстаючыся выпадкам, «Звязда» задала міністру сваё пытанне, якое сёння найбольш непакоіць.
— Што можна зрабіць, каб беларуская песня станавілася папулярнай?
— Я лічу, што гэта ў першую чаргу павінна быць сістэматычная, велізарная і з вялікім унутраным заахвочваннем работа сродкаў масавай інфармацыі. Патрэбна, каб была выдатная паэзія, шлягеры на ўсе часы, каб былі выдатныя выканаўцы. Але мы сёння настолькі прызвычаіліся жыць у віртуальным свеце, што без дапамогі медыйных сродкаў не абыдзешся.
Дзеля папулярызацыі беларускага слова і песні, між іншым, быў заснаваны гэты фестываль. І тады на ім была выпрацавана свая формула. Яна дагэтуль застаецца актуальнай, на думку арганізатараў, сярод якіх і Мінскі аблвыканкам. Яго старшыня Сямён Шапіра адзначыў:
— Нацыянальны фестываль беларускай песні і паэзіі — гэта вялікая з'ява ў беларускай культурнай прасторы. У 1993 годзе ён пачаўся і за гэты час заняў пачэснае месца ў шэрагу 5 буйнейшых фестываляў нашай краіны. Па-другое, ён даў магчымасць убачыць таленавітых маладых выканаўцаў. Маладыя «зоркі» Беларусі сталі сапраўднымі майстрамі нашай эстрады. Па-трэцяе, фестываль дае штуршок беларускай інтэлігенцыі ствараць такія творы, каб выконваць іх у гэтай зале было гонарам. Ён таксама дае магчымасць нашаму грамадству (і асабліва адзначу — моладзі) дакрануцца да каштоўнасцяў беларускай паэзіі і песні. І што важна, падчас яго мы карыстаемся прыгожай роднай беларускай мовай.
Калі меркаваць па людзях, маладзечанцах, якія ўжо 21 год прыходзяць на фестываль, — у іх ёсць у гэтым патрэба. Слухачы пазнаюць вядомыя песні — і вуснамі прамаўляюць словы разам з артыстамі. Калі меркаваць па артыстах, якія спяваюць песні на беларускай мове, то для іх галоўнае — праз песню кантактаваць з людзьмі, распавядаць ім пра нешта. І калі песня глыбокая, то і на артыста можна паглядзець па-іншаму.
Вось хоць бы герой сёлетняга «Еўрабачання» Тэа (Юрый Вашчук) — выйшаў на сцэну як саліст Нацыянальнага акадэмічнага канцэртнага аркестра Беларусі. І ведаеце: Тэа класна спявае па-беларуску. І гэта можа быць тое, што сапраўды робіць яго артыстам, а не героем на дзень. Яшчэ адна артыстка — Людміла Грамовіч, якая заўсёды нават выглядаць імкнецца так, каб было зразумела, што яна спявае. Ці Наталля Тамела — адметны голас, з дапамогай якога спявачка падае песню як твор. Салісты аркестра сёлета прадсталі ў новай праграме «70 гадоў Перамогі». Дзяўчаты — у сукенках 40‑х гадоў, хлопцы — у гімнасцёрках. Але гэта толькі вонкавае. Каб стварыць вобраз песні, у якую ўжо ўкладзена душа. Ад першай жа «Праважала сына маці» — мурашкі па скуры. Яна дзеля гэтага і пісалася некалі Уладзімірам Мулявіным і былым малалетнім партызанам Валянцінам Тарасам — выклікаць моцныя пачуцці, нават шакіраваць. Песняроўская праграма «Праз усю вайну» была культурным шокам, калі з'явілася. Але, відаць, гэта наканаванасць беларусаў, пераканаўча і моцна спяваць пра тое, пра што хочацца маўчаць.
Песні мінулых гадоў… Ну якая ў іх таямніца, што нават і цяпер могуць кранаць душу? Мелодыка — так. Словы — вядома. І мова… Вось жа былі часы, калі цудоўныя песні зрабілі беларускую мову папулярнай нават за межамі рэспублікі. І гэта ў савецкі час, калі нацыянальнае падпарадкоўвалася інтэрнацыянальнаму. Але культурныя з'явы з рэспублік цяжка было перамагчы агульнымі ўстаноўкамі. Калі зроблена таленавіта, то яно так ці інакш вырываецца наверх. Як гэта было з «Песнярамі». Кожны раз, калі гучаць песні легендарнага беларускага калектыву, хочацца думаць пра ролю асобы ў культуры народаў. Чалавек (ці група людзей), не падобны ні на каго, які не баіцца рабіць не так, як усе, што былі да яго. Які не баіцца ісці ўглыб, уздымаць глыбу. Не баіцца паказацца смешным і незразумелым. І гэтым перамагае. Пра Уладзіміра Мулявіна і яго «Песняроў» нагадалі канцэртам «Спадчына песняроў». Нагадалі з удзелам вядомых беларускіх артыстаў (як Ядзвіга Паплаўская і Аляксандр Ціхановіч, ансамблі «Бяседа» і «Харошкі»). Але і працяг справы Мулявіна ёсць сёння: Беларускі дзяржаўны ансамбль «Песняры»
і яго ўжо новая творчасць. Творчасць ёсць. А вось Мулявіна — няма. Такой асобы сёння не хапае наогул беларускай культуры, якая б гучна і таленавіта засведчыла: «Мы ёсць, з намі класна!..»
Можа быць дзеля пошуку такіх асоб і ствараўся конкурс маладых выканаўцаў у Маладзечне…
Ларыса ЦІМОШЫК.
Музыцы патрэбны вершы. Вершам — музыка
Адна з яскравых старонак фестывалю — гэта конкурс маладых выканаўцаў. Пачалося ўсё калісьці ў 1993‑м з феерычнага «Матылька» Алёны Саўленайтэ, песні-пераможцы самага першага конкурсу, якую і дагэтуль можна чуць па радыё. Тады гарадскі футбольны стадыён быў цалкам запоўнены гледачамі, і ўсе яны з захапленнем лавілі гукі новай мелодыі…
Адзін за адным праходзілі новыя фестывалі Нацыянальнай песні і паэзіі ў Маладзечне, і на многіх з іх запальваліся новыя «зоркі» беларускай эстрады. Яшчэ самі не ведаючы пра сваю будучыню, яны пачыналі «ззяць» менавіта тут. Вось і сёлета конкурс маладых выканаўцаў парадаваў цэлай палітрай яскравых і моцных галасоў. Хто ведае, можа ў той дзень былі адкрыты новыя сапраўды значныя для беларускай эстрады імёны?.. Падставы верыць у гэта ёсць, бо Гран-пры сёлета быў прысуджаны. Яго атрымала Аліна Молаш з Мінскай вобласці, уладальніца добра пастаўленага, прафесійнага вакалу. Радасці пераможцы, калі яна атрымлівала прыз з рук міністра культуры, не было канца. Відавочна, гэты дзень яна запомніць на ўсё жыццё.
Першае месца журы прысудзіла Кацярыне Шумскай з Мінска, дзяўчыне з мяккім, пяшчотным голасам, які вельмі прыемна слухаць. Хочацца зрабіць прагноз, што яе мы таксама яшчэ пачуем, і не раз. На другім месцы, разам з Наталляй Ламакай з Маладзечна размясціўся Артур Міхайлаў, таксама маладзечанец. Нагадаем, што гэты хлопец сёлета прадстаўляе Беларусь на конкурсе маладых выканаўцаў у Віцебску! Дарэчы, ужо колькі гадоў вядзецца размова пра тое, каб пераможца маладзечанскага конкурсу прадстаўляў нашу краіну на «Славянскім базары», аднак пакуль такая схема яшчэ не запрацавала. Трэцяе месца прысудзілі Лідзіі Заблоцкай з Магілёўскай вобласці і Андрэю Грыгор'еву з Гродзенскай. Трэба дадаць, што ўсе ўзнагароды сапраўды заслужаныя: слухаў бы і слухаў маладых артыстаў, што загучалі ў Маладзечне…
Быў і яшчэ адзін прыемны момант на гэтым конкурсе — можна было пачуць невядомыя раней беларускія эстрадныя песні. Новыя словы, новыя мелодыі, хоць і не хіты, але на роднай мове. Былі нават творы, напісаныя самімі выканаўцамі. Меркаванні шаноўнага журы ў дачыненні да такога выбару рэпертуару разышліся. Кампазітар, народны артыст Беларусі Эдуард ЗАРЫЦКІ заўважыў, што на гэты раз на конкурсе гучала шмат «самапальных» песень — гэта калі самадзейныя аўтары пішуць словы, самі ж ствараюць музыку і робяць аранжыроўкі. Хаця і сярод іх, па словах кампазітара, трапляліся добрыя творы. Аднак маладыя артысты, выконваючы не класіку, а невядомыя песні, на думку Зарыцкага, прайграюць, бо нявопытных спевакоў павінна песня «цягнуць», а не яны песню.
Аднак старшыня журы, кіраўнік Нацыянальнага акадэмічнага аркестра, народны артыст Беларусі Міхаіл Фінберг з такім поглядам аказаўся не згодны і ацаніў «на выдатна» працу маладых аўтараў:
— У сучаснай музычнай творчасці назіраюцца новыя падыходы да стварэння песень. Тое спалучэнне паэзіі і мелодый, якое мы пачулі на конкурсе маладых выканаўцаў, можна назваць сапраўды цудоўным. Новая тэматыка і мелодыі — гэта той вынік, якога мы доўга чакалі. Таму ёсць падставы лічыць, што і надалей мы будзем мець сваю родную беларускую песню. Дарэчы, сёлета ўпершыню на канцэрце — адкрыцці фестывалю — выступалі ўсе фіналісты конкурсу маладых выканаўцаў, на галоўнай сцэне ў летнім амфітэатры. Гэта наша даніна павагі і давер маладым, тым, хто будзе працягваць нашу справу падтрымкі і стварэння беларускай песні, якую мы робім ужо шмат гадоў.
Нехта сказаў аднойчы, што добрыя вершы некалі абавязкова стануць песняй. Таму без літаратурнага блоку на нацыянальным фестывалі абысціся было немагчыма. Паэтаў і пісьменнікаў, а таксама прыхільнікаў іх творчасці прымала «Літаратурная гасцёўня». Сёлета яе арганізоўваў тэлеканал «Беларусь 3», які ў хуткім часе плануе трансліраваць некаторыя яе найбольш адметныя падзеі.
Вядучымі імпрэзы былі галоўны рэдактар газеты «Літаратура і мастацтва» Таццяна Сівец і дырэктар радыёстанцыі «Беларусь» Навум Гальпяровіч. Як заўсёды, на сцэну выходзілі паэты, чыталі свае творы, аднак на гэты раз гледачы мелі магчымасць задаваць творцам свае пытанні. Сярод песень, якія прагучалі на паэтычнай сустрэчы, — аўтарскі твор Канстанціна Цыбульскага (дарэчы, у яго ж выкананні), а таксама песня на словы Алеся Бадака і музыку Алены Атрашкевіч у выкананні Кацярыны Лазукі.
Намеснік галоўнага дырэктара тэлеканала «Беларусь 3», адзін з арганізатараў фестывальнай праграмы Сяргей Макарэй слушна заўважыў:
— Сёння многія людзі, седзячы ў сябе на кухні, кажуць: «А ці ёсць яна, беларуская паэзія»? Гэтаксама і кампазітары часам сцвярджаюць, што не пішуцца новыя вершы. Паэты ж смуткуюць, што няма каму пакласці іх словы на музыку. Калі яны знаходзяць адзін аднаго, то тады разам пачынаюць казаць, што ў нас няма добрых выканаўцаў. Таму, каб адбылася песня, павінны сысціся чатыры складнікі: паэт, кампазітар, выканаўца, а таксама глядацкая запатрабаванасць у гэтай кампазіцыі. Галоўная місія фестывалю песні і паэзіі — звесці іх разам, дапамагчы ўбачыць адзін аднаго. І гэты фестываль яе паспяхова выконвае ўжо многія гады.
Падаецца, каб Нацыянальнага фестывалю беларускай песні і паэзіі не існавала, яго варта было б прыдумаць. Асабліва ва ўмовах сучаснага глабалістычнага свету: калі ты не маеш сваёй яскравай нацыянальнай культуры, значыць, цябе ўвогуле быццам няма. І калі многія беларускія меламаны ездзяць у іншыя гарады і краіны, каб пачуць сваіх любімых выканаўцаў, ці не надышоў час беларусам пачаць ездзіць на фестываль у Маладзечне, дзе гучаць нашы любімыя песні, бо на роднай мове?..
Ніна ШЧАРБАЧЭВІЧ.
Маладзечанскі раён.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?