Пра літаратурны працэс, блогерства і ідэалы
Якое месца займае пісьменнік у сучасным свеце? Ці дастаткова ў яго сродкаў для папулярызацыі ўласнай творчасці і якія крыніцы заробку ён мае? Ці павінна дзяржава прымаць непасрэдны ўдзел у літаратурным працэсе? Гэтыя і многія іншыя пытанні былі абмеркаваны на міжнародным «круглым стале» пад назвай «Сугучча. Літаратура як люстэрка эпохі», які ладзіўся падчас свята беларускага пісьменства.
Арганізатарамі дзеі выступілі Міністэрства інфармацыі Беларусі, Саюз пісьменнікаў Беларусі, Выдавецкі дом «Звязда» і Нацыянальная бібліятэка Беларусі. Апошняя, дарэчы, і стала той пляцоўкай, на якой адбывалася сустрэча літаратараў з Беларусі, Расіі, Літвы, Казахстана, Малдавіі, Таджыкістана і іншых краін.
«Круглы стол» праводзіўся восьмы раз. Вітальнае слова да ўдзельнікаў накіраваў кіраўнік Адміністрацыі Прэзідэнта Рэспублікі Беларусь Андрэй КАБЯКОЎ. У ім гаварылася пра тое, што наша дзяржава падтрымлівае развіццё айчыннай літаратуры, а таксама міжкультурны дыялог і гуманітарнае ўзаемадзеянне народаў розных краін. «Слова пісьменніка, таленавітыя творы класікаў і сучасных аўтараў павінны аб'ядноўваць людзей на аснове маральных ідэалаў. І вельмі важна, што «круглы стол» «Сугучча» робіць свой унёсак ва ўзаемаўзбагачэнне нацыянальных літаратур», — падкрэсліў Андрэй Кабякоў.
[caption id="attachment_52258" align="alignnone" width="640"] Актыўны ўдзел у дыскусіі прынялі Ато ХАМДАМ (Таджыкістан),
Валерый КАЗАКОЎ (Расія), Ярон ЛАЎЦЮС (Літва)[/caption]
Першы намеснік кіраўніка Адміністрацыі Прэзідэнта Аляксандр Радзькоў, які прыняў удзел у рабоце «круглага стала», падзяліўся ўласнымі разважаннямі аб пакліканні пісьменніка і яго месцы ў грамадстве:
—Сустрэча прадстаўнікоў пісьменніцкага згуртавання — надзвычай важная падзея. Бо грамадству вельмі патрэбны мудрацы. Іх па-рознаму можна называць: жыхары, філосафы, пісьменнікі. Але без гэтай мудрасці няма паўнаты адчування жыцця, няма развіцця цывілізацыі. Бо на любым этапе гісторыі трэба асэнсоўваць, адкуль мы, што мы сабой уяўляем і як нам далей рухацца… Вывучаць жыццё, да таго ж ацэньваць яго і рабіць прадбачанні — гэта надзвычай складаная задача. Для таго, каб яе выканаць, трэба апускацца на глыбіню. Аднак запатрабаванасць у гэтым надзвычай вялікая… Па ініцыятыве Прэзідэнта мы арганізавалі паездку пісьменнікаў па краіне. Там, на месцах, мы ўбачылі, наколькі людзям неабходны кантакт з творцам, бо нават разумнаму чалавеку важна зверыць свае думкі: «Ці правільна я дзейнічаю, ці правільна думаю?..» А калі да іх прыходзіць сапраўдны «жрэц» — пісьменнік, яны ўважліва слухаюць яго, а таксама па вачах правяраюць, ці верыць ён сам у тое, пра што гаворыць, ці жыве так?..
Тэму важкасці пісьменніцкай справы падтрымала і міністр інфармацыі Лілія АНАНІЧ. Яна ўжо не першы раз прысутнічала на такой сустрэчы літаратараў, таму магла грунтоўна ацэньваць тое, што ўжо зроблена, а таксама строіць планы на бліжэйшую будучыню:
—Вельмі прыемна бачыць знаёмыя твары, бо ўжо восьмы раз Беларусь збірае міжнародны «круглы стол» літаратараў краін СНД, блізкага і далёкага замежжа. Мы бачым, што такія абмены духоўна-маральнымі каштоўнасцямі ўмацоўваюць нашу культурную прастору. 21‑ы год у краіне праводзіцца Дзень пісьменства — гэта амаль столькі ж, колькі незалежнай Беларусі. Такая адпаведнасць яскрава падкрэслівае кірунак дзяржавы на ўмацаванне духоўнасці і маральнасці, развіццё інтэлектуальнага, творчага патэнцыялу нашага грамадства. У 2017 годзе мы будзем адзначаць 500‑годдзе айчыннага кнігадрукавання, што чарговы раз адлюструе тую вялікую ўвагу, якая ў нашай краіне надаецца падтрымцы кнігавыдання.
Як бачым, нашы кніжныя паліцы ў бліжэйшы час яшчэ папоўняцца. Радуе і тое, што ёсць магчымасць на свае вочы ўбачыць многіх нашых аўтараў. Аб працы творцаў на месцах расказваў старшыня Саюза пісьменнікаў Беларусі Мікалай ЧАРГІНЕЦ:
—У нас у саюзе больш за 650 членаў. Вядома, не ўсе яны ззяюць на аднолькава высокім узроўні — як розныя футбалісты ў адной камандзе. За год нашы аўтары выступаюць перад чытачамі ад 15 да 20 тысяч разоў, і гэта вельмі радуе… Неяк Прэзідэнт звярнуўся да нас: «Пісьменнікі, вас мала відаць у інтэрнэце». Мы аператыўна адрэагавалі на гэту заўвагу: за 2,5 года колькасць пісьменнікаў-блогераў павялічылася з 15 да 200.
[caption id="attachment_52353" align="alignnone" width="600"] Хасан ТХАЗЁПЛАЎ (Кабардзіна-Балкарыя) прапанаваў зрабіць «Залатога арла» сімвалам міжнароднага «круглага стала». Першы намеснік кіраўніка Адміністрацыі Прэзідэнта Аляксандр РАДЗЬКОЎ і міністр інфармацыі Лілія АНАНІЧ
ідэю госця падтрымалі.[/caption]
На «круглым стале» шмат гаварылася і пра найвышэйшае пакліканне пісьменніка, яго асаблівую адказнасць перад усім народам. Асабліва хвалявала гэта вядомага расійскага журналіста, пісьменніка, выдаўца, грамадскага дзеяча Рыгора ПРАХІНА:
—Што датычыцца літаратуры і яе ролі перад народам, мне здаецца, тут стаяць дзве задачы. Першая — служыць не інстынктам, а ідэалам, у тым ліку міру і добрасуседству. Другая — служыць слову, роднаму слову, якое часта знаходзіцца пад уціскам і нівеліруецца, бо без яго і нас саміх не стане… Мы выдалі некалькі тамоў дзівоснага беларускага фальклору. Некаторыя рэчы ўпершыню былі перакладзены на рускую мову, і я быў проста ўражаны, наколькі яны вострыя, цудоўныя — проста алмаз.
Наступныя выступоўцы шмат казалі пра асаблівую ролю Беларусі на міжнароднай, не толькі літаратурнай, але і агульначалавечай прасторы. Пісьменнік, старшыня федэратыўнай нацыянальнай культурнай аўтаноміі «Беларусы Расіі» Валерый КАЗАКОЎ яшчэ раз нагадаў пра славутае міралюбства беларусаў:
—Сёння кожны чалавек, які разважае, і не толькі пісьменнік, павінен вызначыць, з кім ён: або з сіламі цемры, або з сіламі святла. Нас шмат што раз'ядноўвае: мовы, рэлігіі, колер скуры, перакананні — аднак ёсць адно, што падымае нас над усім і вакол чаго можна гуртавацца — гэта талент пісьменніка. Дзякуй Богу, што ёсць беларусы. Я кажу гэта цалкам сур'ёзна — як салдат, як афіцэр. Бо за час незалежнасці Беларусі ніводзін салдат гэтай краіны не ўдзельнічаў ні ў адной вайне. Я лічу, што Беларусь — гэта апошняя крыніца з рук Бога, што датычыцца і літаратуры. У Расіі, як і ў іншых краінах, такія пасяджэнні не праводзяцца. Беларусь захавала такую практыку, калі пісьменнікі прыязджаюць у розныя калектывы — ад дзіцячага садка да будаўнічай пляцоўкі — і ладзяць сустрэчы-чытанні. Нідзе на постсавецкай прасторы няма такой формы працы.
Азербайджанец Чынгіз Алі аглу салідарны з расійскім калегам у поглядах на наш народ:
—Лёс усклаў на Беларусь і яе народ асаблівую місію — быць тым станоўчым цэнтрам, які накіроўваў бы нас на служэнне чалавеку. Прарок прамаўляе тое, што пачуў звыш. А вось пасля прарокаў ідуць паэты (пад паэтамі маюцца на ўвазе ўсе творчыя асобы). Паэты і пісьменнікі абавязаны прыслухоўвацца да голасу ўласнага сумлення, чалавечай годнасці. Яны павінны найперш кіравацца сваім прызначэннем, жыць па законах таленту.
[caption id="" align="alignnone" width="442"] Сваімі развагамі аб сучасным літаратурным працэсе
дзеліцца Аляксандр КАЗІНЦАЎ (Расія).[/caption]
Разважалі на «круглым стале» і пра якасць сучаснай літаратуры. Найперш павёў гутарку ў гэтым рэчышчы мадэратар пасяджэння, дырэктар — галоўны рэдактар Выдавецкага дома «Звязда» Алесь КАРЛЮКЕВІЧ. Ён звярнуў увагу на тое, што да чытача сёння часта трапляе масавая літаратура. Магчыма, чалавецтва стамілася, мяркуе ён, раз карыстаецца, у тым ліку праз слова, пэўнымі сімваламі, якія даюць магчымасць проста адпачыць. Такім чынам мы пазбаўляем працы і наша сэрца, і розум.
Пра тое, што ў літаратурным працэсе сёння многае змянілася, гаварыў і празаік, галоўны рэдактар «Роман-газеты» Юрый Казлоў:
—«Роман-газета» сёння, як і калісьці, выходзіць два разы на месяц. Таксама раз на месяц выходзіць дзіцячы выпуск. На прыкладзе «Роман-газеты» можна прасачыць усё тое, што адбылося з літаратурай. У мінулыя часы наклад даходзіў да 4‑х мільёнаў экземпляраў. Цяпер ён складае ўсяго 4 тысячы. Такім чынам, па аналогіі, можна лічыць, што ў тысячу разоў скарацілася літаратурная прастора… Мне здаецца, Беларусь у справе выстройвання адносін паміж пісьменнікам і дзяржавай значна апярэджвае ўсе іншыя дзяржавы СНД. Хаця прэстыж прафесіі пісьменніка ўвогуле катастрафічна ўпаў. Думаю, ніхто з прысутных не жыве літаратурнай працай. Усе мы вымушаны падпрацоўваць, займацца журналістыкай ці нечым яшчэ. Таму вельмі важна, каб дзяржава дапамагала пісьменніку жыць з яго літаратурнай працы. А ўсе спасылкі на тое, што цяпер час рынку, што творы не прадаюцца, лічу надуманымі. Бо масавая літаратура, якая цяпер пануе, пішацца толькі з адной мэтай — атрымання прыбытку. У той жа час нармальную, яркую мастацкую прозу ніхто не імкнецца нават асэнсаваць.
Усе прысутныя ўхвалі канцэпцыю працы з пісьменнікамі, агучаную Казловым, якая існуе ў еўрапейскіх краінах:
—Там прытрымліваюцца думкі, што пакуль развіваецца мова, жывым сябе можа лічыць і народ. А пісьменнікі — гэта тыя людзі, якія якраз даюць магчымасць развівацца мове і самасвядомасці, і грамадства не дэградуе. У Еўропе лічыцца, што пісьменнік ужо выканаў сваю місію, калі стварыў адзін вобраз, адну метафару, адно яркае параўнанне, якое ўвойдзе ў скарбонку мовы. Нават калі больш ён нічога выдатнага не напіша, для яго будзе знойдзена добрая форма існавання: весці гурткі, чытаць лекцыі — у галечы ён не будзе. Можна было б і нам узяць на ўзбраенне такую форму працы.
Ніна ШЧАРБАЧЭВІЧ.
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».