Фізіка — дакладная навука, і таму людзей, якія ёй займаюцца, прынята лічыць сур'ёзнымі. Аднак 41-е па ліку святкаванне Дзён фізіка ў БДУ даказала, што матэматычны склад розуму — не перашкода для гумару і весялосці.
Святочным дням на фізфаку дала старт антынавуковая канферэнцыя. Заяўкі на ўдзел прымаліся ад усіх ахвотных, а тэматыку дакладаў ніхто не абмяжоўваў. Выкладчык Ігар Цімошчанка стварыў жартаўлівае «Кіраўніцтва па чытанні лекцый»: «Калі сутнасць лекцый зразумелая, тады таямніца дысцыпліны знікае. Студэнту робіцца сумна, і ён перастае хадзіць ва ўніверсітэт». Выкладчык фізфака прапанаваў розныя спосабы, каб ускладніць жыццё студэнтам: «Калі пішаце формулы, стаўце то маленькі, то вялікі Х. Адна з маіх любімых фраз на лекцыях — «Паглядзіце на формулы... якія я ўжо сцёр!».
7-17
Пётр Часнакоў, аспірант фізічнага факультэта Маскоўскага дзяржаўнага ўніверсітэта, прыехаў у Мінск спецыяльна, каб выступіць на канферэнцыі. «Было цікава не толькі самому прыняць удзел, але і паглядзець, у якіх напрамках развіваецца гумар беларускіх фізікаў», — расказаў хлопец.
Галоўны прыз (ІPod) за найлепшы даклад атрымаў студэнт V курса фізічнага факультэта Павел Орсіч. Ён разгледзеў узаемадзеянне жаночых і мужчынскіх ядраў і на падставе гэтага вывеў «Атамную тэорыю адносінаў». Поспех даклада можна растлумачыць тым, што ў ім была закранута тэма, якая выклікае асаблівы інтарэс у моладзі.
На наступны дзень адбылася прэс-канферэнцыя з любімымі (і не толькі) выкладчыкамі. Студэнты добра падрыхтаваліся да гэтага мерапрыемства і з вялікім задавальненнем задавалі каверзныя пытанні накшталт «Я ўбачыў у краме кнігу «Квантавая механіка для чайнікаў». А для якога посуду яшчэ можна скарыстаць квантавую тэорыю?», «Колькі вымярэнняў неабходна для апісання фізічнага цела, якое падпарадкоўваецца жаночай логіцы?», «Часам я засынаю на вашых лекцыях і вы мне сніцеся. А што сніцца вам?» і іншыя.
Далей студэнты па традыцыі сарвалі першую пару і пайшлі мітынгаваць ва ўнутраны дворык БДУ. «За Ньютона! У імя Лагранжа! Электрон за пратон!» — скандзіравалі фізікі, а выпадковыя мінакі са здзіўленнем за імі назіралі.
Заняткі ў гэты дзень на фізфаку афіцыйна адмянілі, а замест іх у аўдыторыях арганізавалі атракцыёны і бар. Студэнты супернічалі паміж сабой у веданні законаў фізікі, маглі пакінуць запіс на «памятнай парце» ці нават... ажаніцца ў імправізаваным ЗАГСе. На аўкцыёне «Усляпую» можна было набыць лот і толькі потым даведацца, што ён з сябе ўяўляе. Загадкавая «Палавінка свету» аказалася павязкай на вока, а «Цесная жаночая кампанія» — матрошкай.
Увечары для першакурснікаў прайшоў традыцыйны спектакль-пасвячэнне, неад'емнымі атрыбутамі якога з'яўляюцца не толькі ўрачыстая клятва і выкананне гімна фізікаў «Дубінушка», але і танец канкан, і нумар са свечкамі.
А завяршыліся святочныя дні «капуснікам» гасцей (членаў арганізацыйных камітэтаў Дзён фізіка іншых універсітэтаў). Падтрымаць фізікаў БДУ прыехалі студэнты з Маскоўскага дзяржаўнага ўніверсітэта
імя М.В. Ламаносава, Гомельскага дзяржаўнага ўніверсітэта імя Францыска Скарыны, Маскоўскага авіяцыйнага інстытута, Маскоўскага фізіка-тэхнічнага інстытута і іншых. Варта адзначыць, што Дні фізіка — гэта традыцыя, якая складвалася на працягу некалькі дзесяцігоддзяў намаганнямі студэнтаў фізфакаў розных універсітэтаў і краін.
Ганна Курак,
студэнтка ІІІ курса Інстытута журналістыкі БДУ.
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.