Вы тут

Наколькі небяспечныя ў наш час дзіцячыя пляцоўкі і хто павінен кантраляваць іх стан?


Усё часцей дзіцячыя пляцоўкі з месца для адпачынку ператвараюцца ў нагоду для спрэчак, самыя сур'ёзныя з якіх даходзяць да судоў. Справа ў тым, што значна ўзрасла імавернасць атрымаць траўму падчас гушкання на арэлях ці катання з горкі. Заклапочаныя бацькі задаюць справядлівыя пытанні: наколькі небяспечныя ў наш час дзіцячыя пляцоўкі і хто павінен кантраляваць іх стан?


Упаў, ачуўся, гіпс

Фота Марыны Бегунковай.

Па статыстыцы, са 100 тысяч беларускіх дзяцей 8-10 тысяч атрымліваюць траўмы на дзіцячых пляцоўках. Лічба немаленькая. Асабліва калі мець на ўвазе, што гэтыя самыя пляцоўкі ствараюцца ў першую чаргу для бяспекі: не было б іх, увогуле невядома, куды б малыя лезлі ў вольны час. Але, як паказвае практыка, не ўсё так адназначна.

Чатыры гады таму дзве сталічныя школьніцы трапілі ў бальніцу акурат з дзіцячай пляцоўкі. Падчас гульні на іх упала бетонная арка. Абедзве дзяўчынкі атрымалі пераломы і, вядома, вельмі напужаліся. Ніхто нават і ўявіць не мог, што двор, на якім яны рабілі яшчэ свае першыя крокі, паднясе такі «сюрпрыз». Ці яшчэ адзін прыклад: мінулай вясной васьмігадовы хлопчык траўміраваўся на каруселі — нагу заціснула настолькі, што давялося рабіць дзве аперацыі, каб ён зноў мог хадзіць. Маці школьніка была ўпэўненая ў вінаватасці камунальнікаў, якія не выявілі няспраўнасць гульнявога абсталявання, і напісала заяву ў міліцыю. У сваю чаргу, супрацоўнікі жыллёва-экспуатацыйнай канторы даказвалі, што карусель была ў парадку. Ва ўсялякім выпадку, гэта зафіксавалі праваахоўныя органы. У выніку адказнасць за сітуацыю ніхто на сябе так і не ўзяў, кожны застаўся пры сваім меркаванні. Але ці павінна так быць?

У Беларусі дзейнічае адзіны дзяржстандарт, які прадугледжвае выраб, устаноўку і эксплуатацыю абсталявання для дзіцячых гульнявых пляцовак. Фактычна адказнасць за пляцоўкі нясе тая арганізацыя, якая займаецца абслугоўваннем прыдамавой тэрыторыі. Як правіла, гэта жыллёва-эксплуатацыйная ўстанова. У адным толькі Мінску больш за чатыры тысячы пляцовак, якія змяшчаюць каля 27 тысяч адзінак гульнявога і спартыўнага абсталявання, знаходзяцца на абслугоўванні гарадской жыллёвай гаспадаркі. Аднак ёсць пляцоўкі, што належаць таварыствам прыватнікаў, і тады адказнасць ляжыць на іх. У стандарце прапісана, што кантроль за гульнявым і спартыўным абсталяваннем павінен ажыццяўляцца штодзённа. Напрыклад, падчас уборкі дворнікамі. Больш дэталёвая праверка (у тым ліку і на трываласць) прадугледжана раз на 1-3 месяцы супрацоўнікамі ЖЭУ. Двойчы на год — восенню і вясной — адбываюцца планавыя агляды спецыяльнымі камісіямі.

Акрамя таго, штогод у адмысловыя рэйды па дзіцячых пляцоўках адпраўляецца пракуратура. Перад пачаткам летніх вакацый яе прадстаўнікі абыходзяць выпадкова абраныя пляцоўкі і правяраюць, наколькі яны падрыхтаваныя да сезона. Вынік — нязменныя прадпісанні з патрабаваннямі неадкладна прывесці ў належны стан гульнявое абсталяванне ці заняцца санітарным станам месца.

Любіш катацца?

Любі і за пляцоўкай назіраць

Будзем рэалістамі: далёка не ўсе камунальнікі настолькі дысцыплінаваныя, каб штодзень правяраць, ці не здарылася чаго-небудзь з арэлямі за ноч. Нельга выключаць чалавечы фактар — няспраўнасць можна проста не заўважыць. Да таго ж дзіцячыя пляцоўкі час ад часу «акупуюць» зусім не тыя, для каго яны прызначаныя. Гэта і таварышы з бутэлькамі піва ці чаго мацнейшага, і падлеткі, якім рукі свярбяць што-небудзь зламаць. Таму адзінае, што можна параіць бацькам: калі адпраўляеце дзяцей адных у двор, самі спачатку пераканайцеся, што там усё нармальна.

Інтэрактыўная карта на сайце 115.бел, які створаны для паляпшэння жыллёва-камунальных паслуг у гарадах краіны, штодзень папаўняецца дзясяткамі прэтэнзій менавіта ад матуль і татаў. «Дзе сядушка на арэлях? Дзеці калыхаюцца на голым жалезе!», «Дзірка ў пластыкавай горцы. Сын рэгулярна прыходзіць дадому ў падраных штанах. Зрабіце што-небудзь», «Калі прывараць турнікі? Яшчэ некалькі тыдняў у такім стане — і яны ўпадуць каму-небудзь на галаву», — пішуць бацькі. За выпраўленнем недахопаў можна сачыць у рэжыме анлайн. Зручна. Але самае важнае — тут праблемы сабраныя і выкладзеныя ва ўсеагульны доступ. Так бы мовіць, адзін заўважыў і папярэдзіў усіх астатніх.

Забавы не па дзяржстандарце

У 2015 годзе героем сродкаў масавай інфармацыі стаў звычайны пенсіянер з вёскі Агароднікі, што ў Лідскім раёне. Мужчына сваімі рукамі змайстраваў насупраць дома шыкоўны спартыўна-забаўляльны комплекс, якому маглі б пазайздросціць многія гараджане. Валейбольная і танцавальная пляцоўкі, арэлі і турнікі на любы густ, з'явілася нават горка, з якой можна было спускацца ў самаробны басейн. І ўсё гэта на маляўнічым беразе Нёмана. Дзецям з навакольных вёсак месца, канешне, палюбілася. Прыязджалі бавіць час госці з Гродна, Мінска і нават замежнікі.

Услед за натоўпамі адпачывальнікаў падцягнуліся і мясцовыя ўлады. Па заканадаўстве пенсіянер не меў права «захопліваць тэрыторыю» і «займацца самадзейнасцю», хоць і з добрымі намерамі. Праверкі, штрафы і падтрымка соцень людзей, якія прыкіпелі да «пляцоўкі дзеда Славы» — за некалькі гадоў мужчына прайшоў праз усе бюракратычныя колы толькі таму, што «забавы зробленыя не па дзяржстандарце» і няма афіцыйнай асобы, якая б несла адказнасць за комплекс. Тут ужо нічога не скажаш: закон на тое і закон, каб яму падпарадкоўвацца. З другога боку, сам мужчына фактычна і быў назіральнікам за комплексам: і траву касіў, і прыбіраўся, і правяраў спраўнасць абсталявання. І ўсё ж на добрым слове такая справа трымацца не можа. У выніку вясковы актывіст і ўлады прыйшлі да кампрамісу. Сельсавет пачаў пакрысе яму дапамагаць. Праўда, гэта адзіны выпадак, які скончыўся мірна. Большасць самаробных дзіцячых пляцовак (а такія ёсць ледзь не ў кожнай другой вёсцы, толькі па маштабе меншыя) або застаюцца незаўважныя, або дэманціруюцца.

У тэму

Беларускія траўматолагі зазначаюць, што большасць дзіцячых траўмаў, атрыманых падчас гульняў на вуліцы, звязаныя з арэлямі. Урачы не стамляюцца паўтараць: лепш за ўсё, калі дзеці (асабліва дашкольнага ўзросту) гушкаюцца на іх пад наглядам дарослых. Акрамя таго, самым заўзятым аматарам гэтай забавы трэба нагадваць элементарныя правілы бяспекі. Напрыклад, зваліўся з арэляў — адразу не ўскоквай, бо яны ж без цябе працягваюць вагацца і могуць ударыць па галаве. На другім месцы па колькасці нанесеных траўмаў — каруселі. Тут часцей за ўсё бяда здараецца, калі падчас руху рукі, ногі і адзенне неспадзявана зазрасаюць паміж элементамі абсталявання — трэба быць уважлівымі. Горкі — яшчэ адзін лідар па пастаўцы дзяцей у прыёмны пакой бальніц: адсутнасць борцікаў, няправільная ўстаноўка і нясвоечасовы догляд прыводзяць да падзенняў зверху.

Ганна КУРАК

Загаловак у газеце: Гульні з наступствамі

Выбар рэдакцыі

Эканоміка

Змены ў падатковы кодыэкс. Хто заплаціць падатак на кватэру, а хто не?

Змены ў падатковы кодыэкс. Хто заплаціць падатак на кватэру, а хто не?

З пачатку года ўступілі ў сілу змены ў Падатковы кодэкс.

Культура

Біблія на беларускай мове: «Галоўнае — абапірацца не на прыдуманыя ўяўленні, а на тысячагадовы вопыт набожных папярэднікаў»

Біблія на беларускай мове: «Галоўнае — абапірацца не на прыдуманыя ўяўленні, а на тысячагадовы вопыт набожных папярэднікаў»

 У 2019 годзе прэміяй «За духоўнае адраджэнне» былі адзначаны перакладчыкі Бібліі на беларускую мову.

Палітыка

Алег Іваноў: Наша супрацоўніцтва — вуліца з двухбаковым рухам

Алег Іваноў: Наша супрацоўніцтва — вуліца з двухбаковым рухам

У бягучым годзе стартуе рэалізацыя 28 інтэграцыйных праграм Саюзнай дзяржавы.

Грамадства

Чым прыцягвае гісторыя ваеннай авіяцыі бераставіцкіх аматараў тэхнічнай творчасці

Чым прыцягвае гісторыя ваеннай авіяцыі бераставіцкіх аматараў тэхнічнай творчасці

Ідэя стварыць гурток авіямадэлістаў у нейкім сэнсе звязана і з размяшчэннем побач з райцэнтрам былога ваеннага аэрадрома.