Петрышэнка: У Беларусі ні адно дзіця не застаецца без увагі

У Беларусі ні адно дзіця не застаецца без увагі. Аб гэтым заявіў намеснік прэм’ер-міністра Ігар Петрышэнка ў час наведвання Дома дзіцяці нумар 1 у Мінску, перадае БелТА.

«У нас у краіне ні адно дзіця не застаецца без увагі. Гэта дакладна выбудаваная лінія дзяржавы па сацыяльнай падтрымцы сем’яў і дзяцей. Дзецям развіваць у далейшым нашу краіну, жыць на гэтай зямлі, дзеці для нас галоўнае», — сказаў Ігар Петрышэнка.

Паводле яго слоў, пятая частка насельніцтва Беларусі — дзеці. На 1 тыс. хлопчыкаў прыпадае 949 дзяўчынак. «Краіна забяспечвае неабходныя ўмовы, каб ствараліся моцныя сем’і. Расце колькасць шматдзетных сем’яў. Створана неабходная сістэма, каб дзеці маглі рэалізаваць свой патэнцыял. Амаль 1,5 млн дзяцей займаюцца фізкультурай і спортам, 115 тыс. — рознымі відамі творчасці», — адзначыў віцэ-прэм’ер.

Ён таксама звярнуў увагу на тое, што каля 89 працэнтаў дзяцей ад года да пяці гадоў маюць магчымасць наведваць дзіцячы сад. «Гэта вельмі значны працэнт і важны складнік падрыхтоўкі дзяцей да школы», — дадаў Ігар Петрышэнка.

Сярод мер дзяржпадтрымкі — дапамога пры нараджэнні дзіцяці, сямейны капітал. Для шматдзетных сем’яў, сем’яў, у якіх ёсць дзеці з інваліднасцю, прадугледжаны шэраг ільгот.

«Для нас вельмі важна, каб у кожнага дзіцяці ў нашай краіне было шчаслівае дзяцінства. Дзеці, якія трапляюць у складаную жыццёвую сітуацыю, акружаны клопатам дзяржавы. Пад непасрэднай увагай знаходзяцца больш за 16 тыс. дзяцей. 88 працэнтаў з іх — у сем’ях, дамах сямейнага тыпу. У нас за апошнія пяць гадоў з 30 інтэрнатаў засталося ўсяго толькі 12. 2,7 тыс. дзяцей выхоўваліся ў дамах-інтэрнатах, а засталіся там усяго толькі 643. Лінія дзяржавы — кожнае дзіця павінна знайсці сям’ю», — падкрэсліў віцэ-прэм’ер.

Сёння Ігар Петрышэнка пабываў у Доме дзіцяці нумар 1 у Мінску, наведаў дзіцячыя групы і палаты паліятыўнай дапамогі. Установе быў уручаны сертыфікат на неабходнае абсталяванне.

Дом дзіцяці нумар 1 для дзяцей з арганічным пашкоджаннем цэнтральнай нервовай сістэмы і псіхікі — старэйшая ўстанова горада. Паводле архіўных звестак, яна функцыянавала ў 1895 годзе. Магутнасць змянялася ў залежнасці ад патрэбнасці горада ад 65 да 160 ложка-месцаў. Сюды на дзяржаўнае забеспячэнне размяшчаюцца дзеці-сіроты, дзеці, якія засталіся без апекі бацькоў або тыя, хто знаходзіцца ў сацыяльна небяспечным становішчы, ва ўзросце да 3 гадоў, для аказання паліятыўнай дапамогі — дзеці-інваліды да 7 гадоў уключна, а якія знаходзяцца на працяглай рэспіраторнай падтрымцы — да 18 гадоў.

Планавая магутнасць складае 65 ложкаў, ва ўстанове знаходзіцца 46 дзяцей. Функцыянуюць чатыры групы, тры палаты паліятыўнай дапамогі, адна палата медыка-сацыяльнай дапамогі, ёсць каранцінная група. Створаны ўсе ўмовы для ўтрымання, выхавання, догляду, лячэння і рэабілітацыі маленькіх пацыентаў. У прыярытэце ўстановы — уладкаванне дзяцей у сем’і.

Фота: БелТА