Вы тут

Павышэнне пенсій і сацыяльных выплат, зніжэнне стаўкі па дэпазітах


У маі крыху патаннеюць банкаўскія крэдыты, праўда, і стаўкі па дэпазітах таксама значна знізяцца. Нацбанк прыняў рашэнне аб зніжэнні стаўкі рэфінансавання — здарыцца гэта ўжо з 2 мая. Адпаведныя рашэнні прынятыя праўленнем Нацыянальнага банка па выніках пасяджэння па грашова-крэдытнай палітыцы, паведамілі ў Нацбанку.


Фота: БелТА.

Па дадзеных банка, стаўка па крэдыце авернайт зніжаецца з 11, 5% да 11% гадавых, а стаўка па дэпазіце авернайт — з 9, 5% да 9 % гадавых.

Адзначаецца працяг запаволення інфляцыйных працэсаў. «Як і чакалася, з-за эфекту высокай базы мінулага года ў сакавіку 2023 года гадавы прырост спажывецкіх цэн зменшыўся да 6 % супраць 11,7 % у папярэднім месяцы. Трэндавая інфляцыя знізілася да 6 % Пасля 8,9 % месяцам раней. Пры ўмове адсутнасці шокаў чакаецца захаванне нізкіх штомесячных тэмпаў прыросту коштаў на спажывецкім рынку, што ў бліжэйшыя месяцы падтрымае трэнд на запаволенне гадавой інфляцыі», — адзначылі ў банку.

Паступова аднаўляецца і дзелавая актыўнасць. «На фоне працэнтных ставак, якія працягваюць зніжацца, пашыраецца крэдытная падтрымка банкамі эканомікі ў нацыянальнай валюце. Сярэдняя стаўка па новых рублёвых крэдытах банкаў і ААТ „Банк развіцця Рэспублікі Беларусь“ юрыдычным асобам у сакавіку 2023 года зменшылася да 8,97% гадавых. У цэлым рызыкі, якія могуць істотна паўплываць на дынаміку інфляцыйных працэсаў у будучыні, ацэньваюцца як умераныя. Інфляцыйныя чаканні эканамічных агентаў, нягледзячы на зніжэнне, застаюцца ўсё яшчэ высокімі. У адпаведнасці з вынікамі апытання насельніцтва, праведзенага ў сакавіку 2023 года, чаканая ў наступныя 12 месяцаў інфляцыя знізілася да 12,4% супраць 16,7% у сакавіку 2022 года. У фокусе ўвагі па-ранейшаму застаецца стрыманая ашчадная актыўнасць з адначасовым павелічэннем долі ліквідных актываў у агульнай структуры грашовых зберажэнняў насельніцтва», — распавялі ў Нацбанку.

Наступныя рашэнні па стаўцы рэфінансавання Нацыянальны банк будзе прымаць з улікам фактычнай і чаканай дынамікі інфляцыі, а таксама ацэньваючы рызыкі з боку ўнутраных і знешніх умоў і рэакцыі на іх фінансавых рынкаў.

Павышаюцца пенсіі і сацыяльныя выплаты

Прыемная навіна для беларускіх пенсіянераў — чакаецца павышэнне пенсійных выплат. У нашай краіне змяняецца бюджэт пражытачнага мінімуму: у сярэднім з 1 мая ён фіксуецца на ўзроўні 352 рублёў 13 капеек.

Адпаведна павялічацца дзяржаўныя дапамогі на дзяцей, сацыяльныя пенсіі і павышэнні да пенсій для асобных катэгорый грамадзян, даплаты пенсіянерам ва ўзросце 75 гадоў і старэйшым, дапамогі па доглядзе інвалідаў І групы і пажылых людзей, якія дасягнулі 80 гадоў.

Памеры бюджэту пражытачнага мінімуму ў сярэднім на душу насельніцтва і па асноўных сацыяльна-дэмаграфічных групах зацверджаны адпаведнай пастановай на перыяд з 1 мая да 31 ліпеня 2023 года.

Такім чынам, бюджэт пражытачнага мінімуму ў сярэднім на душу насельніцтва ўстаноўлены ў памеры 352 рублі 13 капеек, што на 3,1 % вышэй, чым той, што дзейнічаў з 1 лютага да 30 красавіка 2023 года.

Памеры бюджэту пражытачнага мінімуму ў сярэднім на душу насельніцтва і па асноўных сацыяльна-дэмаграфічных групах наступныя: 389 рублёў 53 капейкі — для працаздольнага насельніцтва, 265 рублёў 96 капеек — для пенсіянераў, 224 рублі 26 капеек — для дзяцей да трох гадоў, 308 рублёў 56 капеек — для дзяцей ад 3 да 6 гадоў, 378 рублёў 15 капеек — для дзяцей ад 6 да 18 гадоў.

З1 мая аўтаматычна пераглядаюцца ўбудаваныя ў сістэму сацыяльнай абароны розныя надбаўкі і павышэнні, а таксама асобныя сацыяльныя выплаты, якія вылічаюцца ад памеру БПМ. Гэта памеры дзяржаўных дапамог сем’ям, якія выхоўваюць дзяцей; павышэнні да пенсій, якія прадугледжаны для асобных катэгорый пенсіянераў; даплаты і надбаўкі пенсіянерам ва ўзросце 75 гадоў і старэйшым, якія атрымліваюць пенсіі ў органах па працы, занятасці і сацыяльнай абароне; дапамогі па доглядзе інваліда І групы або асобы, якая дасягнула 80-гадовага ўзросту, сацыяльныя пенсіі.

Дзяржаўныя дапамогі сем’ям, якія выхоўваюць дзяцей, устанаўліваюцца ў наступных памерах. Дапамога ў сувязі з нараджэннем дзіцяці (аднаразовая) пры нараджэнні першага дзіцяці складзе 10 БПМ, ці 3 521,30 рубля, пры нараджэнні другога і наступных дзяцей — 14 БПМ, ці 4 929,82 руб. Дапамога жанчынам, якія сталі на ўлік у арганізацыях аховы здароўя да 12-тыднёвага тэрміну цяжарнасці (аднаразовая) складзе 100 % БПМ, ці 352,13 рубля.

Дапамога сем’ям на дзяцей ва ўзросце ад 3 да 18 гадоў у перыяд выхавання дзіцяці ва ўзросце да 3 гадоў (штомесячная) роўная 50 % БПМ, ці 176,07 рубля. Дапамога на дзяцей, старэйшых за 3 гады, з асобных катэгорый сем’яў, прадугледжаных заканадаўствам (штомесячная) на дзяцей, старэйшых за 3 гады, якія выхоўваюцца ў такіх сем’ях (акрамя дзіцяці-інваліда) роўная 50 % БПМ, або 176,07 рубля, на дзіця-інваліда, старэйшага за 3 гады, — 70 % БПМ, або 246,49 рубля.

Зменены і іншыя выплаты. Так дапамога па доглядзе дзіцяці-інваліда ва ўзросце да 18 гадоў (штомесячная) з І і ІІ ступенню страты здароўя да спаўнення дзіцяці 18 гадоў і з ІІІ і ІV ступенню страты здароўя да спаўнення дзіцяці ўзросту 3 гадоў выплачваецца ў памеры 100 % БПМ і складзе 352,13 рубля, з ІІІ і ІV ступенню страты здароўя пасля спаўнення дзіцяці ўзросту 3 гадоў — 120 % БПМ, або 422,56 рубля, дапамога на дзяцей ва ўзросце да 18 гадоў, інфіцыраваных вірусам імунадэфіцыту чалавека (штомесячная), — 70 % БПМ, ці 246,49 рубля.

Вялікія майскія выхадныя

Як і ў красавіку, у маі нас чакаюць вялікія — цэлых чатыры дні — выхадныя. Гаворка ідзе пра перыяд з 6-га па 9-ае мая. Дзень Перамогі выпадае на аўторак, таму панядзелак, 8 мая вырашылі зрабіць выхадным днём. Але ёсць нюанс: адпрацаваць яго ўсё ж давядзецца ў суботу 13 мая.

Для пенсіянераў — транспартная зніжка на праезд у электрычках

І зноў прыемныя навіны для пенсіянераў: з 1 мая вяртаецца сезонная 50 % зніжка на праезд у электрычках. Такое рашэнне ўжо прынялі ў БЧ. Там, дарэчы, нагадалі, гэтая зніжка прадастаўляецца пры прад’яўленні арыгінала пенсійнага пасведчання пры куплі білетаў. Акрамя таго, пенсіянеру неабходна мець пры сабе арыгінал пенсійнага пасведчання і ў цягніках рэгіянальных ліній эканомкласа.

Цягнік у Анапу

Беларуская чыгунка на летні сезон адкрывае маршрут – Мінск-Анапа, першы цягнік прызначаны на 5 мая. З Мінска цягнік у Анапу будзе выязджаць а 10.58 раніцы, У Гомелі ў састаў можна будзе падсесці а 15.40. Далей — дарога і прадчуванне адпачынку: у Анапе цягнік будзе праз двое сутак, раніцай 7 мая. Назад з Анапы цягнік БЧ у Мінск адправіцца ў той жа дзень і прыбудзе ў сталіцу Беларусі ўжо 9 мая. Адзначым, што састаў будзе курсіраваць праз дзень па няцотных чыслах месяца з Мінска да 27 верасня, з Анапы — да 29 верасня 2023 года.

Адключэнне гарачай вады

Зусім нядаўна ў кватэрах беларусаў адключылі батарэі, а ўжо тут як тут падкраўся сезон планавага адключэння гарачай вады. У гэтым годзе ён стартуе ў аўторак, 16 мая. На сайтах прадпрыемства «Мінскэнерга» і «Мінсккамунцепласетка» ўжо названыя канкрэтныя адрасы тых, каму першымі трэба будзе пажыць без гарачай вады з крана. Дарэчы, абяцаюць, што адключэнне не працягнецца больш за 13 сутак, але толькі ў тым выпадку, калі выпрабаванні трубаправодаў цепласетак пройдуць паспяхова, а дэфекты, якія патрабуюць неадкладных работ па рамонце і аднаўленні, не выявяцца.

Выплата падаходнага падатку

Нагадаем і яшчэ пра адзін момант: падаць падатковую дэкларацыю аб падаходным падатку аб даходах, якія былі атрыманыя ў 2022 годзе, фізічным асобам трэба было не пазней за 31 сакавіка 2023 года. Тэрмін выплаты налічанага падатку — да 1 чэрвеня 2023 года. Дарэчы, нашы рамеснікі да 1 ліпеня 2023 года павінны пацвердзіць свой статус для выплаты падаткаў.

Падаражэюць цыгарэты

Беларускія вытворцы і пастаўшчыкі цыгарэт маюць права пераглядаць іх цану штомесяц. У маі падаражэюць многія маркі цыгарэт, сякія-такія з іх дададуць у цане адразу 15-20 капеек. Вось так, курэнне — шкодная звычка.

Сяргей ПАЛІНІН

Выбар рэдакцыі

Жыллё

Па якіх крытэрыях дамы ўваходзяць у праграму па капрамонце?

Па якіх крытэрыях дамы ўваходзяць у праграму па капрамонце?

Пра ўсе тонкасці правядзення капітальнага рамонту расказалі спецыялісты.

Рэгіёны

Самы працяглы ўрок гістарычнай праўды і сяброўства

Самы працяглы ўрок гістарычнай праўды і сяброўства

Удзельнікі «Цягніка Памяці» папярэдніх гадоў дзеляцца сваімі ўражаннямі ад праекта.

Экалогія

Якія прагнозы на лета робяць метэаролагі?

Якія прагнозы на лета робяць метэаролагі?

Тры месяцы суцэльнай спякоты нам не абяцаюць

Гараскоп

Усходні гараскоп на наступны тыдзень

Усходні гараскоп на наступны тыдзень

У пачатку тыдня да Ракаў могуць падступна падкрасціся трывогі і сумневы.