Белстат распавёў аб дасягненнях Беларусі за час суверэнітэту ў лічбах

Старшыня Нацыянальнага статыстычнага камітэта Іна Мядзведзева распавяла БелТА аб ключавых дасягненнях Беларусі за час суверэнітэту ў лічбах.

Па словах Іны Мядзведзевай, рэальныя наяўныя даходы і сярэднямесячная заработная плата ў Беларусі маюць тэндэнцыю да росту. «Мы сёння займаем 3-е месца сярод краін СНД па сярэднямесячнай заработнай плаце, саступаючы толькі Расіі і Казахстану. У Беларусі адсутнічае крайняя беднасць у міжнародным вызначэнні (доля насельніцтва з даходамі ніжэй за $2,15), а ўзровень малазабяспечанасці ў нацыянальным вызначэнні з 1995 года па цяперашні час знізіўся ў 10 разоў і складае 3,9%. У 2022 годзе адзначаўся самы нізкі ўзровень фактычнага беспрацоўя, разлічаны па метадалогіі МАП, — 3,6% за перыяд назіранняў з 2012 года. Узровень фактычнага беспрацоўя ў Рэспубліцы Беларусь з’яўляецца адным з самых нізкіх не толькі сярод краін СНД, але і ў свеце», — распавяла старшыня.

Калі ў канцы 20 стагоддзя Беларусь уваходзіла ў лік краін з сярэднім узроўнем чалавечага развіцця, то апошнія 5 гадоў яна стабільна ўваходзіць у групу краін з вельмі высокім узроўнем чалавечага развіцця.

Значнае дасягненне ёсць і ў пытаннях гендарнай роўнасці. «За гады суверэнітэту ў краіне сфарміравалася новае пакаленне жанчын. Калі на пачатак 90 — х гадоў сярод працуючых жанчын вышэйшую адукацыю мелі толькі 16%, то ў 2022 годзе — 41%», — адзначыла кіраўнік Белстата.

У Беларусі сёння развіта сетка лячэбна-прафілактычных арганізацый. Аказанне дапамогі насельніцтву ажыццяўляецца ў адпаведнасці з міжнароднымі стандартамі. За гады незалежнасці колькасць амбулаторна-паліклінічных арганізацый павялічылася ў 1,8 раза.

Ахова здароўя Беларусі характарызуецца высокай забяспечанасцю медыцынскімі кадрамі. Калі ў 1991 годзе на 10 тыс.чалавек насельніцтва колькасць лекараў складала 39,1, то ў 2022 годзе — 59,8 чалавека. «У медыцынскую практыку ўкараняюцца новыя ўнікальныя тэхналогіі і высокатэхналагічныя ўмяшанні. У рэйтынгу краін свету па трансплантацыі Беларусь знаходзіцца на 5-м месцы па трансплантацыі почак, на 10-м месцы па трансплантацыі печані, на 11-м месцы па трансплантацыі сэрца. У нас вельмі высокія рэйтынгі па захаванні мацярынства і дзяцінства», — сказала Іна Мядзведзева.

Сацыяльная накіраванасць жыллёвай палітыкі дзяржавы выяўляецца ў тым, што пад асаблівым кантролем знаходзіцца будаўніцтва жылля для шматдзетных сем’яў, дадала яна. «За 2013-2022 гады для гэтай катэгорыі грамадзян пабудавана 5,9 млн кв.м агульнай плошчы жылых дамоў, пры гэтым амаль 60% за апошнія 4 гады. Практычна ўсе шматкватэрныя жылыя дамы апошнія гады будуюцца ў энергаэфектыўным выкананні, што дазваляе зніжаць выдаткі на іх эксплуатацыю. Забяспечанасць насельніцтва жыллём у разліку на аднаго жыхара за гады суверэнітэту ўзрасла з 18, 4 кв.м агульнай плошчы ў 1991 годзе да 29, 4 кв. м у 2022 годзе», — прывяла лічбы старшыня. Па забяспечанасці насельніцтва жыллём Беларусь займае адно з лідзіруючых месцаў сярод краін СНД.

Таксама Іна Мядзведзева спынілася на тэме адукацыі. «У нас вельмі высокі ўзровень адукацыі, і гэта пацвярджаюць міжнародныя рэйтынгі. Праведзены намі перапіс у 2019 годзе паказаў, што ўзровень адукацыі за апошнія 10 гадоў значна вырас. Гэта сведчыць аб тым, што ў Беларусі пераважаюць высокакваліфікаваныя кадры, якія могуць працаваць якасна ва ўсіх напрамках», — падкрэсліла яна.