Дзіцячы «зялёны» намётавы лагер працуе на Чыжоўскім вадасховішчы

Амаль месяц як на беразе Чыжоўскага вадасховішча ў Мінску працуе незвычайны дзіцячы намётавы лагер. Больш за 60 юных натуралістаў атрымліваюць тут веды пра навакольнае асяроддзе і развіваюць навыкі самастойнага жыцця, удзельнічаюць у спаборніцтвах, актыўных і інтэлектуальных гульнях і праводзяць майстар-класы па стварэнні вырабаў з прыродных матэрыялаў, назіраюць за птушкамі і робяць запісы... Адным словам, цікава і з вялікай карысцю бавяць летнія канікулы.

Летні лагер арганізаваны ў рамках гарадскога праекта «Зялёныя класы беларускай сталіцы», што сумесна ладзяць Мінскі гарадскі камітэт прыродных рэсурсаў і аховы навакольнага асяроддзя і сталічны Цэнтр экалагічнага выхавання і развіцця. Галоўная мэта такіх злётаў — даць школьнікам магчымасць працягнуць назіранне за прыродай на канікулах. Тут дзеці даглядаюць за невялікім агародам, жывым кутком з хатнім трусам, сочаць за птушкамі. Таксама ў лагеры ёсць лабараторыя з інкубатарам для вывядзення залацістых фазанаў і перапёлак, плануецца ўстаноўка акварыума для рачной рыбы.

Руслан Шайкін, дырэктар мінскага Цэнтра экалагічнага выхавання і развіцця і кіраўнік летніх змен зялёнакласнікаў удакладняе:

— Дзеці з 1–5 класаў прыходзяць зранку толькі на дзённы час. Таму мы і называем свой летнік злётам, падчас якога вядзём дзяцей у аднадзённы паход. Да самага вечара паказваем мясцовых птушак, насякомых і расліны. У прыватнасці, на Чыжоўскім вадасховішчы ёсць адкрытая тэрыторыя, дзе жывуць шэрыя курапаткі.

Летнік уключае некалькі міні-праектаў: «Зараджэнне жыцця», «Вырошчванне самоў», «Жыццёвы цыкл божай кароўкі» і інш. Так, «Зараджэнне жыцця» прадугледжвае ўсталяванне аўтаномных інкубатараў для вывядзення птушак — дарэчы, хутка чакаем вывадак перапёлак.

Поспех праекта тлумачыцца тым, што мы ўвесь навучальны год займаемся з дзецьмі ў школах, што маюць зялёныя класы (19 школ і каля 1900 дзяцей. — Заўв. рэд.), праводзім экскурсіі. А злёты — гэта своесаблівая палявая практыка.

У выніку безупыннай дзейнасці Цэнтра экавыхавання і развіцця рух зялёнакласнікаў з кожным годам пашыраецца на новыя школы сталіцы. Верагодна, што такі прыклад мясцовай асветы мог бы знайсці водгук і ў іншых абласцях Беларусі. Забаўляльна-пазнавальны змест праекта робіць яго дастаткова займальным, каб стаць устойлівай з’явай дзіцячага руху краіны.

Кожная змена (адна на месяц) уключае 10 дзён. Апошняя плануецца з 21 па 30 жніўня.

Уладзімір РУСАКОВІЧ

Фота з архіва Міністэрства прыродных рэсурсаў і аховы навакольнага асяроддзя