Вы тут

Што хвалюе беларускіх пенсіянераў?


З мэтай вывучэння грамадскай думкі аб праблемах, якія хвалююць насельніцтва пенсіённага ўзросту, Інстытутам сацыялогіі Нацыянальнай акадэміі навук Беларусі ў ліпені — жніўні 2023 года было праведзена тэлефоннае апытанне. Даследаванне ахапіла ўсе абласныя гарады, Мінск, асобныя раённыя цэнтры і сельскія населеныя пункты (памылка выбаркі складае +4,0%). У апытанні прынялі ўдзел асобы ва ўзросце ад 58 гадоў. Выбарачная сукупнасць склала 601 рэспандэнт.


Ацэнка стану здароўя

Ацэньваючы па пяцібальнай шкале стан уласнага здароўя, кожны другі апытаны пенсіянер называе яго сярэднім — ацэнка ў тры балы (51,6%), а кожны чацвёрты (25%) — добрым (сума варыянтаў адказу «чатыры» і «пяць»). На дрэнны стан здароўя ўказалі 18,9% рэспандэнтаў (сума варыянтаў адказу «адзін» і «два»). Не змаглі адказаць на пытанне 4,5% рэспандэнтаў.

Удзельнікі апытання не толькі непакояцца аб стане ўласнага здароўя, але і прымаюць актыўныя прафілактычныя меры, якія яго падтрымліваюць. Кожны другі пенсіянер выконвае рэкамендацыі ўрача (50,8%), а 45,1% аддаюць перавагу актыўнаму ладу жыцця. Кожны трэці ўважліва сочыць за ўласным харчаваннем (33,5%), рэгулярна праходзіць медыцынскі агляд і дыспансерызацыю (31%). Таксама рэспандэнты імкнуцца менш нервавацца (28,4%), прымаюць прэпараты, якія павышаюць імунітэт (24,1%), пазбягаюць шкодных звычак (21,1%), выконваюць рэжым дня (18, 3%), займаюцца фізкультурай, спортам (17,8%). Іншыя карысныя звычкі маюць 6,2% удзельнікаў апытання. Толькі 3,6% апытаных указалі, што асабліва нічога не робяць для клопату аб сваім здароўі. Не змаглі адказаць на пытанне 3% апытаных.

Арганізацыя вольнага часу

Свой вольны час жыхары пенсіённага ўзросту часцей за ўсё праводзяць за праглядам тэлевізара, праслухоўваннем радыё (55,4%), а таксама займаючыся садам, агародам, дапаможнай гаспадаркай (53,2%).

Таксама ўдзельнікі апытання адзначылі, што здзяйсняюць прагулкі на свежым паветры (41,3%), чытаюць кнігі, часопісы і газеты (33,4%), размаўляюць з сябрамі і сваякамі (29,6%), бавяць час з сям’ёй (23,2%).

У якасці вольнага часу ўдзельнікі апытання таксама выбіраюць творчасць (12,9%) і наведванне культурна-масавых мерапрыемстваў (8,9%). Значна радзей рэспандэнты ў вольны час займаюцца паляваннем і рыбалкай (5,5%), спортам і фізкультурай (5,4%), падарожнічаюць (3,3%). Варыянт адказу «Іншае» выбралі 11,9% удзельнікаў апытання.

Інфармаванасць аб пагрозе махлярства

Даныя апытання паказалі, што з выпадкамі махлярства сутыкаліся 43,8% апытаных пенсіянераў, не сутыкаліся — 56,2%. Большасць тых, хто сутыкнуўся з махлярствам, не панеслі ніякай шкоды (83,6%). Пры гэтым 16,4% прызналіся, што пацярпелі ад дзейнасці ашуканцаў.

Насельніцтва пенсіённага ўзросту ўсведамляе, што ў выпадку пападання ў ашуканскія схемы неабходна звяртацца па дапамогу кампетэнтных органаў. Большасць удзельнікаў апытання ў такіх сітуацыях выбіраюць зварот у міліцыю (78,2%). Скарыстаюцца дапамогай сяброў або сваякоў 11,6% рэспандэнтаў, звернуцца ў службу сацыяльнай абароны 1,5% апытаных, у грамадскія арганізацыі — 0,3%. Толькі 6,3% апытаных адзначаюць, што ў выпадку сутыкнення з махлярствам не будуць звяртацца па дапамогу. Не змаглі адказаць на пастаўленае пытанне 5% рэспандэнтаў.

Надзея НІКАЛАЕВА

Загаловак у газеце: Тэлевізар або газеты і кнігі?

Выбар рэдакцыі

Жыллё

Арэндная стаўка на здымнае жыллё працягвае зніжацца

Арэндная стаўка на здымнае жыллё працягвае зніжацца

Свежасць раёна, кватэры з новай планіроўкай — гэтыя фактары сёння маюць ключавое значэнне.

Адукацыя

У фокусе — прафесійная адукацыя

У фокусе — прафесійная адукацыя

Кіраўнікі адукацыйных ведамстваў упэўнены, што супрацоўніцтва ў сферы адукацыі з’яўляецца важным фактарам для ўстойлівага сацыяльна-эканамічнага развіцця дзвюх краін.

Грамадства

«Шэрая» зарплата — сумныя вынікі

«Шэрая» зарплата — сумныя вынікі

Што губляюць работнік і дзяржава?