Два калектывы — з Ташкента (Узбекістан) і Самары (Расія), прэм’еры з удзелам зорак оперы, а таксама грандыёзны фінальны гала-канцэрт — з 10 па 15 снежня ў Вялікім тэатры Беларусі вось ужо ў трынаццаты раз пройдзе Мінскі міжнародны Калядны оперны форум.
Напярэдадні гэтай вялікай культурнай падзеі у Вялікім тэатры зладзілі прэс-падыход, на якім арганізатары адказалі на пытанні наконт правядзення музычнага свята.
— Канцэпцыя форуму грунтавалася на некалькіх падыходах, — адзначыла генеральны дырэктар Вялікага тэатра Беларусі Кацярына Дулава. — Першы — гэта безумоўна ўдзел у поўным складзе труп нашых тэатраў-партнёраў, з якімі мы правялі перагаворы і ўступаем у актыўнае творчае ўзаемадзеянне. Другі — гэта паказ нашых прэм’ер. Трэці, вельмі важны,— агляд творчай моладзі Вялікага тэатра Беларусі, нашых выдатных галасоў з тым, каб разумець, на якім узроўні сёння знаходзіцца оперная трупа і як яна павінна рухацца і развівацца далей.
Калі казаць пра прэм’еры, то іх запланавана дзве. Яны маладзёжныя, «Севільскі цырульнік» ставіўся як вельмі лёгкая канцэпцыя італьянскага тэатра, якая напоўнена рухамі, гумарам і імправізацыйнасцю на сцэне. А «Іаланта» ў сваю чаргу — гэта сапраўды ўнікальная традыцыя, калі чатыры-пяць саставаў, асабліва маладых салістаў, удалося сабраць разам. Тут артысты адчуваюць сябе ў своеасаблівай зоне камфорту, таму што музыку Пятра Чайкоўскага ўсе вельмі добра ведаюць. Салістам прапанаваны сёння новы рэжысёрскі кантэкст, — расказала Кацярына Дулава.
Адкрые форум 10 снежня прэм’ера оперы Пятра Чайкоўскага «Іаланта». Паэтычная гісторыя сляпой дзяўчыны, якой раптам узнілае каханне да незнаёмага рыцара дапамагае вытрымаць пакутлівае лячэнне, у свой час так кранула сэрца Пятра Ільіча, што ён стварыў адно з самых прыгожых і жыццесцвярджальных сваіх тварэнняў.
Пастаноўшчыкамі спектакля выступілі тры галоўныя спецыялісты тэатра — дырыжор Арцём Макараў, рэжысёр Ганна Маторная, мастак Любоў Сідзельнікава.
— Мы вырашылі зноў вярнуцца да надзвычайнага сюжэту «Іаланты» з музыкай Пятра Чайкоўскага, які ператварае рамантычную сагу ў сапраўдны міф пра шлях чалавечай душы, — расказала галоўны рэжысёр Вялікага тэатра Беларусі, рэжысёр-пастаноўшчык оперы «Іаланта» Ганна Маторная. — Гэта сапраўдны шэдэўр, сімфонія з галасамі, гісторыя са шчаслівым канцом. У оперу закладзена, на мой погляд, глабальная ідэя містычнага характару. Тут падымаецца самая важная тэма для нас — духоўнасць чалавека, і на яе аснове створана сапраўднае літургічнае дзейства.
Нагадаем, што гэта пастаноўка оперы Пятра Чайкоўскага стане пятай на сцэне беларускага Вялікага тэатра. Дагэтуль да «Іаланты» звярталіся ў 1952-м, 1975-м, 1993-м і 2004-м.
Гасцямі Мінскага міжнароднага Каляднага опернага форуму стануць адразу два калектывы — з пастаноўкамі, якіх няма ў рэпертуары беларускага Вялікага.
12 снежня Дзяржаўны акадэмічны Вялікі тэатр Узбекістана ім. А. Наваі прадставіць яркую, з усходнім каларытам оперу Бізэ «Шукальнікі жэмчугу».
У партыі Надзіра выступіць генеральны дырэктар Дзяржаўнага акадэмічнага Вялікага тэатра Узбекістана ім. А. Наваі, народны артыст Узбекістана Раміз Усманаў. Дырыжор — заслужаны дзеяч мастацтваў Узбекістана Фазлідзін Якубжанаў.
Наступны дзень — 13 снежня — працягне свята музыкі камічная опера Расіні «Севільскі цырульнік» італьянскага рэжысёра Тарабэллы. Гэта яшчэ адзін беларускі спектакль, які сёлета прадстаўлены на форуме. Для ўдзелу запрошаны саліст Вялікага тэатра Расіі Гадэрдзі Джанелідзэ і саліст Камернай сцэны ім. Б. А. Пакроўскага маскоўскага Вялікага Валерый Макараў. Салістаў, напэўна, ведае і любіць беларуская публіка. І калі Валерыя Макарава глядач Вялікага тэатра ўжо чуў у партыі графа Альмавівы, то Гадэрдзі Джанелідзэ ўпершыню спяе ў Мінску партыю Дона Базіліа ў оперы Расіні.
14 снежня гонар расійскай оперы будуць адстойваць салісты Самарскага акадэмічнага тэатра оперы і балета імя Д. Д. Шастаковіча з пастаноўкай Сяргея Пракоф’ева «Любоў да трох апельсінаў».
У Гала-канцэрце Viva Opera, прысвечаным закрыццю Мінскага міжнароднага Каляднага опернага форуму-2023 (які адбудзецца 15 снежня) прымуць удзел як госці, так і беларускія салісты.
Вялікі тэатр Беларусі прадставяць народныя артысты краіны Анастасія Масквіна, Уладзімір Громаў, Станіслаў Трыфанаў, лаўрэат міжнародных конкурсаў Анастасія Малевіч, уладальнік медаля Ф. Скарыны Дзмітрый Шабеця і маладыя салісты Дар’я Гаражанка, Анастасія Міхнавец і Аляксей Макшанцаў.
Гасцямі свята стануць: Уладзіслаў Сулімскі, Раміз Усманаў, Саргіс Бажбеук-Мелікян, Гадэрдзі Джанелідзэ, Агунда Кулаева, Аляксей Татарынцаў, Аляксандра Сакалова.
Яна ВАЛАСАЧ
Фота аўтара
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».