Петрышэнка: Усё зроблена для зручнасці абітурыентаў

У Мінскім дзяржаўным лінгвістычным універсітэце прайшла сустрэча намесніка прэм’ер-міністра Беларусі Ігара Петрышэнкі з калектывам работнікаў і студэнтаў ВНУ, паведамляе БелТА.

Віцэ-прэм’ер адзначыў, што падобныя сустрэчы становяцца добрай традыцыяй. Як ён дадаў, ВНУ створаны для таго, каб выконваліся асноўныя параметры менавіта ў якасці адукацыйнага, выхаваўчага і ўсіх іншых працэсаў з пункту гледжання фарміравання магутных не толькі спецыялістаў, але і патрыётаў нашай краіны.

Сустрэча прайшла ў форме дыялогу. Студэнтаў цікавілі пытанні кошту навучання, умоў пражывання ў інтэрнатах, харчавання. Гаворачы аб аплаце за навучанне, Ігар Петрышэнка звярнуў увагу: «У Беларусі дзесьці 50%, дзесьці 70% аплачвае студэнт, усё астатняе бярэ на сябе дзяржава. Кошт платнай адукацыі толькі нязначна расце суразмерна росту заробкаў прафесарска-выкладчыцкага складу, а таксама для ўдасканалення матэрыяльнай базы ВНУ».

Што тычыцца змены правілаў паступлення ў вышэйшыя і сярэднія спецыяльныя навучальныя ўстановы, то намеснік прэм’ер-міністра падкрэсліў, што ўсё зроблена для зручнасці тых, хто паступае. «Новыя правілы паступлення ў ВНУ і ССНУ замацавалі, каб залішне не напружваць хлопцаў, якія завяршаюць вучобу ў школе і будуць паступаць. Былі дыскусіі, што трэба, што не. Мы прынялі цэнтралізаваны экзамен і іншыя новаўвядзенні, гэта зацверджана і не патрабуе карэкціроўкі», — адзначыў ён.

У цэлым Ігар Петрышэнка запэўніў, што ўсе аспекты дэталёва разглядаюцца ў рамках Савета рэктараў. «Выпрацоўваюцца адпаведныя рашэнні, каб нам ісці плаўна і не бударажыць студэнцкае асяроддзе, асабліва бацькоў, якія перажываюць за паступленне сваіх дзяцей у будучую ўступную кампанію», — дадаў ён.