«Наш каледж — унікальная ўстанова адукацыі!»

Філіял Беларускага нацыянальнага тэхнічнага ўніверсітэта «Салігорскі дзяржаўны горна-хімічны каледж» быў адкрыты ў 1961 годзе. З 2015 года каледж з’яўляецца структурным падраздзяленнем Беларускага нацыянальнага тэхнічнага ўніверсітэта.

Больш за 60 гадоў філіял — адзіная ўстанова ў рэспубліцы па падрыхтоўцы рабочых і спецыялістаў для горназдабыўной прамысловасці, забяспечвае падрыхтоўку спецыялістаў для энергетыкі, органаў і падраздзяленняў міністэрства па надзвычайных сітуацыях Рэспублікі Беларусь.

Сярод выпускнікоў — лаўрэат Дзяржаўнай прэміі ў галіне навукі і тэхнікі, поўны кавалер знака «Шахцёрская слава», у мінулым генеральны дырэктар ААТ «Беларуськалій» Андрэй Башура; генеральны дырэктар ААТ «Беларуськалій» Іван Галаваты; шахцёр-ардэнаносец, Ганаровы грамадзянін Салігорскага раёна Леанід Міснік; намеснік міністра па надзвычайных сітуацыях Рэспублікі Беларусь генерал-маёр унутранай службы Анатоль Даўгалявец і іншыя.

— У філіяле праходзяць навучанне каля 900 чалавек. З іх, атрымліваюць сярэднюю спецыяльную адукацыю ў дзённай форме 688 навучэнцаў, у завочнай форме — 146, на ўзроўні прафесійна-тэхнічнай адукацыі — 60 чалавек. За 62 гады падрыхтавана больш за 13000 прафесійных кадраў. Усе нашы выпускнікі працаўладкоўваюцца. З 2021 года філіял аказвае адукацыйныя паслугі для замежных грамадзян, круглы год працуюць падрыхтоўчыя курсы «Руская мова як замежная». — распавяла чытачам партала Выдавецкага дома «Звязда» дырэктар філіяла Іна Скуратава. — Нашы выпускнікі не толькі дастойна працуюць у эканоміцы краіны, але і самі цяпер займаюцца падрыхтоўкай кваліфікаваных прафесійных кадраў у сваім родным каледжы. Сярод іх: Дзмітрый Басалыга, які працуе 25 гадоў выкладчыкам вучэбнага прадмета «Аварыйна-выратавальная падрыхтоўка», Вадзім Чарніцкі, які выкладае 23 гады ў філіяле вучэбную дысцыпліну «Пажарная аварыйна-выратавальная тэхніка і абсталяванне». Ёсць у нас і сямейныя дынастыі. Так, выкладчык прадметаў агульнатэхнічнага модуля і модуля эканомікі, кіравання і арганізацыі вытворчасці Дзіна Цімафеева з 2000 года працягвае педагагічную дзейнасць сваёй маці — Валянціны Васільеўны, якая прапрацавала выкладчыкам у каледжы з 1963 па 1999 год.
Наш каледж — унікальная ўстанова адукацыі!