Васілеўская і Лянкова пасадзілі свае імянныя дрэвы на Алеі касманаўтаў на Байкануры

Прадстаўніцы Беларусі Марына Васілеўская і Анастасія Лянкова, якія ўваходзяць у асноўны і дублюючы экіпажы палёту ў космас, пасадзілі свае імянныя дрэвы на Алеі касманаўтаў на Байкануры, паведамляе БелТА са спасылкай на прэс-службу дзяржкарпарацыі «Раскосмас».

«Па шматгадовай традыцыі, якая бярэ свой пачатак ад першага касманаўта Зямлі Юрыя Гагарына, пасля абеду Алег Навіцкі, Марына Васілеўская, Трэйсі Дайсан, Іван Вагнер, Анастасія Лянкова і Дональд Петыт адправіліся на Алею Касманаўтаў, дзе тыя, хто ўжо лятаў, наведалі і дагледзелі свае дрэвы, а новыя ўдзельніцы касмічнага палёту азнаёміліся з даўнім звычаем іх пасадкі перад першай экспедыцыяй на арбіту», — гаворыцца ў паведамленні «Раскосмасу».

Члены экіпажа пілатуемага карабля «Саюз МС-25» працягваюць рыхтавацца да касмічнага палёту на МКС на касмадроме Байканур.

«Сёння на трэніроўках касманаўтаў «Раскосмасу» Алега Навіцкага і Івана Вагнера, удзельніц касмічнага палёту ад Рэспублікі Беларусь Марыны Васілеўскай і Анастасіі Лянкавай, астранаўтаў NASA Трэйсі Дайсан і Дональда Петыта прысутнічалі прадстаўнікі СМІ. Журналісты назіралі за падрыхтоўкай па ўпраўленні пілатуемым караблём і па бартавой дакументацыі. Таксама яны змаглі паглядзець на вестыбюлярныя трэніроўкі і заняткі агульнай фізічнай падрыхтоўкай. У канцы “навучальнага” часу члены экіпажаў правялі вольны час за гульнёй у шахматы, настольны тэніс, більярд і шашкі», – распавялі ў «Раскосмасе».

У складзе асноўнага экіпажа пілатуемага карабля «Саюз МС-25» касманаўт Раскосмасу Алег Навіцкі, удзельніца касмічнага палёту ад Рэспублікі Беларусь Марына Васілеўская, астранаўт NASA Трэйсі Дайсан. Іх дублёры — касманаўт Раскосмасу Іван Вагнер, удзельніца касмічнага палёту ад Рэспублікі Беларусь Анастасія Лянкова і астранаўт NASA Дональд Петыт. Старт міжнароднай экспедыцыі запланаваны на 21 сакавіка.