Чарговыя пяць спектакляў, якія можна паглядзець анлайн і бясплатна

Купалаўскі тэатр абвясціў, што таксама вяртаецца ў рэальнае жыццё. Пастаноўкі будуць іграцца на яго сцэне ўжо з 15 чэрвеня — першай сімвалічна стане «Паўлінка», з якой калектыў традыцыйна пачынае новы сезон. Тэатр абяцае прытрымлівацца мер бяспекі: зала Галоўнай сцэны будзе запаўняцца прыкладна на траціну, гледачы будуць сядзець адно ад аднаго на дыстанцыі, а перад спектаклямі і пасля іх будзе праводзіцца дэзынфекцыя памяшкання. Мяркуючы па ўсім, такое рашэнне — раней аналагічнае прыняў Рэспубліканскі тэатр беларускай драматургіі — адпавядае грамадскаму запыту. Тым не менш меры самаізаляцыі ўсё яшчэ актуальныя, таму мы прапануем чарговыя пяць спектакляў для прагляду на экране, каб у тэатр вы ўсё яшчэ хадзілі анлайн.

«Жызэль, альбо Вілісы» ў Вялікім тэатры оперы і балета

«Месца хопіць усім», — кажа Вялікі ў запрашэнні на анлайн-трансляцыю сваёй пастаноўкі славутага фантастычнага балета Адольфа Адана, якая адбудзецца а сёмай гадзіне 14 чэрвеня. Вілісы — гэта прывіды нявестаў, якія памерлі да вяселля, а «Жызэль» — гісторыя пра смерць ад кахання, амаль літаральна. Паводле сюжэта простая сялянка Жызэль ходзіць на спатканні з Альбертам — графам, пераапранутым у сялянскае адзенне. Закаханы ў дзяўчыну ляснічы Ганс выкрывае сапраўдную сутнасць Альберта, у выніку чаго аказваецца, што граф ужо заручаны. Не вытрымаўшы ўзрушэння, Жызэль памірае. У другім дзеянні Альберту, які прыйшоў на магілу каханай, мусяць адпомсціць вілісы, але дух Жызэлі, дэманструючы сваё безумоўнае каханне, яго выратоўвае. «Жызэль, альбо Вілісы» будзе дэманстравацца ў пастаноўцы народнага артыста СССР Мікіты Далгушына — гэта пятае ўвасабленне балета на сцэне Вялікага, здзейсненае ў 2012 годзе. Запіс быў зроблены ў сакавіку 2020-га, галоўныя партыі тут танцуюць Яна Штангей, Ягор Азаркевіч, Аляксандра Чыжык і Антон Краўчанка. Трансляцыя запісу адбудзецца на YouTube-канале тэатра.

«Ноч кратоў» у тэатры «Нантэр-Амандзье»

Авангардны парыжскі тэатр «Нантэр-Амандзье» выклаў у агульны доступ запісы спектакляў свайго мастацкага кіраўніка Філіпа Кена, між іншым, аднаго з галоўных герояў сучаснай парыжскай тэатральнай сцэны. Гэта «Меланхолія цмокаў» і «Ноч кратоў», якія нават можна назваць культавымі. Сталыя персанажы Кена, вялізныя футровыя краты, ледзь не жывуць сваім жыццём і выходзяць за межы аднаго спектакля ў рознага кшталту праекты і перформансы. «Ноч кратоў» 2016 года — пастаноўка без слоў, але з вельмі настойлівымі гукамі. Яна стварае закрытую і даволі своеасаблівую прастору і насяляе яе цудоўнымі з глядацкага пункту гледжання істотамі. «Пластычны сусвет — прыдуманая Філіпам Кенам пячора кратоў — стварае паэтыку падзямелля на мяжы паміж жудаснай атмасферай пекла і шчасцем абароненага ад мітусні прытулку». Спекталь ідзе гадзіну пятнаццаць, не патрабуе субцітраў і не дае адарваць ад сябе вачэй.

«Эліксір кахання» ў тэатры «Ла Манэ»

Паколькі надвор'е стала сапраўды гарачае, дарэчным будзе прагляд «палкай» оперы Гаэтана Даніцэці «Эліксір кахання», пастаўленай у бельгійскім «Ла Манэ», альбо Каралеўскім тэатры манетнага двара. Тэатр быў заснаваны ў 1700 годзе і нават сыграў ролю ў палітычнай гісторыі Бельгіі — у 1830 годзе падчас выканання опернай арыі менавіта з яго сцэны прагучаў заклік «Да зброі!», што стала пачаткам Бельгійскай рэвалюцыі, а тая, у сваю чаргу, прывяла да абвяшчэння незалежнасці Бельгіі. Да 30 чэрвеня на сайце «Ла Манэ» можна паглядзець некалькі яго пастановак, што ўяўляюць сабой цалкам сучасныя, драйвовыя работы па класічных творах, — «Лаэнгрын» Рыхарда Вагнэра, «Залаты пеўнік» Мікалая Рымскага-Корсакава ці моцартаўская «Чароўная флейта». І, нарэшце, «Эліксір кахання» Гаэтана Даніцэці, дзе оперныя спевакі ў купальніках, сланцах, парэа, панамах ды сонечных акулярах разыгрываюць камедыю, у якой адзін лекар-прайдзісвет выдае бутэльку віна за эліксір кахання. У запісах можна настроіць англійскія субцітры.

Спектакль Cіrco Ambulante «Тэатра Нацый»

Пастаноўка Андрэя Магучага зараз даступная ў анлайн-кінатэатры Okko, які стала паказвае не толькі добрыя фільмы, але і добрыя тэатральныя спектаклі. Cіrco Ambulante варты ўвагі, па-першае, таму, што яго пастаноўшчыкам з'яўляецца адзін з найвядомейшых у Расіі авангардных тэатральных рэжысёраў і шматразовы лаўрэат прэміі «Залатая маска». Па-другое, таму, што мастаком тут выступае стваральнік інжынернага тэатра АХЕ Максім Ісаеў, а над дэкарацыямі для гарадка на вулканічным востраве трэба было пашчыраваць. Нарэшце, адну з роляў тут выконвае актрыса Лія Ахеджакава. І ўсё гэта пра нейкі невядомы свет, сумесь сацыялізму і дзіўнай фантазіі — тут горы смецця, закрыты металургічны завод і адкрыты мясакамбінат. Пакінуць востраў жыхары могуць хіба на самалёце, але накапіць на дарагі білет здольны не многія, а тыя, хто ўсё ж накапіў, з'ехалі і не вярнуліся. І вось у гэтым гарадку з'яўляецца мара — стаць сусветным цэнтрам клаўнады. Спектакль пастаўлены ў «Тэатры Нацый» у 2012 годзе.

«Сон у летнюю ноч» у тэатры «Глобус»

Лонданскі «Глобус» з панядзелка будзе два тыдні паказваць шэкспіраўскую камедыю «Сон у летнюю ноч». Спектакль утрымлівае ў сабе любоўныя жарсці, норавы бацькоў, магію лясных духаў, дзіўныя ператварэнні, танцы, пацалункі і смех. Гэта кайфовае і яскравае відовішча: «Глобус» даўно не ставіць «акадэмічнага» Шэкспіра, а стварае на аснове яго твораў актуальныя і эфектныя работы. Тут магчымыя рэчы, што не асацыююцца з эпохай класічнага драматурга (напрыклад, гей-пацалункі альбо чарнаскурыя акцёры), затое гэта спектаклі, што адлюстроўваюць сённяшні свет. Мы ўжо расказвалі: сучасны тэатр «Глобус» быў адбудаваны амаль што на месцы і на ўзор тэатра, акцыянерам і непасрэдным аўтарам якога быў сам Уільям Шэкспір. Сёння ён запрашае гледачоў толькі ў цёплую пару года і, вядома ж, шчыльна працуе з творамі класіка. Спектаклі, якія «Глобус» паказвае анлайн, суправаджаюцца англійскімі субцітрамі.

Вольга МІЦКЕВІЧ