Лукашэнка — жыхарам сяла: Вы з’яўляецеся апорай стабільнасці нашай дзяржавы

Прэзідэнт Беларусі Аляксандр Лукашэнка наведаў храм Іаана Прадцечы у вёсцы Шаршуны Мінскага раёна, які быў асвечаны сёння раніцай. Унікальны для Беларусі храмавы комплекс у візантыйскім стылі, які ўключае ў сябе царкву, прычтавы дом, дзіцячую пляцоўку і месца для адпачынку вернікаў, пабудаваны за два гады на сродкі вядомага расійскага бізнесмена Міхаіла Гуцарыева. Заказчыкам будаўніцтва выступіла замежнае будаўнічае ўнітарнае прадпрыемства «СертусАвія».

«Перш за ўсё дазвольце павіншаваць вас з гэтым светлым днём, з гэтым добрым часам — у нашай краіне з’явілася яшчэ адно цёплае, утульнае месца, і я вельмі спадзяюся, што мы заўсёды будзем прыходзіць сюды, каб падумаць пра будучыню, згадаць усё добрае мінулае і зрабіць правільныя высновы наперад», — звярнуўся ў храме Аляксандр Лукашэнка да вернікаў.

Прэзідэнт выказаў падзяку Міхаілу Гуцарыеву за ўзятыя абавязкі па будаўніцтву не толькі храмавага комплексу, але і іншых сацыяльных ды вытворчых аб'ектаў.

Кіраўнік дзяржавы паведаміў, што за апошнюю чвэрць стагоддзя ў краіне пабудаваныя больш за паўтары тысячы культавых будынкаў, і гэта работа працягваецца.

«Абсалютна ўпэўнены, што наша зямля, дзякуючы вось гэтай падзвіжніцкай дзейнасці заўсёды будзе знаходзіцца пад аховай Госпада, — дадаў ён. — У гэтым канкрэтным месцы я яшчэ раз упэўніўся, якая цудоўная ў нас зямля. І мы павінны абавязкова яе захаваць». 

Ён выказаў пажаданне, каб храмавы комплекс быў напоўнены людзьмі: «Калі праходзіце міма, проста завітайце, падумайце пра добрае».

Яшчэ адно пажаданне Прэзідэнта датычылася ўсіх жыхароў вёскі ў краіне: «Вельмі хачу, каб наша сяло квітнела. Мы нямала зрабілі, але мы толькі ў пачатку шляху. Вы, напэўна, асабліва ў апошні час адчулі, што такое жыць на сваёй зямлі, што такое сваё. І павінен вам сказаць, калі б не было вас, жыхароў сяла, нам было б яшчэ цяжэй».

«Менавіта вы з’яўляецеся асновай, апорай стабільнасці нашай дзяржавы, я вам бязмерна за гэта ўдзячны. Калі новае пакаленне вельмі хоча паспрабаваць новага жыцця — няхай. Але мы з вамі павінны пражыць гэтае жыццё ў спакоі і міры, асабліва старыя нашы. Ім хапіла, асабліва пасля вайны», — патлумачыў Аляксандр Лукашэнка.

Аляксандр Лукашэнка падарыў шаршуноўскаму прыходу ікону Прасвятой Багародзіцы.

«Яшчэ адна лампада духоўнасці запаленая на нашай беларускай зямлі», — сказаў у вітальным слове Мітрапаліт Мінскі і Заслаўскі Веньямін, Патрыяршы Экзарх усяе Беларусі. 

Ён адзначыў немалую заслугу і кіраўніка дзяржавы ў аднаўленні і пабудове новых храмаў у краіне. 

«Каб духоўны складнік наш развіваўся, каб адраджалася вера наша, духоўнасць, каб мы жылі больш правільна, больш набожна, з любоўю і падтрымкай адзін аднаго, многае, несумненна зробленае, але яшчэ шмат належыць зрабіць, — дадаў уладыка. — Але ў нас ужо ёсць цудоўная магчымасць тут, у гэтым храме ўзмацніць малітву за нашу святую Беларусь, за наш народ, за нашу будучыню, і каб мы, як дзеці аднаго Айца Нябеснага, радавалі Яго і прыносілі плён добрымі справамі».

Мітрапаліт Веньямін падарыў Прэзідэнту ікону Пакрава Прасвятой Багародзіцы, якую Аляксандр Лукашэнка вырашыў таксама пакінуць у новым Свята-Іаанаўскім храме.

«Тут недалёка, праз паўтара кіламетры, быў храм, які знеслі бальшавікі ў 1919 годзе, — адказаў на пытанне журналістаў пра выбар месца для будаўніцтва царквы Міхаіл Гуцарыеў. — Ёсць і знакавае месца, праз 50-100 метраў — магіла танкістаў. Чатыры маладыя чалавекі загінулі ў 1944 годзе падчас вызвалення Беларусі. Яны згарэлі ў танку. І мне падалося правільным, калі б храм з’явіўся насупраць іх магілы. Непадалёк адсюль знаходзіцца і школа. Кожную раніцу дзеці будуць ісці міма царквы. Гэта і былі асноўныя параметры выбара месца. Магчыма, больш мэтазгодна было пабудаваць яе на ўзгорку, гэта было б прыгажэй, але мне падаецца, што так, як зроблена, — больш правільна».

Бізнесмен дадаў, што і ў выбары месцы для храма, і ў некаторых іншых пытаннях яго будаўніцтва і аздаблення браў ўдзел кіраўнік дзяржавы. 

Мітрапаліт Веньямін уручыў Міхаілу Гуцарыеву ордэн Кірылы Тураўскага I ступені ў знак падзякі за асабісты ўклад ў справу будаўніцтва храма.

Яго ўзвядзенне было распачата ў 2018 годзе. Мінулам летам Прэзідэнт на сустрэчы з Міхаілам Гуцарыевым дзякаваў бізнесмену за яго дабрачынную дзейнасць у Беларусі, у тым ліку і за ўзвядзенне праваслаўнай святыні.

Сёлета ў маі для яе былі асвечаны крыж і званы.

Храм мае незвычайную для нашых земляў архітэктуру, якая ўласцівая старажытна-візантыйскаму стылю: даволі шырокі купал (12 метраў у дыяметры) тут спалучаецца з высокім (каля 30 метраў) будынкам.

Вольга МЯДЗВЕДЗЕВА

Фота БЕЛТА