Мікалай ЗАЙЦАЎ. З прыдуманага, падгледжанага, перажытага...

Селекцыянер Агуркоў атрымаў падзяку за новы сорт бульбы пад назвай «Нiтратаўка», якая аказалася дзейсным сродкам у барацьбе з грызунамi.

Жонка справядліва называла мужа змеем, бо дахаты ён звычайна прыпаўзаў…

Прыватная медыцынская фірма ў галіне рэфлексатэрапіі купiць цвiкi i шрубы.
(З аб’явы.)

Прадбачлівы Пётр Пятровiч перад працяглай камандзіроўкай выкiнуў з кватэры шафу.

Мяняю аднаго мужчыну без шкодных звычак на двух са шкоднымi.
(З аб’явы.)

Язык не сабака — на ланцуг не пасадзiш.

Каханне нібыта сонца, якое то ўзыходзiць, то заходзiць… Толькі сонца грэе ўдзень, а каханне — уночы.

Калi Iвана Iванавiча абазвалi дубам, ён вельмi пакрыўдзiўся, бо лiчыў сябе значна мацнейшым.

Ажаніўся адзін раз, другі, трэці… І ўсё па каханні!
Праўду кажуць, што ў кахання ёсць пачатак, ды няма канца.

Мяняю вестыбулярны апарат на самагонны.
(З аб’явы.)

Нават заядламу аматару жывёл цяжка вывучыць сабачую мову. У сабак што ні слова — гаў ды гаў…

Калi галава трашчыць — значыць, моцна думае.

г. Баранавічы.