У Гомелі ліцэіст падзарабляў кур’ерам у махляроў

Як адзначыў намеснік начальніка Гомельскага гарадскога аддзела Следчага камітэта Беларусі Сяргей Маркевіч, у абласным цэнтры распачата 11 крымінальных спраў па фактах злачынстваў у адносінах да грамадзян пенсіённага ўзросту. Састарэлыя сталі ахвярамі махляроў, якія па тэлефоне паведамлялі аб ДТЗ з удзелам родных пажылых людзей.

Разыгрывалі тэлефонны спектакль з удзелам ілжэправаахоўніка ці «адваката». Апошнія прапанавалі «вырашыць праблему» за грашовую кампенсацыю. Па грошы да пенсіянераў прыязджаў кур’ер.

— Следчым разам з супрацоўнікамі органаў унутраных спраў у даволі кароткія тэрміны ўдалося ўстанавіць асобу кур’ера, які мае дачыненне да васьмі злачынных эпізодаў, — патлумачыў Сяргей Маркевіч.

Ім аказаўся раней не судзімы непаўналетні навучэнец прафесійна-тэхнічнага ліцэя. Яму прад’яўлена абвінавачанне ў здзяйсненні злачынства, прадугледжанага часткай 4 артыкула 209 (махлярства) Крымінальнага кодэкса Беларусі. Непаўналетні ўзяты пад варту.

Як удакладніў намеснік начальніка Гомельскага гарадскога аддзела СК, абвінавачаны ў інтэрнэце знайшоў аб’яву і звязаўся з заказчыкам. Той растлумачыў, што працуе група псіхолагаў. Задача кур’ера — выязджаць па пэўных адрасах і заіраць пакеты з грашыма. Заказчык «паслугі», абяцаў, што адказваць па законе ліцэісту не давядзецца. Кур’ер пакідаў сабе да дзесяці % ад атрыманай сумы, астатнія грошы пералічваў «наймальніку». Яго асоба цяпер устанаўліваецца. Праваахоўнікамі па трох іншых фактах махлярства таксама ўстаноўлены падазроны, месцазнаходжанне якога пакуль не вядома.

— Мы прымем усе меры, каб справядлівасць перамагла і пацярпелым быў кампенсаваны прычынены ўрон, — адзначыў Сяргей Маркевіч.

Як вядома, пажылыя гамяльчане былі ашуканы ў цэлым на 51,5 тысяч долараў, больш за 18 тысяч еўра і 61 тысячу рублёў.

Наталля КАПРЫЛЕНКА

Фота УСК па Гомельскай вобласці