Сёння ў сталіцы пачынае работу ХІ Беларускі міжнародны медыяфорум «Партнёрства ў імя будучыні», а таксама адкрываецца ХХ Міжнародная спецыялізаваная выстаўка «СМІ ў Беларусі». У якасці арганізатараў гэтых значных падзей у галіне медыя выступілі Міністэрства інфармацыі нашай краіны, Парламенцкі Сход Саюза Беларусі і Расіі, Пастаянны камітэт Саюзнай дзяржавы.
Цягам некалькіх дзён журналісты-прафесіяналы будуць удзельнічаць у абмеркаванні актуальных пытанняў галіны, правядуць серыю майстар-класаў у фармаце летняй школы журналістыкі ў Інстытуце журналістыкі БДУ, сваімі думкамі падзеляцца падчас «круглых сталоў», семінараў і панэльных дыскусій. Натуральна, гасцей Беларусі чакае і знаёмства з краінай, а таксама доўгія гадзіны гутарак у кулуарах, шмат сустрэч са старымі і новымі сябрамі.
З якім настроем прыехалі замежныя госці на медыяфорум? Ці стаў для іх форум першай сустрэчай з нашай краінай? На гэтыя пытанні нашага карэспандэнта адказваюць самі ўдзельнікі:
Гюльнара МАМЕДЗАДЭ, генеральны дырэктар агенцтва міжнароднай інфармацыі «Навіны-Азербайджан» (г. Баку, Азербайджан):
— У медыяфоруме я прымаю ўдзел упершыню, але ў Мінску бываю досыць часта. Так, у 2012 годзе ўдзельнічала ў сустрэчы з Прэзідэнтам Беларусі Аляксандрам Лукашэнкам, якая прайшла ў фармаце клуба галоўных рэдактараў выданняў СНД, Балтыі і Грузіі. Наша сустрэча доўжылася каля трох гадзін і сфарміравала вельмі яркае ўражанне пра Беларусь. Прыязджаючы ў вашу краіну, мы кожны раз робім шмат адкрыццяў. Памятаю, ваш Прэзідэнт сказаў, што Беларусь дасягае якасці ва ўсіх тых кірунках, якія краіна бярэ за аснову ў сваім развіцці. І мы гэта сапраўды бачым. Літаральна тыдзень таму я зноў была ў Мінску, тут удзельнічала ў вялікім форуме «Пакаленне пераможцаў». Вельмі прыемна зноў завітаць у беларускую сталіцу.
Мінск сапраўды ператвараецца ў вельмі важную інтэграцыйную, міратворчую пляцоўку. Старанне вырашыць канфлікты, знайсці мірнае рашэнне складаных палітычных пытанняў становіцца своеасаблівым «Мінскім брэндам». Мінск актыўна ўдзельнічае ў інтэграцыйных фарматах, беларуская ініцыятыва адыгрывае вельмі важную ролю ў збліжэнні народаў і краін. Таму медыяфорум бачыцца вельмі важнай магчымасцю прафесіянальнага абмену, працы ў групах, камандах, шматбаковага абмеркавання важных палітычных пытанняў. Цікава таксама больш даведацца пра Беларусь.
Ільгар ІСМАІЛАЎ, намеснік галоўнага рэдактара газеты «Бакинский рабочий» (г. Баку, Азербайджан):
— Медыяфорум — вельмі цікавы фармат прафесіянальнага дыялогу. Я на форуме не ўпершыню, але кожны раз на першы погляд аднолькавыя мерапрыемствы адбываюцца ў розным фармаце. Нават наведванне Мірскага, Нясвіжскага замкаў праходзяць па-рознаму. Гады два таму каля сцен Мірскага замка ўдзельнікаў медыяфоруму сімвалічна прынялі ў беларусы. Была такая шчырая і ганаровая акцыя. Таму я таксама часткова — беларус. Больш за тое, тут можна пабачыць сапраўдных «акул пяра», у якіх нават мы, вопытныя журналісты, можам многаму павучыцца. І гаворка не толькі пра Летнюю школу журналістыкі, якая праходзіць у межах форуму ў Інстытуце журналістыкі БДУ, але і пра магчымасць пагутарыць у нязмушанай атмасферы.
Дарэчы, школа журналістыкі — бясцэнны вопыт для моладзі, будучых прафесіяналаў галіны. Гэта і перадача сакрэтаў майстэрства, і сяброўскія гутаркі з асамі прафесіі. Прыемна таксама, што медыяфорум сёлета праходзіць адначасова з выстаўкай «СМІ ў Беларусі». Такога яшчэ не было, і гэта сапраўды выдатная задумка арганізатараў — даць магчымасць журналістам з розных краін бліжэй пазнаёміцца са СМІ Беларусі.
На постсавецкай прасторы ёсць канфлікты, і каму, калі не нам паміж сабой размаўляць на гэтую тэму? Важна разумець, што сапраўды адбываецца ў свеце. Журналісты павінны кантактаваць. І тое, што сёлетні форум — ужо адзінаццаты па ліку, доказ таму, што ён стаў вельмі папулярнай інтэрнацыянальнай сустрэчай.
Эмануіл МКРТЧАН, генеральны дырэктар інфармацыйнага агенцтва «АрмІнфа» (г. Ерэван, Арменія):
— Карысць медыяфорумаў відавочная. З цягам часу краіны, якія раней былі сябрамі, нават братамі, аддаляюцца, кожная пачынае жыць толькі ў сваёй «кватэры». Мы часам самі не разумеем, што сапраўды адбываецца ў суседзяў. Таму важна як мага часцей кантактаваць, каб аддзяляць «зерне ад пустазелля». «Пустазелля», на жаль, становіцца ўсё больш. Разуменне гэтага прымушае задумацца пра сэнс нашай прафесіі, пра тое, хто мы, журналісты — санітары ці рупары. Мне падаецца, нам трэба заставацца сабою і працаваць на аздараўленне грамадства, палітычнага асяродку і міжнародных адносін.
Я на медыяфоруме не ўпершыню і досыць часта прыязджаю ў Беларусь на сустрэчы прафесійнага характару. Колькі гадоў таму разам з іншымі журналістамі браў удзел у сустрэчы з Прэзідэнтам Беларусі Аляксандрам Лукашэнкам. Упэўнены, што прафесійныя журналісты павінны разумець: трэба ставіць заслоны няпраўдзе, выдумкам фактаў і гісторыі ў цэлым.
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
