Спёка, якая ўсталявалася ў сярэдзіне чэрвеня, зноў пагнала людзей на рэчкі і азёры. Ды і як можна ўявіць летні адпачынак без пляжа і купання? Аднак для кагосьці падобныя забаўкі прыносяць не асалоду, а сапраўдную праблему.
— Практыка паказвае, што асноўным фактарам, які негатыўна ўплывае на стан правапарадку ў месцах адпачынку, — ужыванне алкаголю, — кажа Сяргей Гардынец, старшы інспектар арганізацыйна-аналітычнага ўпраўлення міліцыі грамадскай бяспекі МУС. — На жаль, пакуль яшчэ не знік стэрэатып аб тым, што адпачынак на прыродзе абавязкова павінен суправаджацца выпіўкай. Пра гэта сведчыць і статыстыка. Толькі ў маі, які, між іншым, не з'яўляецца пікам пляжнага сезона, супрацоўнікі міліцыі выявілі каля тысячы правапарушэнняў, звязаных з распіццём піва і спіртных напояў.
У сувязі з гэтым МУС нагадвае, што зоны адпачынку і пляжы — грамадскія месцы, дзе распіваць алкаголь забаронена. За гэта прадугледжаны штраф да
1 680 000 рублёў. А паўторны штраф можа павялічыцца амаль удвая. Правапарушальніка таксама могуць арыштаваць на 15 сутак.
— Толькі справа не ў штрафах, — адзначае старшы інспектар. — Штодня супрацоўнікі міліцыі фіксуюць факты, калі адпачывальнікі, найперш моладзь, пад уздзеяннем алкаголю выходзяць за рамкі дазволенага, што можа выклікаць цяжкія наступствы. Нядаўна ў Гродзенскім раёне два мясцовыя жыхары адпачывалі на беразе рэчкі. Пасля таго, як выпілі, пабіліся. У выніку адзін з іх загінуў. Другі вынік п'янага адпачынку — гібель на вадзе. Толькі за апошні месяц вясны ў вадаёмах Беларусі патанулі 6 чалавек. 5 з іх былі ў стане алкагольнага ап'янення.
Каб прадухіліць такія здарэнні, міліцыя арыентавана на папярэджанне падобных фактаў. Праваахоўнікі сумесна з прадстаўнікамі Таварыства ратавання на водах праводзяць прафілактычныя рэйды. У тым ліку на плавальных сродках.
Сяргей Гардынец заўважае, што да знаходжання міліцыі ў зонах адпачынку трэба ставіцца з разуменнем. «Іх галоўнай задачай з'яўляецца ахова парадку, а вопыт працы сведчыць, што ўжо сам факт прысутнасці міліцыянера істотна дысцыплінуе адпачывальнікаў і значна зніжае рызыку стаць ахвярай няшчасных выпадкаў ці злачынства», — кажа Сяргей Гардынец.
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
