Вы тут

Падбіраем правільны абутак для няправільнай ступні


Калі дзіця развіваецца правільна, то пачынае хадзіць да канца першага года. Паскараць гэты момант ні ў якім разе нельга, хоць малыя нярэдка спрабуюць стаць на ножкі раней. Усё ж такі гэта празмерная нагрузка для крохкіх і гібкіх касцей, слаба развітых мышцаў. У выніку можа ўзнікнуць дэфармацыя і плоскаступнёвасць, якая з гадамі абумовіць шмат праблем з суставамі.


Плоскаступнёвасць — гэта дэфармацыя ступні, яе зводаў. Ступня складаецца з многіх касцей, звязак, сухажылляў і мышцаў, якія ўтвараюць два зводы, папярочны і падоўжны. Каб вытрымаць хаду, бег, падскокі, перанос цяжару, нам патрэбна трывалая ступня, добры фундамент. Добрая ступня дапамагае трымаць раўнавагу, амартызуе нагрузку, абараняе каленны, тазасцегнавы і галёнкаступнёвы суставы і нават пазваночнік.

Плоскаступнёвасць сустракаецца фактычна ў кожнага пятага школьніка, хоць большасці з нас ад нараджэння дастаюцца здаровыя ногі, і ад нас саміх залежыць, ці захаваем мы іх у парадку да старасці.

Даволі цяжка не заўважыць патаўшчэнне ступні, яе пашырэнне ў пярэдняй і сярэдняй частцы, апушчаны падоўжны звод. Звод папярочны — гэта выемка каля пальцаў ступні, калі яе няма, вялікі палец скрыўляецца, а з узростам расце костачка, на падэшве ўтвараецца натоптыш, цвёрды мазоль. Дзеці з такой праблемай могуць скардзіцца на боль у нагах, стомленасць, асабліва пасля працяглай хады. Не пакідайце гэтыя скаргі без увагі.

— У першую чаргу падбярыце дзіцяці правільны абутак з самага малога ўзросту, — кажа ўрач лячэбнай фізкультуры 3-й гарадской дзіцячай клінічнай паліклінікі г. Мінска Антаніна ТОПТУН. — Абутак павінен быць па памеры, з натуральнай, эластычнай скуры, гнуткі, з добрай амартызацыяй. Абавязковы атрыбут — абцас. Недапушчальна набываць абутак з адкрытай пяткай! Самы вялікі вораг ступні — высокія і касыя абцасы, падэшвы-платформы. Насок не павінен сціскаць пальцы, але і не павінен быць надта прасторным. Неабходна выкарыстоўваць і сцелькі-супінатары, якія будуць падтрымліваць натуральную вышыню зводаў ступні (прадаюцца ў спецыяльных магазінах — там жа ёсць і гатовы артапедычны абутак).

Умацаваць ступню дапаможа лячэбная гімнастыка, але пры ўмове, калі выконваць яе штодня. Практыкаванні лепей рабіць раніцай, пакуль мышцы не стаміліся. Паўтараць кожнае практыкаванне варта да 10-12 разоў.

  • Садзімся і ставім ступню на край вялікай тоўстай кнігі, сціскаем пальцы, абхопліваючы гэты край.
  • Захопліваем пальцамі розныя дробныя прадметы і пераносім іх на іншае месца.
  • Прыціскаем да падлогі мяч і катаем яго па чарзе кожнай нагой.
  • Згінаем пальцы і трымаем 3—6 хвілін.
  • Наступаем на палку нагой і катаем яе.
  • Падцягваем пальцамі маленькі дыванок.
  • Становімся басанож на падлогу, раўняем наскі, адначасова згібаем пальцы ступняў і не адрываючы пяткі рухаемся вусенічным крокам наперад.
  • Ідзём на насках у поўным прыседзе.
  • Робім перапады з наскоў на пяткі.
  • Ходзім на насках, пружынячы крок.
  • Ходзім на пятках, вонкавым і ўнутраным краі ступні.
  • Ходзім басанож па камянях, пяску, траве, рыхлай зямлі.

Каб пазбегнуць падобных праблем, трэба яшчэ мець правільную постаць, штодня займацца лячэбнай гімнастыкай, спортам, весці рухавы лад жыцця.

Святлана Барысенка

Выбар рэдакцыі

У свеце

Чаму Дональд Трамп захацеў набыць Грэнландыю?

Чаму Дональд Трамп захацеў набыць Грэнландыю?

Цяпер гэтая аўтаномная тэрыторыя ўваходзіць у склад Каралеўства Данія.

Грамадства

Школы Гомельшчыны прайшлі праверку на гатоўнасць да навучальнага года

Школы Гомельшчыны прайшлі праверку на гатоўнасць да навучальнага года

Сё­ле­та ў да­школь­ныя ўста­но­вы ра­ё­на прый­дзе 2 700 ма­лых.

Калейдаскоп

Вясёлыя гісторыі чытачоў

Вясёлыя гісторыі чытачоў

Чый боршч найлепш і навошта гарод гарадзіць.