Кажуць, што жаночай дружбы не бывае. Бывае, бывае! Інакш як назваць гэтую яе амаль паталагічную патрэбу бачыць мяне штодня, лезці ва ўсе мае справы са сваімі парадамі, разглядаць «пад лупай» майго чарговага знаёмага і надакучаць, надакучаць, надакучаць…
Наогул, жаночае сяброўства — гэта штосьці асаблівае! Спачатку яна зайздросціць тваёй свабодзе, сукенцы, працы… Потым моцна перажывае, калі ты няўдала выйшла замуж, не можаш «улезці» ў сукенку ці звольнілася, нарэшце, з абрыдлай працы.
Сяброўства — гэта калі яна ваюе з тваім мужам, адстойваючы тваю правату, нават калі ты зусім не маеш рацыі; цягне ў твой дом набытыя на апошнія грошы прадукты, калі твае фінансы зусім «расталі» падчас пошукаў новай працы. Яна вечна корпаецца ў тваёй душы са шчырым жаданнем навесці там парадак… Нават у далёкай паездцы, калі ты, маючы намер забыцца на час аб праблемах, займаеш верхнюю паліцу купэ, разгортваеш любімую кнігу і… На табе! Звініць мабільны, і знаёмы голас паведамляе, што вось, маўляў, месца сабе не знаходжу, таму што ты там адна, бесталковая, і абавязкова ці заблудзішся, ці што-небудзь важнае забудзеш, і наогул, трымайся далей ад незнаёмых мужыкоў, усе яны сво… А ў суседкі зноў новы палюбоўнік… А тое футрачка, якое ты купіла перад ад'ездам, яно табе, ведаеш, неяк не вельмі, і калі вырашыш прадаваць, то я, так і быць, куплю… Тэлефон награваецца, ты адчуваеш, што вось-вось узарвешся, суседзі па купэ раздражнёна варочаюцца. Але адмовіцца ад размовы — ні-ні, таму што тады будзеш мець усе магчымыя непрыемнасці, пачынаючы з «Не хачу з табой больш размаўляць!» да «Пайду, нап'юся атруты…»
Карацей, наша жыццё без сябровак было б складаным і сумным. Складаным, бо вельмі часта хочацца падзяліцца сваімі перажываннямі, а калі няма вернай сяброўкі — то няма з кім. Сумным, калі няма з кім падзяліць радасць — разам пасмяяцца з чарговай серыі «Адчайных хатніх гаспадынь», абмеркаваць суседку з першага ці апошняга (не ў гэтым сутнасць!) паверха, успомніць прыгоды падчас адпачынку…
Аднак ёсць сярод нас і тыя, каму не пашанцавала з сяброўкай. Чыясьці «разнесла» па ўсім горадзе чужую тайну, другая завяла раман з чужым мужам, трэцяя падманула… Безумоўна, праблемы і непаразуменні ўзнікаюць у любых адносінах, і жаночая дружба не выключэнне. Ніхто не застрахаваны ад крутых жыццёвых паваротаў. Але сапраўднае сяброўства можа пераадолець усё, бо яго галоўная каштоўнасць — гэта шчырыя чалавечыя зносіны. Такое сустракаецца не часта, і ім трэба даражыць. Што ж рабіць, каб нішто не магло азмрочыць дружбу?
Не «змешвайце» мужчын
Вашы кавалеры — гэта вашы кавалеры, а яе — гэта яе. Паклоннік сяброўкі — табу, ён хутчэй істота, якая не мае полу, і як патэнцыяльны мужчына не павінен разглядацца. І калі адна з вас парушыла гэтае правіла (жыццё ёсць жыццё!), то гаварыць пра сяброўства ўжо не прыходзіцца.
Не правакуйце зайздрасць
Усе мы людзі розныя, у нас розныя ўмовы жыцця, мужы, дзеці, начальнікі. Можа так здарыцца, што вы прыгажэйшая за сваю сяброўку, у вас багаты муж, які носіць вас на руках. А вось сяброўка мала таго што патаўсцела пасля родаў, дык і грошай не хапае, і муж «гуляе». Калі ў вас відавочная перавага, не хваліцеся, не правакуйце зайздрасць. Гэта ні да чога добрага не прывядзе. Будзьце сціплымі, расказваючы пра свае ўдачы; дзяліцеся перажываннямі. Хай сяброўка ўбачыць, што і ў вас ёсць праблемы.
Не прыніжайце
Нямногія людзі могуць пахваліцца жалезнай сілай волі. Таму калі ваша сяброўка слабахарактарная (напрыклад, нягледзячы на залішнюю вагу, не можа ўтрымацца ад шакаладкі), не прыніжайце яе словамі «ды куды табе — у люстэрка паглядзі».
Не прасіце ў доўг
Як вядома, даўгі маюць здольнасць разбураць добрыя адносіны і ператвараць сяброў у ворагаў. Таму старайцеся не прасіць і не даваць у доўг. А калі пазычылі, будзьце гатовыя да таго, што вы гэтыя грошы падарылі. Проста са спагады. Наогул, рэкамендуецца не ўмешваць у стасункі фінансы — яны заўсёды ўсё псуюць. Аддадуць не ў час, не ўсю суму, давядзецца нагадваць пра пазыку… Якое ўжо тут сяброўства…
Не судзіце строга
Сяброўкі часта звяртаюцца адна да адной па параду ў хвіліны смутку, расчаравання, працоўных няўдач. У такія моманты людзі найбольш уразлівыя. Нават калі вы лічыце, што сяброўка дзейнічала непрадбачліва, непрыгожа, не судзіце яе занадта строга. Яна ж прыйшла да вас па разуменне, а не па «рашэнне суда».
Вольга ЦЫБУЛЬСКАЯ.
_______________________________________________________________________
Праверце сябе
Якая вы сяброўка?
Тое, як мы сябе паводзім з сябрамі, можа шмат што пра нас расказаць. Пратэсціруйце сябе і зрабіце высновы.
Пытанні тэсту:
1. Сяброўка прапануе прайсціся па крамах, а ў вас няма ні грошай, ні настрою. Што вы будзеце рабіць?
а) Пагодзіцеся, каб дапамагчы ёй з пакупкамі.
б) Пойдзеце, каб развеяцца.
в) Адмовіцеся, каб не засмучацца лішні раз.
2. У краме вам абедзвюм спадабалася сукенка, якая засталася ў адзіным экземпляры. Вашы дзеянні…
а) Саступіце яе сяброўцы.
б) Прапануеце купіць сукенку ў складчыну і насіць па чарзе.
в) Угаворыце яе аддаць сукенку вам.
3. Сяброўка пазнаёміла вас са сваім новым кавалерам, які вам зусім не спадабаўся. Ваша рэакцыя?
а) Пастараецеся пасябраваць з ім.
б) Прамаўчыце — галоўнае, каб падабаўся ёй.
в) Скажаце ёй усё, што пра яго думаеце.
4. Ці дзеліцеся вы сакрэтамі з сяброўкай?
а) Расказваеце ёй усё.
б) Дзеліцеся многім, але ёсць рэчы, пра якія яна не ведае.
в) Тайны на тое і тайны, каб ні з кім імі не дзяліцца.
5. Як вы рэагуеце, калі сяброўка вас крытыкуе?
а) Прымаеце ўсё блізка да сэрца.
б) Прыслухоўваецеся, калі крытыка абгрунтаваная.
в) У адказ гаворыце пра яе заганы.
6. Сяброўка прапануе схадзіць у кіно, але вам гэты фільм зусім не цікавы. Вы пагодзіцеся?
а) Вядома, трэба скласці ёй кампанію.
б) Так, але з умовай, што потым пойдзеце на ваш любімы фільм.
в) Не, няхай нават не ўгаворвае.
7. Ваша рамантычнае спатканне ў самым разгары, ажно тэлефануе сяброўка і просіць тэрмінова прыехаць да яе. Што вы зробіце?
а) Кінецеся на дапамогу.
б) Паспрабуеце па тэлефоне высветліць, што здарылася.
в) Папросіце яе патэлефанаваць раніцай.
Вынікі тэсту
Калі ў вас большасць адказаў «а», то вы — «сяброўка-падушка». Вы — безадмоўная альтруістка, гатовая на многае дзеля дружбы. На вас заўсёды можна абаперціся: і ў цяжкую хвіліну, і ў радасны момант. Але ўсё ж не варта забываць і пра сваё асабістае жыццё, інакш вы рызыкуеце загразнуць у чужых праблемах і клопатах.
Калі ў вас большасць адказаў «б», то вы — «сяброўка-дыпламат». Вы даражыце сваімі сябрамі, але пры гэтым стараецеся трымаць дыстанцыю. Вы заўсёды можаце знайсці кампраміс, які б задаволіў усіх. Калі трэба, то вы гатовы прыйсці на дапамогу, але старанна ўсё ўзважыце, перш чым ахвяраваць сваімі інтарэсамі.
Калі ў вас большасць адказаў «в», то вы — «сяброўка-ракавінка». Уласныя інтарэсы для вас на першым месцы, а халодны разлік не пакідае месца для эмоцый. Магчыма, вы не давяраеце людзям і баіцеся адкрыцца перад імі? Усё ж такі варта часам вылазіць са сваёй «ракавінкі», бо сапраўднае сяброўства здольнае даць шмат станоўчых эмоцый.
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».