«Усё можна выправіць, — раз за разам кажу я свайму сыну. — Цацку адрамантуем, кубак склеім, горла вылечым. Выправіць можна ўсё і заўжды!» І ён «выпраўляе» — расказвае мне пра лісу, якая была вымушана выплюнуць Калабка, бо надта гучна спяваў сваю песеньку ў яе жываце. І суцяшае, калі я, адмовіўшыся ўзяць яго «на ручкі», пачынаю наракаць, што, маўляў, не такая моцная, як тата: «Не перажывай, ты падрасцеш і станеш мужчынам!»
Я і праўда лічу, што за вельмі рэдкім выключэннем выправіць можна практычна ўсё і заўсёды. Урэшце, задаўшыся мэтай, можна і біцэпсы сабе нарасціць… Але аднойчы, запаліўшы дзве свечкі на Антонавым імянінным торце і выпадкова зірнуўшы ў люстэрка паміж кухняй і гасцёўняй, міжволі адзначыла, што біцэпсы ў мяне і так неблагія (пэўна, практыкаванні з каляскай у нашым доме без ліфта не прайшлі дарэмна). Вось толькі агульнае відовішча мяне не надта парадавала — здаецца, яшчэ не так даўно я памятала сябе зусім іншай…
Да нараджэння Антона «пытанні ўзросту» мяне не надта займалі. У мяне была неблагая праца, былі грошы і разам з імі — упэўненасць у вечнай маладосці. Ёсць жа розныя «ботаксы», разважала я, дапускаючы калі-небудзь нават пластычную аперацыю. І шчыра здзіўлялася, калі чула ад каго-небудзь, што недаравальна заводзіць дзіця пасля юбілею, які ў народзе не прынята святкаваць. Маўляў, маці-бабуля — тое яшчэ выпрабаванне для дзіцячай псіхікі. Гэта з дасягненнямі сучаснай касметалогіі?
Адзначыўшы ў кампаніі паспяховых сябровак сваё 40‑годдзе, я неўзабаве нарадзіла сына і… на працяглы час забылася на сябровак, касметолагаў і на саму сябе. Калі ж мне, пазбаўленай сну на доўгія месяцы, зноў захацелася «ў людзі», высветлілася, што грошай на касметолага, а тым больш на ботакс разам з пластычнай аперацыяй ужо няма.
Але ў мяне засталося штосьці іншае. Мая жалезабетонная ўпэўненасць, што ўсё можна выправіць.
Ведаеце, як худзела мая найлепшая сяброўка? Большую частку свайго жыцця яна была жанчынай не проста з формамі, а з формамі манументальнымі. Але толькі ў 40 гадоў перастала грашыць на «спадчыннасць» і «абмен рэчываў» і запісалася ў фітнес-залу. Спачатку Таццяна займалася праз дзень, потым штодзённа, але формам яе нічога не рабілася. І так было амаль тры гады! А потым сяброўка трапіла ў Амерыку і на фоне тамтэйшых жанчын упершыню адчула сябе ледзь не дзюймовачкай. З гэтым новым усведамленнем і вярнулася ў сваю фітнес-залу. Праз лічаныя месяцы сяброўку не пазнаваў ніхто.
Дарэчы, я і сама добра памятаю, як, прыехаўшы па мяне ў піянерскі лагер, маці бегала вакол аўтобуса, упарта не заўважаючы маю «пасталелую» постаць — кармілі там выдатна, і за нейкія дзве лагерныя змены я стала шырэйшай за матулю. Той жнівеньскі дзень стаў для мяне «момантам ісціны» — увосень я запісалася у секцыю гімнастыкі ў прыгараднай спартыўнай школе, балазе бралі туды, не зважаючы на вагу і ўзрост. У адрозненне ад маладзейшых сябровак, трапіць у рэспубліканскую зборную мне, вядома, «не свяціла», але я ўсё ж засвоіла там дзве рэчы, што значна спрасцілі мае будучае жыццё. А менавіта: найлепшая дыета — дыета на ўсё жыццё, а добрая фігура — гэта найперш добрая пастава. Нават падчас цяжарнасці я на тое не забывалася. Але потым галава пайшла такім кругам… І аднойчы я злавіла сябе на думцы, што ўжо не такая юная і жвавая, каб займацца выхаваннем малога гарэзы. І імгненна ўбачыла пацвярджэнне гэтага ў люстэрку.
А крыху пазней, у каторы раз спрабуючы адшукаць найбольш эфектыўны спосаб выхавання для свайго малога, я натрапіла на чарговую нетрадыцыйную тэорыю пад назвай «эпігенетыка», заснавальнікам якой стаў амерыканскі генетык з класічнай медыцынскай адукацыяй і прозвішчам Ліптан. Яму ўдалося абсалютна навуковым чынам растлумачыць прынцып дзеяння плацэба, у выніку чаго ён прыйшоў да высновы, што аднымі толькі думкамі любы чалавек можа ўплываць на ўласны арганізм якім заўгодна чынам. І нават мяняць свой генетычны код. Толькі «працуюць» тут не павярхоўныя думкі, а тыя, што нашмат глыбей — у падсвядомасці.
Ёсць розныя методыкі, з дапамогай якіх свае глыбінныя перакананні можна паспрабаваць змяніць. Менавіта паспрабаваць — 100‑працэнтна дзейсных методык не прыдумана. Але некаторым людзям удаецца настройваць уласны мозг на здаровы лад аўтаматычна. Падчас сваіх эксперыментаў Ліптан прыйшоў да высновы, што такія шчасліўчыкі вырастаюць з дзяцей, якія сутыкнуліся з найменшай колькасцю псіхічных траўмаў у дзяцінстве (калі дакладна — ва ўзросце да шасці гадоў). Менавіта таму двое людзей з аднолькавай генетычнай схільнасцю, напрыклад, да ракавых захворванняў пражывуць вельмі рознае жыццё. Адзін прайграе барацьбу з хваробай, а другі з ёй нават не сутыкнецца… Калі ўсё так і ёсць, дык Анджаліна Джалі, напэўна, мае рацыю, робячы аперацыю за аперацыяй для прафілактыкі раку. Дзяцінства там было далёка не шчаслівым…
Затое ў мяне была бабуля, якая з лішкам кампенсавала любыя дзіцячыя расчараванні. І гэта яна нястомна паўтарала — усё можна выправіць. Нават калі табе балюча, варта расправіць плечы — і хмурыя маршчыны з твару пачнуць збягаць самі сабой. Між іншым, так і ёсць.
Цяпер я гляджуся ў люстэрка значна часцей. І ўсё часцей мне падабаецца тое, што я там бачу. Магчыма, сапраўды дапамаглі парады Агідэліі, на блог якой я своечасова натрапіла (у інтэрнэт-прасторы такое імя належыць адзінай жанчыне-касметолагу, якая рашуча маніфестуе супраць розных «уколаў прыгажосці» і іншых традыцыйных прыёмаў сучаснай касметалогіі). Дзякуючы ёй я пераканалася, што самыя дзейсныя касметычныя сродкі ў мяне заўжды былі пад рукою. Зрэшты, бабуля таксама вучыла калісьці, што настой рамонку і ваўчкоў разам з алеем лаванды — чароўныя сродкі не толькі для немаўляці. Мая любая бабуля, якая выйшла замуж пяты раз, горача закахаўшыся ў 68 гадоў…
Марына Беразенская
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?