Уладальнікі двух стабальных сертыфікатаў займаліся з рэпетытарамі і на факультатывах
Набраць сто балаў на цэнтралізаваным тэсціраванні — задача цяжкая, але выканальная. Сёлета пятнаццаць абітурыентаў паказалі найвышэйшыя рэзультаты пры здачы тэстаў па беларускай мове, дваццаць пяць чалавек безпамылкова выканалі заданні па мове рускай. А вось уладальнікі адразу двух стабальных сертыфікатаў — сёлета рэдкасць. Толькі тры абітурыенты ў краіне дамагліся такога выніку, фактычна забяспечыўшы сабе месцы ў лепшых ВНУ Беларусі. Карэспандэнт «Звязды» звязаўся з двума героямі ўступнай кампаніі і даведаўся аб сакрэтах іх поспеху.
Выпускнік сярэдняй школы №7 горада Баранавічы Дзмітрый ІГНАТЧЫК на «выдатна» здаў тэсціраванні па беларускай мове і матэматыцы. Дарэчы, да абітурыенцкага «хет-трыка» хлопцу не хапіла зусім трохі: у трэцім тэсце па фізіцы ён дапусціў усяго адну памылку, якая панізіла адзнаку да 96. Сакрэт свайго поспеху Дзмітрый бачыць у добрай працы настаўнікаў, якія рыхтавалі яго да ЦТ:
2
— Да здачы тэсціравання я доўга і ўпарта рыхтаваўся. Больш за ўсё быў упэўнены ў матэматыцы, менш за ўсё — у мове. Матэматыка была маім любімым прадметам у школе. На працягу ўсяго перыяду навучання я ёй цікавіўся. Наша школьная настаўніца, Таццяна Машніна, дапамагла мне палюбіць гэты прадмет і адкрыць для сябе шмат новага. Увогуле, з дакладнымі навукамі ў мяне праблем не было. З мовай, якую ў любым выпадку прыйшлося б здаваць, складаней. Але, зноў-такі дзякуючы настаўніцы, якая пераканала мяне здаваць менавіта беларускую мову і падрыхтавала да тэсціравання, усё атрымалася цудоўна.
Зразумела, нават самыя лепшыя настаўнікі не дапамогуць вучню-абібоку і лайдаку. Кошт двух стабальных сертыфікатаў — сотні гадзін дадатковай працы, адсутнасць вольнага часу і грашовыя выдаткі. Акрамя рэпетытара па фізіцы, Дзмітрый 4 разы на тыдзень наведваў факультатывы па матэматыцы, а па суботах у школе дадаткова займаўся беларускай мовай. Яшчэ адзін складнік поспеху, на які звяртае ўвагу хлопец, — удача. На трох тэсціраваннях яму трапляліся варыянты са знаёмымі заданнямі, якія ён умеў і любіў выконваць.
Паступаць хлопец збіраецца ў БДУІР, на спецыяльнасць «Праграмнае забеспячэнне інфармацыйных тэхналогій» факультэта камп'ютарных сістэм і сетак. Такому выбару паспрыяў удзел Дзмітрыя ў тэматычнай змене дзіцячага лагера «Зубраня», падчас якой хлопец з'ездзіў на экскурсію ў Парк высокіх тэхналогій і ў Беларускі дзяржаўны ўніверсітэт інфарматыкі і радыёэлектронікі. З таго часу ён і загарэўся марай працаваць у сферы ІT.
— Цяпер я планую паспяхова скончыць сваё навучанне ва ўніверсітэце, стаць моцным спецыялістам і знайсці добрую працу, — кажа Дзмітрый. — Ну і наладзіць асабістае жыццё, вядома. Калі казаць пра нешта глабальнае, то я хацеў бы павандраваць па свеце. Бо на зямлі так шмат цікавых і незвычайных месцаў, што цэлага жыцця можа не хапіць, каб пабачыць усё.
------
На факультэт камп'ютарных сістэм і сетак збіраецца паступаць і другі ўладальнік двух сертыфікатаў з максімальным балам — цяпер мінчанін, а раней жыхар горада Горкі, выпускнік мінскай гімназіі №75 Мікіта ЛАТУШКІН. Менавіта для адукацыі сына і дачкі Мікітавы бацькі тры гады таму з райцэнтра пераехалі жыць і працаваць у сталіцу. Відавочна, нездарма, бо сын чаканні сям'і ўжо апраўдвае.
У адрозненне ад папярэдняга героя, хлопец лічыць, што асноўным складнікам яго поспеху стала праца з рэпетытарамі. Мікіта персанальна займаўся з педагогамі па ўсіх трох прадметах: рускай мове, матэматыцы і фізіцы. Менавіта першае тэсціраванне па рускай мове стала для хлопца найгоршым:
3
— Тэст па рускай мове я, шчыра кажучы, «заваліў». Напэўна, сказалася расхалоджанасць і няўважлівасць: у некаторых заданнях замест членаў сказа пачаў вызначаць часціны мовы. Аб тым, што зрабіў усё няправільна, даведаўся ўвечары, калі з сябрам разбіраў тэст. Вядома, перапужаўся, бо калі б на гэтыя памылкі наклаліся якія-небудзь не заўважаныя мной, усё было б зусім дрэнна. Але вынік усё ж такі неблагі — 79. Такая крыўдная памылка на першым жа ЦТ моцна выбіла мяне з каляіны, але, напэўна, прастымулявала максімальна адказна паставіцца да астатніх.
Два другія тэсціраванні сталі для Мікіты выпрабаваннем. Хлопец расказвае, як не мог заснуць з-за стрэсу, а раніцай вельмі балелі вочы. Дрэнна спалася і яго бацькам. Тэсты па матэматыцы і фізіцы Мікіта выканаў за 80 і 100 хвілін адпаведна, але раней за вызначаны тэрмін па дамове з бацькамі з аўдыторыі не выходзіў — лішні раз правяраў і перачытваў, хоць і быў упэўнены абсалютна ва ўсіх адказах.
Вынік, безумоўна, задаволіў Мікіту і яго сям'ю, а таксама прынёс доўгачаканую палёгку. Цяпер хлопец плануе трохі адпачыць і... прыняцца за вывучэнне будучай спецыяльнасці самастойна.
— На маю думку, цэнтралізаванае тэсціраванне не дае максімальнай аб'ектыўнасці пры ацэнцы канкрэтнага чалавека, — дзеліцца думкамі Мікіта. — Тры гадзіны даецца для ўсіх, і не мае значэння, хутка ты ўсё зрабіў ці павольна. За час, які ў мяне заставаўся пасля напісання тэстаў, я мог паказаць, што ведаю і ўмею значна больш. Бо балаў мне магло і не хапіць. Напэўна, гэта галоўны недахоп тэсціравання, які я адчуў на сабе.
Планаваннем сваёй будучыні хлопец пакуль што не займаецца. Мікіта спадзяецца, што час, які ён правядзе ва ўніверсітэце, дазволіць яму не толькі атрымаць практычныя веды, а яшчэ і зарыентавацца ў сферы ІT, каб потым займацца любімай працай і знайсці шчасце ў жыцці.
Яраслаў ЛЫСКАВЕЦ.
Фота Сяргея НІКАНОВІЧА і з асабістага архіва.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?