У Мінску пачаў працаваць Цэнтр псіхалагічнай дапамогі ўсыноўленым і ўсынавіцелям. Адкрыўся ён падчас правядзення Міжнароднай канферэнцыі «Дзяцінства і сям'я ХХІ стагоддзя: праблемы і стратэгіі псіхалагічнай дапамогі і падтрымкі». Мы ўжо не раз пісалі аб праблемах адаптацыі дзяцей і бацькоў у апякунскіх сем'ях і сем'ях усынавіцеляў. Цяпер гэтай катэгорыі сем'яў будуць аказваць прафесійную дапамогу. Аб працы новага цэнтра расказаў доктар псіхалагічных навук, прафесар, кіраўнік каардынацыйнага савета цэнтра Леанід ПЕРГАМЕНШЧЫК.
— Неабходнасць стварэння гэтага цэнтра ўзнікла ўжо даўно. Цяпер у нас ёсць магчымасць дапамагаць усынавіцелям мэтанакіравана дзякуючы супрацоўніцтву БДПУ з італьянскім некамерцыйным гуманітарным фондам PUER. Кіраўнікі фонду падтрымалі ідэю стварэння цэнтра і дапамаглі нам фінансава. Справа ў тым, што спецыялісты фонду ведаюць аб праблемах сем'яў усынавіцеляў не па чутках, бо самі сутыкнуліся з праблемамі адаптацыі дзяцей у італьянскіх сем'ях.
Наша асноўная задача — псіхалагічнае кансультаванне дзяцей-сірот, усыноўленых і ўсынавіцеляў, а таксама праца з апякунскімі сем'ямі. Яшчэ мы будзем арганізоўваць вучэбныя семінары для ўсынавіцеляў і спецыялістаў, якія забяспечваюць сацыяльна-псіхалагічную рэабілітацыю і адаптацыю дзяцей, хто па розных прычынах застаўся без апекі бацькоў.
— Раскажыце, у чым складанасць дапамогі такім сем'ям?
— Справа ў тым, што сям'я ў нашай краіне ўвогуле «закрытая з'ява», а сям'я ў сітуацыі ўсынаўлення «закрытая» ўдвая. Чаму?
Працэс усынаўлення ў Беларусі пастаўлены на вельмі якасны ўзровень. У нашай краіне існуе вельмі добры Цэнтр усынаўлення. Усе людзі, якія працуюць там, адданыя гэтай справе. Яны шмат робяць для таго, каб падабраць бацькоў для дзяцей, праверыць, ці гатовы яны да будучага бацькоўства. Усынавіцелі вымушаны на гэта ісці: яны вучацца на спецыяльных падрыхтоўчых курсах, праходзяць спецыяльныя тэсты і медыцынскія агляды, прыносяць даведкі аб сямейных даходах... Але звычайна, як толькі бацькі атрымліваюць дзіця, яны нібыта негалосна даюць сігнал: «Не перашкаджайце нам, вы нас праверылі, мы гатовы!» І бацькоў можна зразумець: мала каму падабаецца, каб у яго сям'ю прыходзілі, нешта глядзелі, высвятлялі ці падглядвалі, як у замочную адтуліну.
Але на самой справе ўсе цяжкасці пачынаюцца тады, калі дзіця аказваецца дома. І гэтыя рэальныя цяжкасці ўзнікаюць і ў дзяцей, і ў бацькоў. Мы будзем дапамагаць ім у неафіцыйным фармаце.
— Сёння ўсё часцей адбываюцца скандалы з удзелам апякунскіх, прыёмных сем'яў і сем'яў усынавіцеляў...
— Так, але праз матэрыялы журналістаў амаль немагчыма ўбачыць рэальную карціну, якая склалася ў пэўнай сям'і. Нярэдка можна прачытаць, што вінаватыя бацькі або дзеці. Насамрэч, няма вінаватых! Людзі не змаглі знайсці кантакт, і ім патрэбна дапамога, а не абвінавачванні. Дапамога патрэбна і дзіцяці, каб справіцца з самім сабой, і маці, якой таксама трэба навучыцца кантраляваць сябе. І калі ім дапамагчы спраўляцца са сваімі пачуццямі і эмоцыямі, яны змогуць заўважыць, як лепей будаваць адносіны адзін з адным.
— Як будзе арганізавана праца ў цэнтры?
— Мы стварылі ўсе ўмовы, каб людзі не баяліся да нас звяртацца. Па-першае, калі патрэбна дапамога ананімна, значыць, будзем гэта рабіць. Калі патрэбна анлайн-кансультацыя, будзем працаваць анлайн! Ужо рыхтуецца сайт, дзе можна будзе перапісвацца са спецыялістамі. Калі неабходна прыехаць на дом, прыедзем! Дарэчы, па правілах крызіснай дапамогі, гэта больш правільна, чым калі прыязджаюць да нас, у цэнтр. Але мы будзем аказваць дапамогу так, каб гэта было зручна і камфортна для ўсынавіцеляў. Таксама са спецыялістамі можна пракансультавацца па тэлефоне.
У цэнтры працуюць спецыялісты-псіхолагі нашага ўніверсітэта. Гэта не толькі прафесары, якія чытаюць лекцыі і праводзяць семінарскія заняткі. У кожнага з выкладчыкаў ёсць вопыт работы з апякунскімі сем'ямі і сем'ямі ў стане крызісу. Упэўнены, што немагчыма расказваць студэнтам аб працы крызіснага псіхолага, калі няма практыкі. Па кніжках увогуле цяжка ўявіць усю складанасць такой дапамогі.
— Вы будзеце працаваць толькі ў Мінску ці гэта рэспубліканскі цэнтр?
— Мы плануем стварыць своеасаблівую базу псіхолагаў, якія будуць працаваць па розных гарадах краіны. Цяпер шукаем практыкуючых псіхолагаў, якіх мы падрыхтуем, і яны змогуць аказваць дапамогу сем'ям у сваіх гарадах. Мы будзем выконваць своеасаблівую каардынацыйную і адукацыйную дзейнасць для прафесіяналаў. Больш за тое, ужо сёння ў нас ёсць каля дваццаці валанцёраў, якія гатовы працаваць і ўдзельнічаць у дапамозе сем'ям. Гэта студэнты факультэта псіхалогіі БДПУ. Яны змогуць убачыць рэальныя праблемы ў жыцці, а не ў кніжках. Яны будуць працаваць з дзецьмі, выкарыстоўваючы розныя гульнявыя формы дапамогі. І гэта будзе ім прасцей зрабіць чым, напрыклад, мне, таму што яны ўсё ж бліжэй да дзяцей па ўзросце. Таму для нас дапамога студэнтаў вельмі важная. Ім практыка, а нам рэальная дапамога. Увогуле, цэнтр будзе працаваць на валанцёрскім руху.
— Звычайна людзям цяжка працаваць не за зарплату...
— Але я ўпэўнены, што матывацыя павінна быць прафесійнай, а толькі потым матэрыяльнай. Брыгада крызісных псіхолагаў пры нашым універсітэце працуе з 1990-х гадоў. Памятаеце, некалькі гадоў таму беларускі самалёт падбілі над Самалі? Тады да нас звярнулася авіякампанія з просьбай дапамагчы сем'ям беларусаў, якія страцілі блізкіх. І ведаеце, нашы псіхолагі адмовіліся ад грошай. Я ведаю, пра што гавару: такія справы робяцца не за зарплату. Безумоўна, нейкія бонусы абавязкова будуць, але для многіх прафесіяналаў дапамога ў крызіснай сітуацыі — справа гонару.
— Якія яшчэ асаблівасці ў вашага цэнтра?
— У кожнага нашага псіхолага будзе свой псіхолаг! У нас вельмі спецыфічная праца: мы працуем з людзьмі, у якіх цяжкасці і крызіс. Вось такая ў нас, псіхолагаў, карма! Калі псіхолаг не здолее адчуць болю людзей, якія да яго звярнуліся, то яму будзе цяжка ім дапамагчы. Часта крызісныя псіхолагі нібыта «прапускаюць» чужы боль праз сябе, і застаецца асадак... Таму ў кожнага нашага спецыяліста будзе свой псіхолаг, з якім можна будзе абмеркаваць нейкія прафесійныя моманты і проста элементарна выгаварыцца.
Наталля ТАЛІВІНСКАЯ
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».