Праграмістка на пенсіі робіць паясы
Святлана Сончык вырабляе паясы ўжо чацвёрты год. У свой час жанчына задумалася, чым будзе займацца на пенсіі?.. Убачыла ў метро аб'яву, што Беларускі саюз майстроў арганізоўвае курсы па розных відах рамёстваў, у тым ліку ткацтва, з гэтага ўсё і пачалося...
Яшчэ раней дачка Святланы ў школе хадзіла ў гурток па вырабе габеленаў, і маці надзвычай ўпадабала тое, што рабіла дзяўчо. Жанчына вырашыла таксама засвоіць майстэрства вырабу габеленаў. Аднак першыя тры месяцы на курсах вучылі ткацтву паясоў рознымі спосабамі — з тых часоў яна «захварэла» на паясы.
Ад камп'ютара — да натуральных рэчываў
Да таго, як заняцца вырабам паясоў, жанчына 40 гадоў працавала праграмістам. Кажа, што цяпер ёй цяжка нават падысці да камп'ютара — відаць, перапрацавала з ім за гады прафесійнай дзейнасці. Нават электронную пошту просіць правяраць дачку.
Ёсць у майстрыхі знаёмая, якая сёння вырабляе пернікі, а дагэтуль таксама ўсё жыццё працавала з камп'ютарам — цяпер ёй таксама не хочацца нават падыходзіць да гэтага агрэгата. Святлана адзначае:
— Такі доўгі час я працавала «ад» і «да», таму на пенсіі раблю выключна тыя рэчы, што мне падабаюцца. І нават заказы прымаю не ўсе, а толькі тыя, што даспадобы. Напрацаваўшыся з электроннай машынай, цяпер вельмі хачу быць бліжэй да ўсяго натуральнага. Таму я працую з ільном, воўнай, бавоўнай, і атрымліваю ад гэтага надзвычайную асалоду.
Муж Святланы напачатку быў супраць новага захаплення жонкі. Маўляў, развяла ў доме майстэрню і столькі часу губляе ў ёй. Аднак паступова ён прызвычаіўся. З адной паездкі нават прывёз прыгожыя драўляныя гузікі да яе вырабаў.
Чым больш чырвонага, тым глыбей на Палессе
Асабліва даспадобы Святлане Сончык прыйшлося ткацтва «на дошчачках». Па некаторых звестках, гэтаму віду рамяства ўжо шэсць тысяч гадоў. Распачыналася яно акурат на славянскіх землях.
Спосаб ткацтва называецца так, бо раней прылады для яго выраблялі ў асноўным з драўніны, часам з косці і каменю. Аднак цяпер тое ж прыстасаванне часта вырабляюць проста са склеенага кардону, у якім дзіркаколам робяцца адтуліны. Чым больш «дошчачак», тым больш шырокае палатно, заў-важае майстар. Прычым атрымліваецца яно вельмі трывалым.
У Святланы ёсць набор традыцыйных узораў, якімі здаўна карысталіся ў ткацтве:
— Раней пояс быў абавязковай часткай адзення. У гардэробе нашых продкаў паясы меліся як святочныя, так і для працы: першыя, як правіла, былі больш яркімі і прыгожымі. Колеравая гама на Беларусі была надзвычай разнастайнай, у кожным раёне выкарыстоўваліся свае колеры. А папулярная сёння бела-чырвоная гама была распаўсюджана на Палессі.
Некаторыя ўзоры для сваіх паясоў жанчына прыдумвае сама. За адзін з іх, створаны ўласнай фантазіяй (да таго ж пояс з'яўляецца двухбаковым), Святлана Сончык атрымала дыплом першай ступені на конкурсе ткачоў Мінскай вобласці. У гэтым поясе, дарэчы, выразна відаць сімвал нашай краіны — валошка...
Цікава і тое, што, у залежнасці ад настрою майстрыхі, у яе вырабы падбіраюцца адмысловыя колеры. Такім чынам, паясы ў нейкім сэнсе адлюстроўваюць яе эмацыйны стан.
«Хапіла на пуцёўку ў Грэцыю»
Сёння асноўныя пакупнікі прадукцыі, якую вырабляе Святлана, — гэта моладзь, што захапляецца фальклорам і этнаграфіяй. Добра распрадаецца ўсё на фольк-фэсце «Камяніца», які на пачатку верасня ладзіцца пад Мінскам. На рыцарскія турніры, па словах жанчыны, людзі таксама прыходзяць не толькі ў сярэднявечных, але і ў народных строях. Набываюць паясы для свайго гардэроба і тыя ўмельцы, якія займаюцца іншымі відамі рамёстваў.
З вялікай ахвотай тканыя паясы замаўляюць у якасці падарунка тыя людзі, што збіраюцца ў іншую краіну. Непасрэдна з-за мяжы таксама ёсць попыт. Напрыклад, дачка пісьменніка Алеся Савіцкага набыла ў майстрыхі два паясы — для дачкі і зяця, якія жывуць у Амерыцы.
З такога захаплення для душы Святлана мае і такую-сякую капейку:
— Вядома, і пэўны прыбытак гэта прыносіць. Калі я займалася на курсах, акрамя мяне туды запісаліся толькі 4 чалавекі з усяго Мінска, таму занятак гэты даволі рэдкі. Я аддаю свае вырабы ў сувенірныя, рамесніцкія крамы, сама гандлюю імі на розных фэстах. Падчас чэмпіянату свету па хакеі, які ў нас праводзіўся, зарабіла даволі добра — хапіла на турыстычную пуцёўку ў Грэцыю.
Найлепшы сувенір за мяжу
Паясы, вырабленыя майстрыхай, могуць каштаваць як 200, так і 600 і больш тысяч беларускіх рублёў. Акрамя паясоў, якімі, як вядома, падпяразваюць кашулі, Святлана прапануе і папругі (тыя самыя вырабы, толькі са спражкай) — такі сучасны варыянт для моднікаў. Ёсць і «фенечкі» — плеценыя бранзалеты на руку.
Вырабы, якімі асабліва ганарыцца Святлана — гэта льняныя сумачкі з устаўкамі з габелена, тканымі або плеценымі ручкамі. Яны надзвычай зручныя, асабліва ў летнюю спёку, мяркуе жанчына.
— Гэтыя льняныя сумкі разышліся ўжо па ўсім свеце. Іх набывалі ў Бразілію, Швейцарыю, Расію, Казахстан і на Балканы. Падчас чэмпіянату свету іх заказвалі фіны, якія любяць аранжавыя і жоўтыя тоны. Англічанам прыйшліся даспадобы светла-зялёныя.
У Беларусі асноўныя пакупнікі гэтых аксесуараў — маладыя мамы. Бо такія сумачкі можна павесіць праз плячо і заўсёды трымаць пад рукой. Лён робіць іх лёгкімі і амаль незаўважнымі. А яркія габеленавыя ўстаўкі і плеценыя ручкі дадаюць сумачкам падабенства з творамі вялікіх куцюр'е, якія разумеюць, у чым сапраўдная прыгажосць...
Ніна ШЧАРБАЧЭВІЧ.
Фота аўтара
Што за таемнымі дзвярыма?