Прыкладна за 100 кіламетраў на поўнач ад Мінска, у Вілейскім раёне, знаходзіцца населены пункт з музычнай назвай Бубны. Некалькі гадоў таму шэфства над мясцовай стратнай гаспадаркай разам з усімі яе праблемамі і пазыкамі ўзяло прадпрыемства «Мінгаз». З прыходам сталічнага кіраўніцтва ў Бубнах многае змянілася: тут пабудавалі новы малочнатаварны комплекс, у работнікаў выраслі заробкі, з'явілася новая тэхніка, дамы, дарогі, інфраструктура, газ... Але галоўнае — на вёску пацягнулася моладзь. Што і казаць, калі кіраўніку гаспадаркі, Аляксандру БРЫЛЮ, усяго толькі 26 гадоў? Карэспандэнты «Чырвонкі» сустрэліся з маладымі спецыялістамі, што працуюць па размеркаванні ў філіяле «Бубны», і даведаліся, якія перавагі дае моладзі сельскае жыццё.
[caption id="attachment_67642" align="alignnone" width="600"] Яна ТАРМОЛА.[/caption]
***
...Прыязджаем у заснежаную вёску раніцай і адразу накіроўваемся на ферму, дзе кароў даглядае робат. Тут і сустракаем нашу першую гераіню — Яну ТАРМОЛУ. З лета мінулага года дзяўчына працуе ў гаспадарцы ветэрынарным урачом.
— Здаецца, усё жыццё хацела працаваць ім, нават не ўзгадаю, з чаго ўсё пачалося, — расказвае дзяўчына. — Можа, з вёскі, куды я ездзіла адпачываць да бабулі і дзядулі летам, з іх гаспадаркі... Ды і проста цікавілася медыцынай. Можна сказаць, знайшла кампраміс. Яшчэ ў падлеткавым узросце паспела папрацаваць у лагеры «Зубраня», там ёсць маленькі заапарк пад назвай «Бабровая хатка». А потым паступіла ў Віцебскую ветэрынарную акадэмію — і ўсё закруцілася.
Падчас размеркавання дзяўчына шукала для сябе месца працы, якое было б недалёка ад дому ці ад сталіцы. Якраз у гэты момант паступіла прапанова ад «Мінгаза», што шукаў супрацоўнікаў для сваёй гаспадаркі. Акрэсленыя ўмовы працы (абавязкі, стан комплексу, наяўнасць жылля) задавальнялі Яну, таму выбар быў зроблены на карысць Бубнаў.
— Не буду хаваць, у першыя дні пасля пераезду было цяжка. Я адразу стала адказваць за ўсю гаспадарку, — узгадвае Яна. — Трэба было працаваць на поўную, прычым не толькі лячыць жывёлу, але і займацца папяровай працай, што напачатку было нязвыкла. Шчыра кажучы, у мяне дагэтуль ідзе перыяд адаптацыі, я толькі-толькі па-сапраўднаму ўвайшла ў рытм. Звычайны мой дзень выглядае так: пасля ранішняй планёркі я еду на комплекс. У першую чаргу гляджу цялят, бо маладое пакаленне патрабуе найбольшай увагі. Зараз у мяне больш за сто такіх «пацыентаў». І амаль дзве тысячы дарослага пагалоўя. Другую палову дня займаюся папяровай працай.
Для аператыўнага перасоўвання Яне выдзелілі аўтамабіль і кіроўцу. У дзяўчыны ёсць і свой Ford Mondeo, але ў вёсцы яна карыстаецца ім нячаста. Уласная машына — для паездак дадому і ў Мінск па выхадных. Свой адпачынак ветэрынар часцей за ўсё праводзіць у кампаніі іншых маладых спецыялістаў гаспадаркі. У Бубнах, па яе словах, асабліва не «развернешся». Вечары працоўнага тыдня Яна часцей за ўсё праводзіць з тэлевізарам і DVD-плэерам (інтэрнэт абяцаюць падключыць бліжэй да вясны). Яніны бацькі маюць свой дом у Нарачы, таму праблем з прывыканнем да жыцця «не ў кватэры» ў яе не было. Цяпер жа дзяўчына жыве з суседкай — загадчыцай фермы. Ёй так і весялей, і зручней — на начныя выклікі можна ехаць разам. Акрамя суседкі, кампанію ёй складаюць джэк-расэл-тэр'ер па мянушцы Буда і папугай.
Заробак у Яны, па вясковых маштабах, нядрэнны — ад 5 да 6 мільёнаў. У бліжэйшы час яго абяцаюць павялічыць.
— Асабліва вялікіх планаў на будучыню ў мяне няма, — дзеліцца Яна. — Зараз збіраю грошы, каб выканаць дзве мары: набыць фотаапарат і паехаць у падарожжа па Індыі. Мне падабаецца культура, традыцыі і гісторыя гэтай краіны. Пра працяг жыцця і працы ў Бубнах пакуль нічога сказаць не магу, бо адпрацавала толькі чатыры месяцы. Я хачу ўбачыць вынікі сваёй работы, а потым ужо прымаць рашэнні. Акрамя таго, у мяне ёсць хлопец, які таксама працуе ветэрынарам, але далёка адсюль. А ўвогуле мая прафесійная мара — працаваць з коньмі.
На развітанне Яна ладзіць нам невялікую экскурсію па комплексе. Каровы тут замест звычайных «завушніц» носяць на шыі невялікія скрыначкі з прыладай, у якой захоўваецца ўся інфармацыя пра іх здароўе, кармленне і шмат іншага. Ёсць тут і спецыяльная машына для замешвання і падачы корму, а таксама маленькія «радасці» для кароў, як, напрыклад, аўтаматычная часалка, якая ўключаецца пры набліжэнні жывёлы.
***
У суседняй з Бубнамі вёсцы жывуць яшчэ два маладыя спецыялісты. 23-гадовыя Таццяна і Арцём МІРАНОВІЧЫ працуюць у філіяле аграномамі. Сужэнцы пазнаёміліся падчас вучобы ў Смалянскім аграрным каледжы, што ў Аршанскім раёне. Арцём родам якраз з тых мясцінаў, Таня прыехала з-пад Докшыц. Хлопца можна лічыць ужо патомным аграномам: яго маці і брат таксама маюць адукацыю па гэтай спецыяльнасці. Што ж датычыцца дзяўчыны, то яна раней марыла пра працу настаўніка. Але ў апошні момант падала дакументы ў каледж. Бацькі падтрымалі жаданне дачкі працаваць на зямлі.
[caption id="attachment_67648" align="alignnone" width="400"] Таццяна і Арцём МІРАНОВІЧЫ.[/caption]
Пасля каледжа будучыя муж і жонка разам паступілі ў Горацкую сельскагаспадарчую акадэмію. Калі надышоў час размеркавання, Таццяне прапанавалі варыянт з Бубнамі, і дзяўчына пагадзілася. Зусім блізка ад дому, добрая гаспадарка — чаму б не? Арцёма ж размеркавалі ў Гомельскую вобласць.
Дырэктар філіяла «Бубны» Аляксандр Брыль, даведаўшыся пра такую сітуацыю, прапанаваў дзяўчыне аформіць адносіны з хлопцам афіцыйна, каб іх размеркавалі разам. Таня і Арцём згулялі вяселле і акунуліся ў сямейнае і працоўнае жыццё ў вёсцы.
— Спачатку было вельмі цяжка, асабліва адной, — узгадвае Таццяна. — Падымацца ў 5 гадзін раніцы, позна вяртацца дадому. Жылі спачатку ў інтэрнаце, бо дом, які нам выдзелілі, яшчэ не быў гатовы. Як толькі кіраўніцтва вырашыла гэтае пытанне, мы адразу ж пераехалі сюды.
Зімой працы ў аграномаў значна менш, чым было ў верасні, калі Таня і Арцём толькі пачыналі працаваць. Тады ў іх абавязкі ўваходзіла дапамога галоўнаму аграному «Бубнаў» — назіраць за нарыхтоўкай сіласу, праводзіць аналіз глебы.
— Працоўны дзень цяпер завяршаецца рана, дома можам быць ужо ў 3 гадзіны дня, — расказвае Арцём. — Прыходзіш, топіш печку, гатуеш есці і ўсё — да тэлевізара. Дарэчы, усе хатнія абавязкі мы дзелім пароўну, разам робім абсалютна ўсё. Шкада толькі, што варыянтаў адпачынку тут няшмат. Завялі ката, назвалі Томам. А аказалася, што гэта кошка, таму цяпер клічам яе Томай.
Абжыцца ў хаце сужэнцам дапамагалі бацькі. Яны і зараз штотыдзень прыязджаюць да маладых у госці. Бытавую тэхніку Мірановічы часткова набывалі самі: адразу або ў крэдыт (нешта падарылі родзічы). Звыклыя да вясковага жыцця, маладыя плануюць у наступным годзе завесці сабе і невялікую ўласную гаспадарку, якая будзе забяспечваць іх прадуктамі.
— Глабальных планаў на будучыню мы пакуль што не маем. Усё-такі маладой сям'і на вёсцы жыць складана, і гэта не залежыць ад кіраўніцтва і прадпрыемства, — прызнаецца Арцём. — Таму інтарэсы зараз простыя: у першую чаргу — набыць шафу, а потым можна будзе падумаць і пра машыну.
***
...З якімі ўражаннямі мы пакідалі Бубны? Адпрацоўка на вёсцы пры правільным стаўленні можа даць добры жыццёвы досвед і новыя магчымасці, якіх няма ў горадзе. Ёсць у такім жыцці пэўная рамантыка: цішыня вясковай ночы, агонь у печы... Важна толькі сустрэць падтрымку з боку наймальніка, бо з упэўненасцю ў заўтрашнім дні і жыць, і працаваць лягчэй.
Яраслаў ЛЫСКАВЕЦ.
Мінск — Вілейскі раён — Мінск.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?