Міністэрства па падатках і зборах (МПЗ) нагадвае, што, у адпаведнасці з Падатковым кодэксам Беларусі, фізічныя асобы, якія атрымалі летась даходы, што абкладаюцца падаткамі, абавязаны сёлета ў перыяд з 5 студзеня па 2 сакавіка падаць у падатковыя органы па месцы пражывання падатковыя дэкларацыі (разлікі).
Пасля продажу жылля і машыны
Хто ж з падаткаплацельшчыкаў абавязкова павінен наведаць інспекцыю ў гэты час? Тыя, хто на працягу года атрымлівалі пэўныя даходы, падаткаабкладанне якіх у аўтаматычным рэжыме не прадугледжана. Да даходаў, якія падлягаюць дэклараванню фізічнымі асобамі і абкладанню падаходным падаткам, адносяцца даходы ад выплатнага адчужэння на працягу пяці гадоў (у тым ліку шляхам продажу, мены, рэнты) больш як аднаго жылога дома з гаспадарчымі пабудовамі (пры іх наяўнасці), больш за адну кватэру, дачу і больш як аднаго садовага доміка з гаспадарчымі пабудовамі. Пад дэклараванне трапляе другі прададзены гараж, не першае машына-месца і чарговы рэалізаваны зямельны ўчастак. Вядома, што перад адчужэннем такой нерухомасці яна павінна была належаць фізічнай асобе на праве ўласнасці (долі ў праве ўласнасці на згаданую маёмасць).
Існуе толькі адно маленькае, але слушнае выключэнне. Гэтае правіла не распаўсюджваецца на маёмасць, атрыманую новым гаспадаром у спадчыну.
Абавязкова дэкларуюцца даходы пасля продажу на працягу каляндарнага года больш як аднаго аўтамабіля, тэхнічна дапушчальная агульная маса якога не перавышае 3500 кг і колькасць месцаў для якога, акрамя месца кіроўцы, не перавышае 8, або іншага механічнага транспартнага сродку.
Камерцыйная нерухомасць
З прададзенымі кватэрамі, гаражамі і дачамі існуе гранічны часавы перыяд — 5 гадоў. Але сёння прыватная асоба можа прадаваць і іншую, так званую камерцыйную, нерухомасць. У гэтым выпадку даходы ад выплатнага адчужэння на працягу каляндарнага года такой нерухомай маёмасці будуць абавязкова абкладацца падаткам ужо пасля разгляду пададзенай дэкларацыі. Прыкладам такой нерухомасці могуць з'яўляцца адміністрацыйныя і офісныя, гандлёвыя і складскія памяшканні і інш.
Дэкларуюцца і даходы ад выплатнага адчужэння іншай фізічнай асобе на працягу каляндарнага года долі, паю (часткі долі, паю) у статутным фондзе арганізацыі і акцый. Выключэннем з правіла будуць здзелкі па продажы акцый, якія здзяйсняюцца праз брокера, або здзелкі па продажы акцый, якія здзяйсняюцца з іншымі юрыдычнымі асобамі.
Не забыліся спецыялісты падатковай галіны і пра падарункі. Цяпер гэта будуць падаткаабкладваныя даходы, атрыманыя ў выніку здзелак дарэння ад фізічных асоб, якія не з'яўляюцца індывідуальнымі прадпрымальнікамі, у памеры, які перавышае 37 млн 835 тысяч рублёў. Не падлічваецца кошт падарункаў толькі ад блізкіх сваякоў і асоб, якія знаходзяцца ў адносінах сваяцтва.
Пазыкі выключна на год
Падатковыя рэзідэнты нашай краіны павінны дэклараваць даходы, што былі атрыманы імі ад крыніц за межамі Беларусі. Да такіх даходаў адносяцца ў тым ліку даходы ў выглядзе заработнай платы або іншага ўзнагароджання за выкананне работы па найме (аказанне паслуг), атрыманыя па дагаворах, заключаных з замежнымі арганізацыямі, якія ажыццяўляюць сваю дзейнасць на тэрыторыі замежных дзяржаў.
Цяпер у разрад падаткаабкладваных даходаў трапілі пазыкі і крэдыты ад замежных арганізацый, якія не ажыццяўляюць дзейнасць на тэрыторыі Беларусі праз пастаяннае прадстаўніцтва, замежных індывідуальных прадпрымальнікаў (прыватных натарыусаў) і (або) фізічных асоб, якія пастаянна не пражываюць у нашай краіне. Гэтыя даходы не дэкларуюцца і падаткі не плацяцца, калі пазыкі ці крэдыты былі атрыманы і пагашаны (вернуты) на працягу каляндарнага года, або калі яны былі атрыманы ад блізкіх сваякоў ці асоб, якія знаходзяцца ў адносінах сваяцтва.
Пры поўным (частковым) пагашэнні (вяртанні) пазык і крэдытаў раней выплачаныя сумы падаходнага падатку падлягаюць заліку ці вяртанню плацельшчыку ў памеры, прапарцыйным пагашанай запазычанасці.
Вяртанне ўзносаў не дэкларуецца
Спецыялісты МПЗ адзначаюць, што не трэба дэклараваць даходы, атрыманыя ў выніку ўдзелу ў электронных інтэрактыўных гульнях і інтэрнэт-казіно, якія праводзяцца ў адпаведнасці з заканадаўствам замежных дзяржаў. Не трапляюць у спіс дэкларантаў і даходы ў выглядзе вяртання ўзносаў пры спыненні грамадзянамі будаўніцтва кватэр і (або) індывідуальных жылых дамоў, а таксама пры выбыцці з членаў арганізацый забудоўшчыкаў да завяршэння будаўніцтва — у выпадку прымянення ў дачыненні да сум такіх узносаў маёмаснага падатковага выліку. Цяпер не трэба дэклараваць і страхавыя ўзносы пры скасаванні да заканчэння трохгадовага перыяду дагавораў добраахвотнага страхавання жыцця і дадатковай пенсіі, якія складаліся тэрмінам на тры гады і больш за год, у выпадку прымянення ў дачыненні да сум такіх узносаў сацыяльнага падатковага выліку.
Да 2 сакавіка ўключна
Асобна прэс-служба МПЗ звяртае ўвагу на тое, што традыцыйна апошнім днём падачы дэкларацый з'яўляўся першы дзень вясны. А вось сёлета 1 сакавіка прыпадае на нерабочы дзень (нядзеля), таму гранічны тэрмін падачы падатковай дэкларацыі пераносіцца на 2 сакавіка. Пасля падачы дэкларацыі далей працэдура яшчэ прасцейшая. Падаходны падатак па вышэйпералічаных даходах неабходна будзе выплаціць на падставе паведамлення падатковага органа не пазней за 15 мая.
Сяргей КУРКАЧ.
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».