Баланс інтарэсаў людзей і дзяржавы

У Беларусі плануецца зняць абмежаванні на колькасць маркіраванай беларускімі акцызнымі маркамі алкагольнай прадукцыі, якая перасоўваецца і захоўваецца  фізічнымі асобамі. Гэта прадугледжана праектам Дэкрэта, разгледжаным на нарадзе ў Прэзідэнта Беларусі Аляксандра Лукашэнкі па пытаннях удасканалення прававога рэгулявання абароту алкагольнай прадукцыі, паведамілі ў прэс-службе кіраўніка дзяржавы.

Прэзідэнт падкрэсліў, што праектам дакумента варта вызначыць аптымальныя падыходы да абароту алкагольнай прадукцыі ў краіне. Пры гэтым павінен быць выразна выкананы баланс інтарэсаў людзей і дзяржавы.

Прэзідэнт растлумачыў, чаму паўстала патрэба надаць належную ўвагу  дадзенаму пытанню. У мінулым годзе адбылося некалькі выпадкаў, якія былі агучаны ў СМІ і мелі шырокі грамадскі рэзананс: міліцыя і падатковыя органы прыцягнулі грамадзян да досыць суровай адказнасці за перавозку і захоўванне адносна невялікай колькасці алкаголю. Прытым людзі закуплялі спіртное для ўласных патрэб, да прыкладу, для сямейных свят, а не дзеля перапродажу. У выніку пытанне выйшла на прэзідэнцкі ўзровень, і  кіраўнік дзяржавы  даручыў заканадаўчым чынам урэгуляваць дадзеную праблему.

Так, па даручэнні Прэзідэнта быў падрыхтаваны праект Дэкрэта. У адпаведнасці з дакументам прапануецца скасаваць абмежаванні на колькасць алкагольных напояў (маркіраваных беларускімі акцызнымі маркамі), якія грамадзяне могуць захоўваць і перавозіць па тэрыторыі краіны.

На нарадзе Аляксандр Лукашэнка прапанаваў падрабязна абмеркаваць палажэнні новага дакумента. Па яго меркаванні, зыходзіць варта выключна з інтарэсаў людзей і дзяржавы і з той сітуацыі, што складаецца. «Давайце з пункту гледжання грамадства разгледзім гэтае пытанне, а таксама з тым, каб прынятая пастанова не нанесла шкоду дзяржаве, перш за ўсё, з эканамічнага пункту гледжання і падаткаабкладання», - адзначыў Аляксандр Лукашэнка.

Дадзены праект вызначае абарот алкагольнай прадукцыі менавіта фізічнымі асобамі. Кіраўнік дзяржавы адобрыў норму, што тычыцца здымання абмежаванняў для фізасоб. Прэзідэнт у цэлым падтрымаў праект дакумента, даручыўшы дапрацаваць яго ў частцы ўзмацнення жорсткасці адказнасці за незаконны абарот алкаголю -- за захоўванне і перасоўванне па тэрыторыі краіны немаркіраванай алкагольнай прадукцыі, за нелегальны продаж алкаголю.