Наша краіна гатова дапамагчы Малдове ў развіцці прамысловай базы

Наша краіна гатова дапамагчы Малдове ў стварэнні сумесных прадпрыемстваў і развіцці прамысловай базы.

Пра гэта Прэзідэнт Беларусі Аляксандр Лукашэнка заявіў на сустрэчы з прэм'ер-міністрам Малдовы Паўлам Філіпам.

У Малдове ўжо створаны сумесныя прадпрыемствы дзвюх краін, вядуцца работы па арганізацыі новых вытворчасцяў. «Калі вы выбераце яшчэ нешта і будзеце зацікаўлены ў пераносе нашай вытворчасці ў Малдову, вы нам скажыце, падтрымайце з боку ўрада, і я вам даю гарантыю, што мы на працягу максімум года арганізуем у вас любую вытворчасць, — падкрэсліў Прэзідэнт Беларусі. — У тым ліку мы зацікаўлены, каб і лакалізацыя ішла вялікая. Мы не настойваем, каб прывезлі па частках трактар і арганізавалі ў вас «адвёртачную» вытворчасць. Не, мы будзем садзейнічаць таму, каб вырабляць у Малдове ўсё што магчыма. Галоўнае, каб якасць прадукцыі была добрай».

Беларусь таксама гатова павялічыць пастаўкі ў Малдову прадуктаў харчавання і нафтапрадуктаў, дапамагаць у развіцці прамысловай базы сельскай гаспадаркі, станка- і машынабудавання, адзначыў Аляксандр Лукашэнка, падкрэсліўшы, што беларускі бок не зацікаўлены завышаць цэны. Кіраўнік дзяржавы дадаў, што і рынак Беларусі адкрыты для малдаўскай прадукцыі, у прыватнасці вінаробнай. «Галоўнае, каб яна была якаснай і пастаўлялася без шэрых схем. Вы ведаеце нашу ў гэтым плане прынцыповасць», — падкрэсліў ён.

У сваю чаргу прэм'ер-міністр Малдовы выказаў Аляксандру Лукашэнку ўдзячнасць за сустрэчу і пацвердзіў зацікаўленасць краіны ў прадаўжэнні развіцця партнёрства з Беларуссю ў розных сферах, паведамляе прэс-служба Прэзідэнта. «Пасля таго, як вы наведалі Малдову, нашы адносіны сталі развівацца яшчэ больш дынамічна. Для нас гэта вельмі важна, — падкрэсліў ён. — Улічваючы тую хуткасць, з якой мы пачалі рухацца, мы абавязкова даб'ёмся поспеху».