Для праходжання цэнтралізаванага тэсціравання ў рэзервовыя дні зарэгістраваліся 733 абітурыенты. Летась сваё права скарыстацца дадатковай магчымасцю змаглі пацвердзіць 797 чалавек, але здаць яны маглі толькі адзін прадмет.
З 2017 года ў абітурыентаў з'явілася магчымасць здаваць у рэзервовыя дні тры дысцыпліны і такім чынам не губляць цэлы год, напрыклад, па прычыне хваробы. Праўда, графік здачы экзаменаў атрымліваецца даволі шчыльны (6, 8 і 10 ліпеня). Праходзіць выпрабаванні па трох прадметах будуць 25 чалавек, а 84 абітурыенты запісаліся на тэсціраванне па двух прадметах. Найбольшая колькасць абітурыентаў будуць здаваць рускую мову (226 чалавек) і матэматыку (134 чалавекі).
Кожны зварот па дазвол удзельнічаць у ЦТ у рэзервовыя дні разглядаўся індывідуальна. Да ўважлівых прычын адносіцца хвароба, а таксама ўдзел у міжнародных спаборніцтвах... Паколькі ўступныя выпрабаванні здаюць не толькі выпускнікі школ і гімназій, але і людзі, якія працуюць, іх адсутнасць можа быць абумоўлена вытворчай неабходнасцю: чалавек знаходзіўся ў камандзіроўцы... Ёсць і чыста тэхнічныя прычыны, напрыклад затрымаўся рэйс самалёта, спазніўся прыгарадны ці міжгародні аўтобус.
А вось абітурыентам, якія не трапілі на іспыты ў асноўны дзень, бо не мелі з сабой пашпарта (захапілі, напрыклад, толькі яго копію ці пасведчанне кіроўцы), пераздачу не дазваляюць. Тое, што пашпарт «быў у пасольстве на візе», таксама не лічыцца ўважлівай прычынай. Тэрміны правядзення ўступнай кампаніі вядомыя даўно, таму трэба загадзя вызначацца, што важнейшае: паехаць на адпачынак ці атрымаць вышэйшую адукацыю. Выключэнняў нікому не робяць...
Пунктам правядзення цэнтралізаванага тэсціравання па ўсіх вучэбных дысцыплінах у рэзервовыя дні вызначаны Беларускі дзяржаўны ўніверсітэт.
Надзея НІКАЛАЕВА
Сумесныя праекты ядзерных тэхналогій.
