Творчасць без перашкод

На II Міжнародных Парадэльфійскіх гульнях па колькасці атрыманых узнагарод Беларусь заняла 2-е месца, саступіўшы Кітаю. Гран-пры атрымаў беларускі народны мужчынскі вакальны гурт «Хорус», які 13 гадоў дзейнічае на прадпрыемстве «Элект» Беларускага таварыства інвалідаў па зроку. Квартэт выконваў два нумары: «Белая Русь ты мая» «Песняроў» і папуры, складзенае з песень савецкіх кампазітараў. Акрамя шматлікіх перамог у намінацыях, беларусы адзначыліся як «Самая пазітыўная і дружная каманда».

Удзел нашай дэлегацыі падтрымала Міністэрства культуры Рэспублікі Беларусь. Сёлетнія II Міжнародныя Парадэльфійскія гульні праходзілі ў Іжэўску (Удмурція). Гэта маштабны інклюзіўны творчы конкурс для людзей з інваліднасцю. На працягу тыдня больш як 1,5 тысячы ўдзельнікаў з 22 краін выступалі ў 29 намінацыях і прадстаўлялі 8 відаў мастацтва: музычнае, выяўленчае, аўдыявізуальнае, тэатральнае, харэаграфічнае, цыркавое, літаратуру і жэставую песню.

— Яшчэ ў 2016 годзе наша краіна ратыфікавала Канвенцыю ААН аб правах людзей з інваліднасцю. Міністэрства культуры, як і некаторыя іншыя дзяржаўныя органы, з’яўляецца сувыканаўцам Нацыянальнага плана дзеянняў па рэалізацыі гэтай канвенцыі, — расказала Наталля Задзяркоўская, намеснік начальніка галоўнага ўпраўлення культуры і аналітычнай работы — начальнік упраўлення культуры і народнай творчасці Міністэрства культуры Рэспублікі Беларусь.

Галоўнае для дзяржавы ў гэтым кірунку — арганізацыя такога тыпу пляцовак, дзе творцы маглі б працаваць без перашкод. Сярод важкіх новаўвядзенняў у нашай краіне — з’яўленне тактыльных скульптур і карцін, аўдыягідаў для інвалідаў па зроку і відэагідаў для людзей з праблемамі слыху ў Нацыянальным мастацкім музеі. Арганізаваны ўнікальны для Беларусі конкурс «Маленькая міс і маленькі містар Deaf» сярод дзяцей з парушэннем слыху да 12 гадоў на базе філіяла «Цэнтр інклюзіўнай культуры» ДУ «Гарадскі цэнтр культуры г. Гомеля». Дзейнічае таксама Народны тэатр мімікі і жэста «Інклюзіён», са спектаклем якога плануюцца гастролі па Беларусі. Створаны праект «Адукацыя без перашкод» у межах больш буйнога праекта «Вучыцца, каб дзейнічаць», які дазволіў людзям з абмежаванымі магчымасцямі атрымаць новую прафесію. Сярод такіх значных праектаў — «Свет без меж» мастацкага клуба-студыі «Палітра радасці», які ўдзельнічаў у выстаўцы ў Маскве.

— Інваліды сутыкаюцца са шматлікімі праблемамі ў грамадстве, — адзначыла Людміла Калмыкава, старшыня праўлення Мінскай гарадской арганізацыі «Беларускае таварыства інвалідаў». — Для іх вырашэння неабходна змяняць у свядомасці стаўленне да інвалідаў. І лягчэй за ўсё гэтага дасягнуць, менавіта дэманструючы дасягненні ў галіне культуры.

Яўгенія ШЫЦЬКА